নেপাল-তিব্বত সীমান্তৱৰ্তী ৰাছুৱা জিলাত বুধবাৰে পুৱাই বানপানীয়ে ভয়ংকৰ ৰূপ ধাৰণ কৰে। পুৱা প্ৰায় ৯ বজাত অকস্মাতে কোশী নদীৰ পানী বাঢ়ি আহে। অতি প্ৰবল জলসোঁতে নদীৰ কাষৰ কেইবাখনো গাঁও, ঘৰ-দুৱাৰ, দলং আৰু বিভিন্ন নিৰ্মাণ প্ৰকল্প উটুৱাই নিয়ে। প্ৰাথমিক খবৰ অনুসৰি, প্ৰায় ১০০০ লোক এই বানত উটি গৈ সন্ধানহীন হৈ থকা বুলি আশংকা কৰা হৈছে। অৱশ্যে এই সংখ্যা চৰকাৰীভাৱে এতিয়াও নিশ্চিত হোৱা নাই।
ৰাছুৱা জিলাৰ চ্যাব্ৰুবেছী আৰু টিমুৰে এলেকা এই প্ৰাকৃতিক দুৰ্যোগত আটাইতকৈ বেছি ক্ষতিগ্ৰস্ত হোৱা বুলি জানিব পৰা গৈছে। পাহাৰীয়া অঞ্চলটোত হঠাৎ বৃদ্ধি পোৱা জলসোঁতে বহু ঘৰ-বাৰী আৰু পথ-দলং ক্ষতিগ্ৰস্ত কৰাৰ লগতে কেইবাখনো গাঁৱৰ যোগাযোগ ব্যৱস্থা বিচ্ছিন্ন কৰি পেলাইছে। পৰিস্থিতি অধিক ভয়ংকৰ হৈ পৰাৰ আশংকাত নদীৰ কাষত বাস কৰা লোকসকলক ততাতৈয়াকৈ নিৰাপদ আৰু ওখ ঠাইলৈ আঁতৰি যাবলৈ প্ৰশাসনে নিৰ্দেশ দিছে।
নেপালৰ প্ৰশাসন আৰু আৰক্ষীৰ প্ৰাথমিক তথ্য অনুসৰি, তিব্বতৰ ফালৰ পৰা কোশী নদীলৈ অকস্মাতে পানীৰ সোঁত বৃদ্ধি পোৱাটোৱেই এই বানৰ মূল কাৰণ বুলি সন্দেহ কৰা হৈছে। অতি কম সময়ৰ ভিতৰতে নদীৰ জলস্তৰ বৃদ্ধি পোৱাত নামনিৰ অঞ্চলসমূহলৈ তীব্ৰ বেগেৰে পানী সোমাই পৰে। এই পানীৰ প্ৰভাৱ ত্ৰিশূলী নদীৰ অৱবাহিকালৈও বিয়পি পৰিব পাৰে বুলি আশংকা কৰা হৈছে।
ইতিমধ্যে নুৱাকোট, ধাডিং, চিতৱান আৰু গোৰখাকে ধৰি ত্ৰিশূলী নদীৰ অৱবাহিকাৰ কেইবাখনো জিলাত সতৰ্কতা জাৰি কৰা হৈছে। নদীৰ ওচৰলৈ নোযোৱাকৈ সকলোকে সুৰক্ষিত স্থানত থাকিবলৈ প্ৰশাসনে আহ্বান জনাইছে। নতুনকৈ পানীৰ পৰিমাণ বৃদ্ধি পালে পৰিস্থিতিয়ে আৰু অধিক ভয়ংকৰ ৰূপ ল’ব পাৰে বুলি আশংকা কৰা হৈছে।
দুৰ্যোগপীড়িত অঞ্চলসমূহত ইতিমধ্যে উদ্ধাৰ আৰু সাহায্য অভিযান আৰম্ভ কৰা হৈছে। অতি তীব্ৰ জলসোঁতত বহু লোক উটি যোৱাৰ আশংকাত উদ্ধাৰকাৰী দলসমূহে সন্ধান চলাই আছে। কিন্তু পাহাৰীয়া এলেকাৰ দুৰ্গম পথ, ক্ষতিগ্ৰস্ত দলং আৰু বিচ্ছিন্ন যোগাযোগ ব্যৱস্থাই উদ্ধাৰ অভিযানত বাধাৰ সৃষ্টি কৰিছে। ফলত সন্ধানহীন লোকসকলৰ বিষয়ে নিশ্চিত তথ্য লাভ কৰিবলৈ কিছু সময় লাগিব পাৰে।
প্ৰায় ১০০০ লোক পানীত উটি যোৱা বুলি প্ৰকাশ পোৱা তথ্য এতিয়াও চৰকাৰীভাৱে নিশ্চিত হোৱা নাই। উদ্ধাৰকাৰী দল অধিক ক্ষতিগ্ৰস্ত অঞ্চলসমূহত উপস্থিত হোৱাৰ পাছতহে প্ৰকৃত ক্ষয়ক্ষতি আৰু সন্ধানহীন লোকৰ সংখ্যা সম্পৰ্কে স্পষ্ট তথ্য পোহৰলৈ আহিব।
