বিদ্যালয়ৰ মাচুল বাঢ়িছে, কিন্তু নিয়মীয়াকৈ পাঠদানেই নহয়! এনে এক অভিযোগক কেন্দ্ৰ কৰি পাকিস্তানৰ ইছলামাবাদস্থিত ছাৰহাদ বিশ্ববিদ্যালয়ত সৃষ্টি হ’ল তীব্ৰ উত্তেজনা। ছাত্ৰ-ছাত্ৰীৰ প্ৰতিবাদৰ মাজতে এজন সেনা বিষয়াই বলপ্ৰয়োগ কৰাৰ লগতে শূন্যলৈ গুলীচালনা কৰাৰ অভিযোগ উত্থাপন হোৱাত ঘটনাই তীব্ৰ চাঞ্চল্যৰ সৃষ্টি কৰিছে।
ছাত্ৰ-ছাত্ৰীৰ অভিযোগ অনুসৰি, বিশ্ববিদ্যালয়ত বিভিন্ন ধৰণৰ মাচুল অত্যাধিক হাৰত বৃদ্ধি কৰা হৈছে। কিন্তু সেই অনুপাতে নিয়মীয়াকৈ পাঠদান অনুষ্ঠিত নহয়। এই বিষয়ত কৰ্তৃপক্ষক একাধিকবাৰ অৱগত কৰা সত্ত্বেও কোনো ধৰণৰ ফলপ্ৰসূ ব্যৱস্থা গ্ৰহণ নকৰাৰ অভিযোগ কৰিছে প্ৰতিবাদকাৰীসকলে। ফলত বহুদিন ধৰি জমা হৈ থকা ক্ষোভে সোমবাৰে প্ৰতিবাদৰ ৰূপ লয়।
শ্লোগান দি আৰু হাতত প্লেকাৰ্ড লৈ বিশ্ববিদ্যালয় চৌহদত প্ৰতিবাদ সাব্যস্ত কৰে ছাত্ৰ-ছাত্ৰীসকলে। পৰিস্থিতি শান্ত কৰিবলৈ বিশ্ববিদ্যালয়ৰ মুৰব্বী ড° আইনাই প্ৰতিবাদকাৰীৰ সৈতে কথা পাতিবলৈ চেষ্টা কৰে। কিন্তু অভিযোগ অনুসৰি, আন্দোলনকাৰীসকলে তেওঁৰ সৈতে আলোচনাত বহিবলৈ সন্মতি নিদিলে।
ইয়াৰ পাছতে ড° আইনাই তেওঁৰ স্বামীক ঘটনাস্থলীলৈ মাতি পঠিয়ায়। তেওঁ পাকিস্তান সেনাৰ এজন বিষয়া বুলি জানিব পৰা গৈছে। সেনা বিষয়াজন বিশ্ববিদ্যালয় চৌহদত উপস্থিত হোৱাৰ পাছতে পৰিস্থিতি অধিক উত্তপ্ত হৈ পৰে। অভিযোগ উঠিছে যে তেওঁ প্ৰতিবাদী ছাত্ৰ-ছাত্ৰীসকলক লাঠিৰে প্ৰহাৰ কৰি ছত্ৰভংগ কৰাৰ চেষ্টা কৰে।
ইতিমধ্যে ঘটনাৰ এটা ভিডিঅ’ সামাজিক মাধ্যমত ভাইৰেল হৈ পৰিছে। অৱশ্যে ভিডিঅ’টোৰ সত্যতা স্বতন্ত্ৰভাৱে নিশ্চিত হোৱা নাই। ভিডিঅ’টোত দেখা গৈছে বুলি দাবী কৰা অনুসৰি, সেনা বিষয়াজনে প্ৰতিবাদকাৰীক জোৰকৈ আঁতৰাই পঠিয়াইছে আৰু কেইবাজনো ছাত্ৰৰ চোলাত ধৰি টানি লৈ গৈছে।
ঘটনাৰ এক পৰ্যায়ত তেওঁ হাতত থকা পিস্তল উলিয়াই শূন্যলৈ গুলীচালনা কৰা বুলিও ভিডিঅ’টোত দেখা গৈছে। এই ঘটনাৰ পাছত বিশ্ববিদ্যালয় চৌহদত উত্তেজনা আৰু আতংক অধিক বৃদ্ধি পায়। মাচুল বৃদ্ধি, পাঠদান নোহোৱাৰ বিৰুদ্ধে হোৱা প্ৰতিবাদ দমনৰ নামত বলপ্ৰয়োগৰ অভিযোগে এতিয়া পাকিস্তানত এই ঘটনাক লৈ নতুন বিতৰ্কৰ সূচনা কৰিছে।
