উত্তৰাখণ্ডৰ হালদোৱানীত কংগ্ৰেছ সভাপতি মল্লিকার্জুন খাৰ্গেৰ সভাস্থলীত ‘শুদ্ধিকৰণ’ অনুষ্ঠান অনুষ্ঠিত কৰাৰ অভিযোগক লৈ দেশজুৰি তীব্ৰ প্ৰতিক্ৰিয়া সৃষ্টি হৈছে। এই ঘটনাক লৈ লোকসভাৰ বিৰোধী দলপতি ৰাহুল গান্ধীয়ে বিজেপি আৰু আৰএছএছক তীব্ৰ সমালোচনা কৰি ইয়াক দলিত সমাজৰ প্ৰতি বৈষম্যৰ প্ৰতীক বুলি অভিহিত কৰিছে। শনিবাৰে দিল্লীৰ ইন্দিৰা ভৱনত অনুষ্ঠিত এক সংবাদমেলত ৰাহুল গান্ধীয়ে ঘটনাটোৰ উল্লেখ কৰি ইয়াৰ সৈতে জড়িত লোকসকলৰ বিৰুদ্ধে অনুসূচিত জাতি আৰু অনুসূচিত জনজাতিৰ ওপৰত অত্যাচাৰ প্ৰতিৰোধ আইনৰ অধীনত তাৎক্ষণিকভাৱে গোচৰ ৰুজু কৰাৰ দাবী জনায়।
যোৱা ৮ আগষ্টত হালদোৱানীৰ ৰামলীলা ময়দানত কংগ্ৰেছৰ এক বৃহৎ সভা অনুষ্ঠিত হৈছিল। সভাখনত মুখ্য বক্তা হিচাপে উপস্থিত আছিল কংগ্ৰেছৰ সৰ্বভাৰতীয় সভাপতি মল্লিকার্জুন খাৰ্গে। কংগ্ৰেছৰ অভিযোগ অনুসৰি, সভা শেষ হোৱাৰ পাছত শ্ৰীৰাম সেনাৰ নামত একাংশ লোকে ময়দানত তথাকথিত ‘শুদ্ধিকৰণ’ পূজা অনুষ্ঠিত কৰে। উত্তৰাখণ্ড কংগ্ৰেছৰ সভাপতি গণেশ গোদিয়ালে এই ঘটনাৰ অভিযোগ উত্থাপন কৰি খাৰ্গে দলিত সম্প্ৰদায়ৰ লোক হোৱাৰ বাবেই এনে পদক্ষেপ গ্ৰহণ কৰা হৈছে বুলি দাবী কৰে।
ঘটনাটোক কেৱল খাৰ্গেৰ প্ৰতি অপমান হিচাপে নাচাই সমগ্ৰ দলিত সমাজৰ প্ৰতি বৈষম্যমূলক মানসিকতাৰ প্ৰকাশ হিচাপে গণ্য কৰিছে ৰাহুল গান্ধীয়ে। তেওঁৰ মতে, ‘শুদ্ধিকৰণ’ৰ নামত কোনো ব্যক্তিৰ উপস্থিতিৰ পিছত ঠাই শুদ্ধি কৰাৰ চেষ্টা কৰাটো মূলতঃ অস্পৃশ্যতাৰ এক নতুন ৰূপ। সংবিধানে অস্পৃশ্যতা নিষিদ্ধ কৰাৰ পাছতো এনে ঘটনা সংঘটিত হোৱাক লৈ তেওঁ গভীৰ উদ্বেগ প্ৰকাশ কৰে।
ৰাহুল গান্ধীয়ে অভিযোগ কৰে যে দেশৰ বহু ঠাইত আজিও দলিত শিশুৰ বিৰুদ্ধে বৈষম্যৰ ঘটনা দেখা যায়। বিদ্যালয়ত দলিত শিশুক শৌচাগাৰ পৰিষ্কাৰ কৰোৱা, ঝাড়ু দিবলৈ বাধ্য কৰোৱা অথবা চাহৰ দোকানত পৃথক কাপত চাহ দিয়াৰ দৰে ঘটনা এতিয়াও সম্পূৰ্ণৰূপে শেষ হোৱা নাই বুলি তেওঁ দাবী কৰে। তেওঁৰ বক্তব্য অনুসৰি, যেতিয়া মল্লিকার্জুন খাৰ্গেৰ দৰে এগৰাকী জ্যেষ্ঠ আৰু দেশৰ প্ৰথমশাৰীৰ নেতাৰ ক্ষেত্ৰতো এনে আচৰণৰ অভিযোগ উঠিব পাৰে, তেন্তে দূৰৱৰ্তী গাঁৱত থকা দলিত শিশুৰ অৱস্থা কিমান কঠিন হ’ব পাৰে, সেয়া অনুমান কৰিব পাৰি।
দেশত বৰ্তমান দুটা পৃথক চিন্তাধাৰাৰ মাজত সংঘাত চলি আছে বুলিও মন্তব্য কৰে ৰাহুল গান্ধীয়ে। তেওঁৰ মতে, এফালে আছে ড০ বি আৰ আম্বেদকৰ, মহাত্মা গান্ধী, জৱাহৰলাল নেহৰু আৰু চৰ্দাৰ পেটেলৰ আদৰ্শৰ ওপৰত গঢ় লৈ উঠা ভাৰতীয় সংবিধান, আনফালে আছে বিজেপি আৰু আৰএছএছৰ বিভাজন সৃষ্টিকাৰী চিন্তাধাৰা। তেওঁ এই ঘটনাৰ সৈতে জড়িত লোকসকলৰ বিৰুদ্ধে আইন অনুসৰি ব্যৱস্থা গ্ৰহণ নকৰিলে কংগ্ৰেছে নীৰৱ হৈ নাথাকিব বুলি উত্তৰাখণ্ড চৰকাৰ আৰু কেন্দ্ৰীয় চৰকাৰক সকীয়াই দিয়ে।
ইয়াৰ লগতে উত্তৰাখণ্ড বিজেপিৰ ৰাজ্যিক সভাপতিগৰাকীৰ ভূমিকাক লৈও প্ৰশ্ন উত্থাপন কৰে ৰাহুল গান্ধীয়ে। তেওঁৰ বক্তব্যত ঘটনাটোৰ তদন্ত আৰু দোষীৰ বিৰুদ্ধে ব্যৱস্থা গ্ৰহণৰ দাবীক অধিক জোৰ দিয়া হয়।
উল্লেখযোগ্য যে চলিত মাহৰ আৰম্ভণিতে ৰাজ্যসভাত নিজেই এই বিষয়টো উত্থাপন কৰিছিল মল্লিকার্জুন খাৰ্গে। সেই সময়ত বিজেপিৰ জ্যেষ্ঠ নেতা তথা ৰাজ্যসভাৰ নেতা জে পি নাড্ডাই বিজেপিয়ে এনে কোনো কাৰ্যক সমৰ্থন নকৰে বুলি স্পষ্ট কৰি বিষয়টো তদন্ত কৰাৰ কথা জনাইছিল। কিন্তু তাৰ পিছতো ব্যৱস্থা নোলোৱাৰ অভিযোগ উত্থাপিত হোৱাৰ পাছত পুনৰ সৰৱ হৈ পৰিছে ৰাহুল গান্ধী। ঘটনাটোৱে এতিয়া জাতিগত বৈষম্য, সংবিধানৰ মূল্যবোধ আৰু দেশৰ সামাজিক সমতাৰ প্ৰশ্নক পুনৰ ৰাজনৈতিক আলোচনাৰ কেন্দ্ৰলৈ আনিছে।
