নিয়মীয়া অভ্যাস অনুসৰি শনিবাৰে পুৱাও ফুৰিবলৈ ওলাই গৈছিল ৭০ বছৰীয়া উৰ্মিলা নামৰ মহিলাগৰাকী। কিন্তু তেওঁ গম পোৱা নাছিল যে এইটোৱেই তেওঁৰ জীৱনৰ শেষ প্ৰাতঃভ্ৰমণ হ’ব।
দিল্লীৰ নাৰেলাৰ মামুৰপুৰ অঞ্চলৰ ‘হিমালয় এপাৰ্টমেণ্ট’ৰ সন্মুখৰ পথত পুৱা প্ৰায় ৮ বজাত সংঘটিত হয় এক ভয়ংকৰ পথ দুৰ্ঘটনা। ধুমুহাৰ গতিৰে অহা এখন বিলাসী মাৰ্চিডিজ গাড়ীৰ ইখনৰ পাছত সিখন গাড়ীৰ সৈতে সংঘৰ্ষৰ মাজত পৰি স্থানীয় বাসিন্দাগৰাকীৰ থিতাতে মৃত্যু হয়।
আৰক্ষী আৰু প্ৰত্যক্ষদৰ্শীৰ মতে, হাৰিয়ানা আৰক্ষীৰ উপ-পৰিদৰ্শকৰ পুত্ৰ শুভমে মদ্যপান কৰি অতি তীব্ৰ বেগত মাৰ্চিডিজ গাড়ীখন চলাই আহিছিল। হঠাৎ শুভমৰ গাড়ীখনে বিপৰীত দিশৰ পৰা অহা এখন ৱেগন আৰত মুখামুখিকৈ খুন্দা মাৰে। তীব্ৰ খুন্দাৰ বলত ৱেগন আৰ গাড়ীখন পিছলৈ ছিটিকি গৈ তাত ৰখাই থোৱা এখন তিনিচকীয়া ভ্যানৰ ওপৰত বাগৰি পৰে।
দুৰ্ভাগ্যজনকভাৱে সেই মুহূৰ্তত গাড়ী দুখনৰ মাজত বয়স্ক মহিলা উৰ্মিলা উপস্থিত আছিল। গাড়ীৰ চেপাত পিষ্ট হৈ তেওঁ তাতেই শেষ নিশ্বাস ত্যাগ কৰে। দুৰ্ঘটনাত ৱেগন আৰৰ চালকজনো আহত হয় যদিও তেওঁৰ আঘাত গুৰুতৰ নহয়।
দুৰ্ঘটনাটোৰ পিছত ওলোৱা ছবিবোৰত দেখা গৈছে যে ঘাতক চালক শুভম গাড়ীৰ ভিতৰত ড্ৰাইভাৰৰ চিটত বিভ্ৰান্ত আৰু অত্যন্ত মাতাল অৱস্থাত পৰি আছিল, আনকি গাড়ীৰ কাপ হোল্ডাৰত তেতিয়াও সুৰাৰ বটল এটা ৰখা আছিল।
আৰক্ষীয়ে উদ্ধাৰ অভিযান আৰম্ভ কৰি হাৰিয়ানা আৰক্ষী বিষয়াৰ পুত্ৰ শুভমক গ্ৰেপ্তাৰ কৰে। তদন্তত প্ৰকাশ পাইছে যে দুৰ্ঘটনাৰ মাত্ৰ এদিন পূৰ্বে তেওঁ বন্ধুৰ পৰা মাৰ্চিডিজ গাড়ীখন ধাৰলৈ লৈছিল।
মদ্যপান কৰি উদণ্ডভাৱে গাড়ী চলাই প্ৰাণ কাঢ়ি নিয়াৰ এনে ঘটনা নতুন নহয়। ইয়াৰ পূৰ্বে ২০২৪ চনত পুনেত এজন প্ৰভাৱশালী ব্যৱসায়ীৰ নাবালক পুত্ৰৰ পৰ্ছে গাড়ীৰ খুন্দাত দুজন যুৱ অভিযন্তাৰ মৃত্যুত আলোড়নৰ সৃষ্টি হৈছিল। আনকি যোৱা নৱেম্বৰ মাহতো দিল্লীৰ বসন্ত কুঞ্জৰ সমীপত তীব্ৰবেগী মাৰ্চিডিজ গাড়ীৰ খুন্দাত আন এজন ব্যক্তিয়ে প্ৰাণ হেৰুৱাইছিল।
