হিমন্ত বিশ্ব শৰ্মা মুখ্যমন্ত্ৰী হোৱাৰ পিছতেই যেন কমি আহিল চৰকাৰী ধন আৰু ব্যক্তিগত ব্যৱসায়ৰ সীমাৰেখা। পুনৰ পোহৰলৈ আহিছে সদা চৰ্চিত হিমন্ত বিশ্ব শৰ্মাৰ পত্নী ৰিণিকি ভূঞা শৰ্মাৰ চৰকাৰী ধন লাভৰ কাহিনী।
অসম বিধানসভাত ২০২৬ চনৰ জুলাইত দাখিল কৰা তথ্য অনুসৰি, হিমন্ত বিশ্ব শৰ্মা মুখ্যমন্ত্ৰী হোৱাৰ আগৰ পাঁচটা বিত্তীয় বৰ্ষ—২০১৬-১৭ৰ পৰা ২০২০-২১লৈ—ৰাজ্য চৰকাৰে সংবাদ মাধ্যম আৰু প্ৰচাৰৰ বাবে মুঠ ১৪৫.০১ কোটি টকা ব্যয় কৰিছিল। ইয়াৰ বিপৰীতে ২০২১-২২ৰ পৰা ২০২৫-২৬লৈ পাঁচটা বিত্তীয় বৰ্ষত এই ব্যয় বৃদ্ধি হৈ ৪৬০.৮২ কোটি টকা হৈছে। অৰ্থাৎ পাঁচ বছৰৰ ব্যৱধানত চৰকাৰী বিজ্ঞাপন আৰু প্ৰচাৰ ব্যয় তিনিগুণতকৈও অধিক হৈছে।
২০২৩-২৪ বিত্তীয় বৰ্ষত ব্যয়টোৱে একেবাৰে ১৬০.৯০ কোটি টকাৰ শিখৰত উপনীত হয়। ২০২১-২২ত ৭২.৮৩ কোটি, ২০২২-২৩ত ৭৮.৬৯ কোটি, ২০২৪-২৫ত ৬৯.১৭ কোটি আৰু ২০২৫-২৬ত ৭৯.২৩ কোটি টকা ব্যয় হোৱা বুলি বিধানসভাৰ তথ্যত উল্লেখ আছে।
অৱশ্যে ২০২১-২২ৰ পৰিসংখ্যাত ২০২১ চনৰ এপ্ৰিল মাহো অন্তৰ্ভুক্ত—অৰ্থাৎ হিমন্ত বিশ্ব শৰ্মাই ১০ মে’ ২০২১ত মুখ্যমন্ত্ৰী হিচাপে দায়িত্ব গ্ৰহণ কৰাৰ আগৰ সময়ো সেই হিচাপৰ ভিতৰত আছে।
এই বৃহৎ চৰকাৰী বিজ্ঞাপন ব্যয়ৰ অংশীদাৰসকলৰ ভিতৰত আছে প্ৰাইড ইষ্ট এণ্টাৰটেইনমেণ্ট প্ৰাইভেট লিমিটেড। প্ৰতিষ্ঠানটোৰ অধ্যক্ষ তথা মেনেজিং ডাইৰেক্টৰ ৰিণিকি ভূঞা শৰ্মা।
‘নিউজলণ্ড্ৰী’ৰ অনুসন্ধানমূলক প্ৰতিবেদন অনুসৰি, ২০২১-২২ৰ পৰা ২০২৪ চনৰ আগষ্টলৈ প্ৰাইড ইষ্টে প্ৰায় ২০.১১ কোটি টকাৰ চৰকাৰী বিজ্ঞাপন লাভ কৰিছিল। তাৰ বিপৰীতে ২০১০-১১ৰ পৰা ২০২০-২১লৈ ১১টা বিত্তীয় বৰ্ষত প্ৰতিষ্ঠানটোৱে লাভ কৰা চৰকাৰী বিজ্ঞাপনৰ পৰিমাণ আছিল প্ৰায় ১০.৪০ কোটি টকা।
২০২০-২১ত প্ৰায় ২.৬৮ কোটি টকা বিজ্ঞাপন ৰাজহ লাভ কৰা প্ৰতিষ্ঠানটোৱে ২০২১-২২ত ৫.৫২ কোটি টকা লাভ কৰে। ২০২২-২৩ত সেই অংক ৩.৭৪ কোটিলৈ হ্ৰাস পালেও ২০২৩-২৪ত ই ১০.০৪ কোটি টকালৈ বৃদ্ধি পায়। ২০২৪-২৫ৰ আগষ্টলৈ ৭৮.৮৯ লাখ টকাৰ ব্যয় নথিভুক্ত কৰা হৈছে।
সেয়েহে, চৰকাৰৰ মুঠ বিজ্ঞাপন ব্যয় আৰু মুখ্যমন্ত্ৰীৰ পৰিয়ালৰ মালিকানাধীন মিডিয়া গোটলৈ যোৱা বিজ্ঞাপনৰ ধন দুয়োটা বৃদ্ধি পোৱাটোৱে স্বাভাৱিকভাৱেই প্ৰশ্নৰ সৃষ্টি কৰিছে।
উল্লেখ্য যে মুখ্যমন্ত্ৰীৰ পত্নীৰ বিৰুদ্ধে আৰু কেতবোৰ বিস্ফোৰক অভিযোগ।
২০২৩ চনত প্ৰাইড ইষ্ট এণ্টাৰটেইনমেণ্টক প্ৰধানমন্ত্ৰী কিষাণ সম্পদা যোজনাৰ অধীনত ১০ কোটিৰ চাবচিডি অনুমোদন হোৱাৰ অভিযোগক কেন্দ্ৰ কৰি অসম ৰাজনীতিত তীব্ৰ বিতৰ্ক হৈছিল।
কংগ্ৰেছ সাংসদ গৌৰৱ গগৈয়ে প্ৰমাণসহকাৰে অভিযোগ কৰিছিল যে মুখ্যমন্ত্ৰীৰ পত্নীৰ সৈতে জড়িত কোম্পানীটোৱে খাদ্য-প্ৰক্ৰিয়াকৰণ প্ৰকল্পৰ বাবে ১০ কোটিৰ চাবচিডি লাভ কৰিছে। ইয়াৰ পিছতেই গৌৰৱ গগৈৰ বিৰুদ্ধে ১০ কোটি টকাৰ মানহানি গোচৰ তৰি আদালতৰ দাৰস্থ হৈছিল ৰিণিকি ভূঞা শৰ্মা।
কেৱল এয়াই নহয়, ২০২১ চনত ‘দ্য ৱায়াৰ’ আৰু ‘দ্য ক্ৰছকাৰেণ্ট’ৰ অনুসন্ধানত RBS Realtors Private Limited নামৰ এটা প্ৰতিষ্ঠানে প্ৰায় ১৮ একৰ চৰকাৰী মাটিৰ ক্ষেত্ৰত কেলেংকাৰী সংঘটিত কৰাৰ অভিযোগ উত্থাপন হৈছিল। উক্ত প্ৰতিষ্ঠানটো সহ-প্ৰতিষ্ঠাপক আছিল ৰিণিকি ভূঞা শৰ্মা। অনুসন্ধানটোত চৰকাৰী নথি আৰু ‘ধৰিত্ৰী’পৰ্টেলৰ তথ্যৰ উদ্ধৃতি দি কোৱা হৈছিল যে মাটিৰ এটা অংশ ভূমিহীন লোক আৰু প্ৰতিষ্ঠানৰ বাবে সংৰক্ষিত চিলিং চাৰপ্লাছ মাটি আছিল।
প্ৰতিবেদন অনুসৰি, ২০০৯ চনত প্ৰায় ৬.৯২ একৰ চিলিং চাৰপ্লাছ মাটি মূলতে চৰকাৰৰ পৰা লাভ কৰা লোকসকলৰ পৰা উক্ত প্ৰতিষ্ঠানটোৱে ক্ৰয় কৰিছিল আৰু কিছুমান ক্ষেত্ৰত চৰকাৰী অনুমোদন লাভৰ কেইমাহমানৰ ভিতৰতে মাটি বিক্ৰী হোৱা বুলি নথিৰ উদ্ধৃতি দিয়া হৈছিল।
এই অভিযোগৰ পিছত বিৰোধী দলসমূহে তদন্তৰ দাবী কৰিছিল। RBS Realtors-ৰ পৰৱৰ্তী নাম Vasistha Realtors হোৱা বুলিও অনুসন্ধানত উল্লেখ কৰা হৈছিল। যাৰ ফলত প্ৰতিষ্ঠানটোৰ ফালৰ পৰা ‘দ্য ৱায়াৰ’লৈ আইনী নোটিছো প্ৰেৰণ কৰা হৈছিল।
২০২৪ চনত ৰিণিকি ভূঞা শৰ্মাৰ সৈতে জড়িত আন এটা মাটি ক্ৰয়ক লৈ বিতৰ্কৰ সৃষ্টি হৈছিল।
মাজুলীত প্ৰায় ১৮ বিঘাৰো অধিক মাটি ক্ৰয়ৰ তথ্য প্ৰকাশ পাইছিল। প্ৰতিবেদন অনুসৰি, লেনদেন দুটা ২০২২ চনৰ মে’ আৰু ২০২৩ চনৰ জুনত হৈছিল। মাটি ক্ৰয়ৰ সৈতে Ekaa Estates LLP-ৰ নামো জড়িত আছিল, যিটো ৰিণিকি ভূঞা শৰ্মা আৰু তেওঁৰ পুত্ৰৰ সৈতে জড়িত বুলি সংবাদ মাধ্যমত প্ৰকাশ পাইছিল।
এনেদৰে না না অভিযোগ উত্থাপন হৈ আহিছে মুখ্যমন্ত্ৰীৰ পত্নী ৰিণিকি ভূঞা শৰ্মাৰ বিৰুদ্ধে। এতিয়া প্ৰশ্নটো হ’ল – মাটিৰ ক্ষেত্ৰত কি কেলেংকাৰী সংঘটিত কৰিছিল ৰিণিকি ভূঞা শৰ্মাই? মুখ্যমন্ত্ৰীৰ পত্নী হোৱাৰ পিছতো কিদৰে কৃষকৰ বাবে অহা ঋণৰ চাবচিটি লাভ কৰিলে তেওঁ? মাটি ক্ৰয়ৰ ক্ষেত্ৰত কি কেলেংকাৰী সংঘটিত কৰিছিল মুখ্যমন্ত্ৰীৰ পত্নীয়ে? এইবোৰ প্ৰশ্নৰ স্পষ্ট উত্তৰ বিচাৰিছে অসমৰ সচেতন ৰাইজে।
