‘বন্দে মাতৰম’ বিতৰ্কক লৈ কংগ্ৰেছৰ বিৰুদ্ধে অধিক কঠোৰ হৈ পৰিছে বিজেপি। দেওবাৰে ৰাজস্থানৰ চিতোৰগড়ৰ এখন সভাত অংশগ্ৰহণ কৰি কংগ্ৰেছ নেত্ৰী ছোনিয়া গান্ধীক তীব্ৰ নিচানা কৰে কেন্দ্ৰীয় গৃহমন্ত্ৰী অমিত শ্বাহে। ছোনিয়া গান্ধীৰ এই কাৰ্যক এক ‘পাপ’ বুলি আখ্যা দি দেশবাসীয়ে কেতিয়াও ক্ষমা নকৰে বুলি দাবী কৰে কেন্দ্ৰীয় মন্ত্ৰীগৰাকীয়ে। আনহাতে, দেওবাৰে বিয়লি নবান্নত এখন সংবাদমেল সম্বোধন কৰি এই ঘটনাৰ তীব্ৰ বিৰোধিতা কৰে পশ্চিমবংগৰ মুখ্যমন্ত্ৰী শুভেন্দু অধিকাৰীয়েও।
বিতৰ্কৰ সূত্ৰপাত ক‘ত?
এই বিতৰ্কৰ সূত্ৰপাত হৈছিল শনিবাৰে, অৰ্থাৎ স্বাধীনতা দিৱসৰ দিনা। দিল্লীৰ কংগ্ৰেছৰ মুখ্য কাৰ্যালয় ইন্দিৰা ভৱনত ৰাষ্ট্ৰীয় গীত ‘বন্দে মাতৰম’ পৰিৱেশন কৰি থকাৰ সময়ত দলীয় কৰ্মীসকলৰ সৈতে কথা পাতি থকা দেখা গৈছিল ছোনিয়া গান্ধীক। সামাজিক মাধ্যমত ভাইৰেল হোৱা এটা ভিডিঅ’ত দেখা গৈছে যে কংগ্ৰেছৰ নেতা-কৰ্মীসকলে বন্দে মাতৰম গাই আছে। তাত কংগ্ৰেছৰ সভাপতি মল্লিকাৰ্জুন খাৰ্গে আৰু লোকসভাৰ বিৰোধী দলপতি ৰাহুল গান্ধীও উপস্থিত আছিল। গীতটি চলি থকাৰ মাজতে ছোনিয়া গান্ধীক কাৰোবাক কিছু নিৰ্দেশ দি থকা দেখা গৈছে।
শনিবাৰেই বিজেপিৰ তৰফৰ পৰা দাবী কৰা হৈছিল যে সম্পূৰ্ণ বন্দে মাতৰম গীতটো গোৱাৰ সময়ত ছোনিয়া গান্ধীয়ে অস্বস্তি বোধ কৰিছিল। দেশৰ সাংস্কৃতিক চেতনা, ঐতিহ্য আৰু জাতীয়তাবাদৰ প্ৰতি গান্ধী পৰিয়ালৰ এই অস্বস্তিক লৈ সৰৱ হৈ পৰে গেৰুৱা দলটো।
বঙ্কিমচন্দ্ৰৰ পৰিয়ালৰ পত্ৰ
দেওবাৰে এই বিষয়টোক লৈ কংগ্ৰেছক অধিক শলঠেকত পেলোৱাৰ কৌশল গ্ৰহণ কৰে বিজেপিয়ে। ইতিমধ্যে নৈহাটীৰ বিজেপি বিধায়ক তথা বন্দে মাতৰমৰ স্ৰষ্টা যুগৰ্ষি বঙ্কিমচন্দ্ৰ চট্টোপাধ্যায়ৰ পৰিয়ালৰ সদস্য সুমিত্ৰ চট্টোপাধ্যায়ে ছোনিয়া গান্ধীলৈ এখন পত্ৰ প্ৰেৰণ কৰিছে। সম্পূৰ্ণ বন্দে মাতৰম গোৱাত বাধা দিয়াৰ অভিযোগ তুলি সুমিত্ৰই পত্ৰখনত লিখে, “কংগ্ৰেছ কৰ্মীসকলে যেতিয়া বঙ্কিমচন্দ্ৰ চট্টোপাধ্যায়ৰ অমৰ সৃষ্টি বন্দে মাতৰমৰ পূৰ্ণাংগ ৰূপ পৰিৱেশন কৰি আছিল, তেতিয়া আপোনাৰ শাৰীৰিক ভাষাত যি দৃশ্যমান অস্বস্তি, বিৰক্তি আৰু বাৰে বাৰে ৰখাই দিয়াৰ প্ৰয়াস প্ৰকাশ পাইছে, সেয়া মোক গভীৰভাৱে মৰ্মাহত কৰিছে।” পত্ৰখনত তেওঁ ছোনিয়া গান্ধীক আত্মবিশ্লেষণ কৰাৰ লগতে বিনাচৰ্তে ক্ষমা খুজিবলৈ আহ্বান জনায়।
মুখ্যমন্ত্ৰী শুভেন্দু অধিকাৰীৰ প্ৰতিক্ৰিয়া
ছোনিয়ালৈ লিখা সুমিত্ৰৰ সেই পত্ৰখন হাতত লৈ নবান্নত সংবাদমেল সম্বোধন কৰে শুভেন্দু অধিকাৰীয়ে। মুখ্যমন্ত্ৰীগৰাকীয়ে কয়, “বন্দে মাতৰম আছিল বিপ্লৱীসকলৰ সঞ্জীৱনী মন্ত্ৰ। ইয়াক অপমান কৰা মানে দেশপ্ৰেম আৰু সৰ্বোপৰি বঙ্কিমচন্দ্ৰক অপমান কৰা। বংগভূমিৰ পৰা মই ইয়াৰ তীব্ৰ নিন্দা কৰিছোঁ।” এই প্ৰসংগতে ৰাজ্যিক কংগ্ৰেছ নেতৃত্বকো নিচানা কৰি তেওঁ কয়, “পশ্চিমবংগ কংগ্ৰেছৰ বিৰোধিতা কৰাৰ কোনো ক্ষমতা নাই। তেওঁলোকৰ পৰা আমি একো আশা নকৰোঁ। পিছে ছোনিয়া গান্ধীৰ পৰা প্ৰতিক্ৰিয়া আশা কৰিম।”
অমিত শ্বাহৰ কঠোৰ সমালোচনা
সমগ্ৰ ঘটনাক ‘লজ্জাজনক’ বুলি অভিহিত কৰি দেওবাৰে অমিত শ্বাহে কয়, “কংগ্ৰেছৰ কাৰ্যালয়ত বন্দে মাতৰম পৰিৱেশন কৰি থকাৰ সময়ত ছোনিয়া গান্ধীয়ে কংগ্ৰেছ সভাপতিক গীতটো গাবলৈ বাধা দিয়ে। আমি টিভিত সকলোৱে দেখিছোঁ।” ছোনিয়াক কঠোৰ ভাষাৰে সমালোচনা কৰি শ্বাহে লগতে কয়, “১৪০ কোটি ভাৰতবাসীয়ে আপোনাক দেখিছে। আপুনি যি পাপ কৰিলে, সেয়া দেশবাসীয়ে কেতিয়াও নাপাহৰে। কংগ্ৰেছৰ লোকসকলৰ লাজ পোৱা উচিত।”
কংগ্ৰেছৰ স্পষ্টীকৰণ
অৱশ্যে শনিবাৰেই বিজেপিয়ে উত্থাপন কৰা এই অভিযোগ অস্বীকাৰ কৰিছিল কংগ্ৰেছে। তেওঁলোকৰ দাবী, ইন্দিৰা ভৱনৰ কাৰ্যসূচীত বন্দে মাতৰম সম্পূৰ্ণকৈ গোৱা হৈছিল। কংগ্ৰেছৰ সাধাৰণ সম্পাদক জয়ৰাম ৰমেশে স্পষ্ট কৰি দিয়ে যে মল্লিকাৰ্জুন খাৰ্গে বহুত সময় ধৰি থিয় হৈ আছিল, সেয়েহে ছোনিয়া গান্ধীয়ে তেওঁৰ বাবে এখন চকী আনিবলৈহে নিৰ্দেশ দিছিল; ইয়াত গীতটোক অৱমাননা কৰাৰ কোনো প্ৰশ্নই নুঠে।
