যশ আৰু কিয়াৰা আদৱানী অভিনীত ‘টক্সিক: এ ফেয়াৰী টেল ফৰ গ্ৰ’ন-আপছ’ৰ ‘তাবাহী’ গীতটো মুক্তি পোৱাৰ পিছত ছ’চিয়েল মিডিয়াত ইয়াৰ অন্তৰংগ দৃশ্যক লৈ এক বৃহৎ বিতৰ্ক আৰম্ভ হৈছে। এই বিতৰ্কৰ মাজতে অভিনেত্ৰী কাজল আগৰৱালাই কয় যে পৰ্দাত অন্তৰংগ দৃশ্যত অভিনয় নকৰাৰ সিদ্ধান্ত তেওঁৰ ব্যক্তিগত পছন্দ আৰু সেইবাবেই তেওঁ নিজৰ কেৰিয়াৰত কেইবাখনো ডাঙৰ ছবিৰ প্ৰস্তাৱ নাকচ কৰিছে।
শেহতীয়াকৈ প’ডকাষ্টাৰ শুভংকৰ মিশ্ৰৰ সৈতে হোৱা এক সাক্ষাৎকাৰত কাজলে কয় যে তেওঁ কেতিয়াও পৰ্দাত অন্তৰংগ দৃশ্য বা অস্বস্তি অনুভৱ হোৱা এনে পোছাক পিন্ধি অভিনয় কৰিবলৈ স্বাচ্ছন্দ্যবোধ কৰা নাই।
কাজলৰ মতে, ‘মই কেৱল নিজৰ কথা ক’ব পাৰো। এনে চৰিত্ৰ মই কেতিয়াও কৰা নাই। যদি মই পৰ্দাত অন্তৰংগ দৃশ্য কৰি বা বিকিনিৰ দৰে কাপোৰ পিন্ধি অভিনয় কৰিবলৈ স্বাচ্ছন্দ্যবোধ নকৰো—তেন্তে মই সেইটো নকৰো। সেইবাবেই মই বহুতো ডাঙৰ ডাঙৰ ছবিৰ প্ৰস্তাৱ নাকচ কৰিছো। ইয়াৰ বাবে মোৰ কোনো আক্ষেপ নাই। এইটোৱেই মোৰ ব্যক্তিগত সীমা, যিটো মই পাৰ হ’ব নিবিচাৰো।’
কাজলে লগতে কয়, ‘মই কেতিয়াও অতি ঘনিষ্ঠ দৃশ্যত অভিনয় কৰি স্বাচ্ছন্দ্য অনুভৱ কৰা নাই। মোৰ বাবে এইবোৰ ব্যক্তিগত কথা, যিবোৰ পৰ্দাত দেখুৱাটো মই সঠিক বুলি অনুভৱ কৰা নাই। মই সদায় মোৰ সীমাবদ্ধতাক সন্মান কৰি আহিছো আৰু সেই সিদ্ধান্তত অটল হৈ আছো।’
সাক্ষাৎকাৰত কাজলক প্ৰশ্ন কৰা হৈছিল যে একেধৰণৰ দৃশ্যত অভিনয় কৰাৰ পিছতো অভিনেতাতকৈ অভিনেত্ৰীসকলে কিয় বেছি সমালোচনাৰ সন্মুখীন হয়। উত্তৰত তেওঁ কয়, ‘এয়া একান্তই ব্যক্তিগত সিদ্ধান্ত। এনে দৃশ্যত অভিনয় কৰিব নে নকৰে সেইটোও এজন পুৰুষে নিজেই সিদ্ধান্ত ল’ব। সিদ্ধান্ত নিজৰ ভিতৰৰ পৰা আহিব লাগে। কিন্তু মই ভাবো এনে বিষয়ত মহিলাসকল তুলনামূলকভাৱে অধিক সতৰ্ক।’
কাজলে মাতৃত্বই তেওঁৰ সিদ্ধান্তক কেনেদৰে প্ৰভাৱিত কৰিছে সেই বিষয়েও কয়। উদ্যোগী গৌতম কিচলু আৰু কাজলৰ চাৰি বছৰীয়া পুত্ৰ নীল। কাজলৰ মতে, এতিয়া তেওঁ চৰিত্ৰ বাছনি কৰাৰ সময়ত পুত্ৰৰ কথাও চিন্তা কৰে।
কাজলে কয়, ‘মোৰ ল’ৰা ডাঙৰ হৈ মোৰ ছবিবোৰ চালে তেওঁ গৌৰৱ অনুভৱ কৰা উচিত। মই নিবিচাৰো কোনো দৃশ্য চোৱাৰ পিছত তাৰ অস্বস্তি অনুভৱ হওক বা প্ৰশ্ন কৰক, “মা, তুমি কিয় এনেকুৱা কৰিলা?” গতিকে এতিয়া মই অতি সচেতনভাৱে চিনেমা বাছি লওঁ।’
মন কৰিবলগীয়া যে ‘তাবাহী’ গীতটো মুক্তি পোৱাৰ পিছত এফালে বহু দৰ্শকে ইয়াৰ প্ৰডাকচন ষ্টাইল আৰু ভিজুৱেলৰ প্ৰশংসা কৰিছে, আনফালে অন্তৰংগ দৃশ্যক লৈ সমালোচনাও হৈছে। বিশেষকৈ কিয়াৰা আদবানীক লৈ ছ’চিয়েল মিডিয়াত কটুক্তিৰ ধুমুহা। সেই সময়ত ছবিখনৰ অভিনেতা বেনেডিক্ট গেৰেটেও প্ৰশ্ন উত্থাপন কৰিছিল যে একেটা দৃশ্যতে অভিনয় কৰিলেও কিয় কেৱল অভিনেত্ৰীগৰাকী বেছি সমালোচনাৰ বলি হয়, অথচ অভিনেতাজনক প্ৰশংসা কৰা হয়।
অহা ২৬ আগষ্টত চিনেমাগৃহত মুক্তি পোৱাৰ কথা ‘টক্সিক: এ ফেয়াৰী টেল ফৰ গ্ৰ’ন-আপছ’ ছবিখন। আনহাতে কাজল আগৰৱালা অভিনীত ‘দ্য ইণ্ডিয়া ষ্ট’ৰী’ ২৪ জুলাইত মুক্তি পাব।
