দেশৰ বিভিন্ন ৰাজ্যৰ লগতে হিমাচল প্ৰদেশতো প্ৰাকৃতিক দুৰ্যোগে ভয়াবহ ৰূপ ধাৰণ কৰিছে। বাৰিষাৰ আৰম্ভণিৰে পৰা নেৰানেপেৰা বৰষুণ, বানপানী আৰু ভূমিস্খলনৰ ফলত বিগত আঢ়ৈ মাহত ৰাজ্যখনত ১৫৭ জন লোকৰ প্ৰাণহানি হোৱাৰ লগতে ২৫৭ জন লোক বৰ্তমানো সন্ধানহীন হৈ আছে। দুৰ্যোগৰ ভয়াবহতা ইমানেই বেছি যে সমগ্ৰ ৰাজ্যখনত এতিয়া ২৬০টাকৈ পথ যাতায়াতৰ বাবে সম্পূৰ্ণৰূপে বন্ধ হৈ পৰিছে।
ৰাজ্যিক জৰুৰীকালীন পৰিচালনা কেন্দ্ৰৰ প্ৰতিবেদন অনুসৰি, ৩০ জুনৰ পৰা ৯ আগষ্টলৈকে ভূমিস্খলন আৰু আকস্মিক বানত ৬৮ জন লোকৰ মৃত্যু হৈছে। আনহাতে, পথ দুৰ্ঘটনাত প্ৰাণ হেৰুৱাইছে ৮৯ জন লোকে। পৰিস্থিতিৰ প্ৰতি লক্ষ্য ৰাখি ৰাজ্যখনৰ পাঁচখন জিলাত প্ৰবলৰ পৰা অতি প্ৰবল বৰষুণৰ সতৰ্কবাণী জাৰি কৰা হৈছে।
ৰাজ্যখনৰ বিভিন্ন প্ৰান্তত বিদ্যুৎ যোগানো এক ডাঙৰ সমস্যা হৈ পৰিছে। আটাইতকৈ বেছি সমস্যাৰ সন্মুখীন হৈছে কুল্লু আৰু মাণ্ডি জিলাৰ ৰাইজ। মাত্ৰ এসপ্তাহৰ ভিতৰতে ৰাজ্যখনত ১৬১ টা ট্ৰেন্সফৰ্মাৰ বিকল হৈ পৰিছে, যাৰ ভিতৰত মাণ্ডিত ৭৭ টা, চিমলাত ৪৩ টা আৰু কুল্লুত ৪০ টা ট্ৰেন্সফৰ্মাৰ বিকল হৈ আছে। নেৰানেপেৰা বৰষুণৰ ফলত কুল্লুৰ নদীসমূহ ফেনে-ফোটোকাৰে বাঢ়ি আহিছে আৰু কিছুমান ঠাইত বিপদসীমাৰ ওপৰেৰে বৈ আছে। মাণ্ডি জিলাৰ পৰিস্থিতিও প্ৰায় একেই।
মাণ্ডি-কুল্লু ঘাইপথকে ধৰি ৰাজ্যখনৰ মুঠ ২৬০ টা পথ বৰ্তমান বন্ধ হৈ আছে। ইয়াৰ ভিতৰত মাণ্ডিত সৰ্বাধিক ১২০ টা পথ ভূমিস্খলনৰ ফলত বন্ধ হৈ পৰিছে। ইয়াৰ পিছতে চাম্বাত ৪২ টা, কুল্লুত ৪০ টা আৰু চিমলাত ৩০ টা পথ বন্ধ হৈ আছে। প্ৰশাসনৰ সূত্ৰই জনোৱা মতে, পথসমূহ দ্ৰুতভাৱে মুকলি কৰাৰ কাম চলি আছে, কিন্তু নেৰানেপেৰা বৰষুণ আৰু নতুনকৈ হোৱা ভূমিস্খলনে উদ্ধাৰ অভিযানত অধিক জটিলতাৰ সৃষ্টি কৰিছে।
চিমলাৰ বতৰ বিজ্ঞান কেন্দ্ৰই কাংগ্ৰা, মাণ্ডি, হামিৰপুৰ, চিমলা আৰু ছিৰমৌৰ জিলাত প্ৰবল বৰষুণৰ সতৰ্কবাণী জাৰি কৰিছে। ইয়াৰ উপৰি চাম্বা, কুল্লু, সোলান আৰু বিলাসপুৰতো আগন্তুক সময়ত বৰষুণৰ আগজাননী দিয়া হৈছে।
