শিক্ষক দিৱসৰ বিশেষ দিনটোত ৰাজ্যৰ ১৫ গৰাকী শিক্ষকক সন্মান জনাব অসম চৰকাৰে। ৰাজ্যৰ বিদ্যালয় শিক্ষা ক্ষেত্ৰলৈ আগবঢ়োৱা উল্লেখযোগ্য অৱদানৰ স্বীকৃতি হিচাপে ১৪খন জিলাৰ এই শিক্ষকসকলক ৰাজ্যিক শিক্ষক বঁটা ২০২৬ প্ৰদান কৰা হ’ব।
গুৱাহাটীৰ শ্ৰী শ্ৰী দামোদৰদেৱ আন্তঃৰাষ্ট্ৰীয় প্ৰেক্ষাগৃহত আজি অনুষ্ঠিত হ’ব এই বঁটা প্ৰদান অনুষ্ঠান। এই অনুষ্ঠানৰ জৰিয়তে ৬৫সংখ্যক শিক্ষক দিৱস উদযাপন কৰা হ’ব। মাধ্যমিক আৰু প্ৰাথমিক শিক্ষাৰ বিভিন্ন শিক্ষানুষ্ঠানত সেৱা আগবঢ়াই অহা অধ্যক্ষ, স্নাতকোত্তৰ শিক্ষক, সহকাৰী শিক্ষক, প্ৰধান শিক্ষকসহ বিভিন্ন পৰ্যায়ৰ শিক্ষকক এই বঁটাৰ বাবে নিৰ্বাচন কৰা হৈছে।
ৰাজ্যিক পৰ্যায়ৰ বাছনি সমিতিৰ পৰামৰ্শৰ ভিত্তিত শিক্ষকসকলক নিৰ্বাচন কৰাৰ পাছত ৰাজ্য চৰকাৰে সেই তালিকাত অনুমোদন জনায়। অসম মাধ্যমিক শিক্ষা সঞ্চালকালয়ে বঁটা লাভ কৰা শিক্ষকসকলৰ তালিকা প্ৰকাশ কৰিছে। ইয়াৰে নজন শিক্ষক মাধ্যমিক শিক্ষা শাখাৰ আৰু ছয়জন শিক্ষক প্ৰাথমিক শিক্ষা শাখাৰ পৰা নিৰ্বাচিত হৈছে।
মাধ্যমিক শিক্ষা শাখাত বঁটা লাভ কৰা শিক্ষকসকলৰ ভিতৰত আছে যোৰহাটৰ মালৌ আলি উচ্চতৰ মাধ্যমিক বিদ্যালয়ৰ অধ্যক্ষ শ্যামলীমা বৰা, কামৰূপ মহানগৰৰ কামাখ্যা উচ্চ বিদ্যালয়ৰ সহকাৰী শিক্ষক বিজন ৰয় ভৌমিক, নলবাৰীৰ চৰকাৰী গৰ্ডন উচ্চতৰ মাধ্যমিক বিদ্যালয়ৰ স্নাতকোত্তৰ শিক্ষক মানৱ ভৰালী, ডিব্ৰুগড়ৰ পি এম শ্ৰী ৰহমৰীয়া উচ্চতৰ মাধ্যমিক বিদ্যালয়ৰ স্নাতকোত্তৰ শিক্ষক ৰিজু কুমাৰ চুতীয়া আৰু শোণিতপুৰৰ তেজপুৰ চৰকাৰী উচ্চতৰ মাধ্যমিক বিদ্যালয়ৰ স্নাতকোত্তৰ শিক্ষক প্ৰবীণ কোঁচ।
ইয়াৰ লগতে বৰপেটাৰ পি এম শ্ৰী ভেল্লা উচ্চতৰ মাধ্যমিক বিদ্যালয়ৰ অধ্যক্ষ ৰণেন্দ্ৰ কুমাৰ দাস, ধুবুৰীৰ পি এম শ্ৰী জামাদাৰহাট জনতা উচ্চতৰ মাধ্যমিক বিদ্যালয়ৰ স্নাতকোত্তৰ শিক্ষক আজিজুৰ ৰহমান, নগাঁৱৰ বৰাপূজীয়া উচ্চতৰ মাধ্যমিক বিদ্যালয়ৰ সহকাৰী শিক্ষক মানিক চন্দ্ৰ নাথ আৰু কোকৰাঝাৰৰ হৰিণাগুৰি উচ্চ বিদ্যালয়ৰ সহকাৰী শিক্ষক বিবি প্ৰসাদ ব্ৰহ্মাও ৰাজ্যিক শিক্ষক বঁটাৰ বাবে নিৰ্বাচিত হৈছে।
উল্লেখযোগ্য যে ডিব্ৰুগড় জিলাৰ পৰা দুগৰাকী শিক্ষকক এই সন্মানৰ বাবে বাছনি কৰা হৈছে। আনহাতে বাকী ১৩খন জিলাৰ পৰা এগৰাকীকৈ শিক্ষকক বঁটাৰ বাবে নিৰ্বাচন কৰা হৈছে। ৰাজ্যৰ বিভিন্ন প্ৰান্তত বিদ্যালয় শিক্ষাৰ সৈতে জড়িত হৈ নিষ্ঠা আৰু দায়িত্ববোধেৰে সেৱা আগবঢ়াই অহা শিক্ষকসকলৰ অৱদানক সন্মান জনোৱাৰ বাবেই এই বঁটা প্ৰদান কৰা হৈছে।
শিক্ষক হৈছে সমাজ গঢ়াৰ অন্যতম মূল কাৰিকৰ। শিক্ষাৰ পোহৰেৰে ছাত্ৰ-ছাত্ৰীৰ ভৱিষ্যৎ গঢ়ি তোলা এই শিক্ষকসকলক শিক্ষক দিৱসৰ দিনা ৰাজ্যিক সন্মানেৰে সন্মানিত কৰাৰ সিদ্ধান্তই বিদ্যালয় শিক্ষাৰ ক্ষেত্ৰত তেওঁলোকৰ নিষ্ঠা আৰু অৱদানৰ প্ৰতি এক বিশেষ স্বীকৃতি কঢ়িয়াই আনিছে।
