জম্মু-কাশ্মীৰৰ ডোডাস্থিত গুজ্জৰ-বকৰৱাল ছাত্ৰী নিৱাসৰ আৱাসীসকলে ৱাৰ্ডেনৰ বিৰুদ্ধে মানসিক, শাৰীৰিক নিৰ্যাতন আৰু ভয়ংকৰ দুৰ্ব্যৱহাৰৰ গুৰুতৰ অভিযোগ উত্থাপন কৰিছে। প্ৰাপ্ত তথ্য অনুসৰি, বিগত দুবছৰ ধৰি অনুসূচিত জনজাতিৰ এই ছাত্ৰীসকলে অকথ্য নিৰ্যাতনৰ বলি হৈ আহিছিল, যাৰ ফলস্বৰূপে শেহতীয়াকৈ ২৫ গৰাকী ছাত্ৰী অচেতন হৈ চিকিৎসালয়ত ভৰ্তি হ’বলগীয়া হৈছে।
৪ ছেপ্টেম্বৰ শুকুৰবাৰে, ছাত্ৰীসকলে হোষ্টেলৰ সন্মুখত এক তীব্ৰ প্ৰতিবাদ সাব্যস্ত কৰে। তেওঁলোকৰ অভিযোগ অনুসৰি, হোষ্টেলত খোৱা-বোৱা, পৰিষ্কাৰ-পৰিচ্ছন্নতা আৰু পোহৰৰ কোনো সু-ব্যৱস্থা নাই। চৰকাৰৰ ফালৰ পৰা আৱণ্টন হোৱা সা-সুবিধাসমূহৰ পৰাও তেওঁলোকক বঞ্চিত কৰি ৰখা হৈছে।
ছাত্ৰীসকলে সংবাদ মাধ্যমৰ আগত জনোৱা মতে, ৱাৰ্ডেনগৰাকীয়ে তেওঁলোকক নিজৰ ঘৰৰ কাপোৰ ধোৱা, ৰন্ধা-বঢ়া আদি কাম কৰিবলৈ বাধ্য কৰাইছিল। এগৰাকী ছাত্ৰীয়ে এক চাঞ্চল্যকৰ অভিযোগ উত্থাপন কৰি কয়, “ৱাৰ্ডেনে আমাক তেওঁৰ সন্মুখতে কাপোৰ সলাবলৈ বাধ্য কৰায়। এদিন এগৰাকী ছাত্ৰীয়ে কাপোৰ সলাই থাকোঁতে তেওঁ মোবাইলত ফটো তুলি ‘ডিচি অফিচ’ৰ কোনোবা ব্যক্তিলৈ পঠিওৱা বুলি ভাবুকি দিছিল। ইয়াৰ প্ৰতিবাদ কৰাত ৱাৰ্ডেনগৰাকীয়ে অশ্লীল গালি-গালাজ পাৰে।” এনে অত্যাচাৰ সহ্য কৰিব নোৱাৰি ইতিমধ্যে বহু ছাত্ৰীয়ে হোষ্টেল এৰিবলৈ বাধ্য হৈছে।
বৰ্তমান হোষ্টেলটোত চেনাব উপত্যকাৰ বিভিন্ন স্থানৰ পৰা অহা প্ৰায় ১০৮ গৰাকী ছাত্ৰীয়ে আশ্ৰয় লৈ আছে। ছাত্ৰীসকলৰ অভিযোগ, চৰকাৰী সা-সুবিধা লাভ কৰা বুলি ভুৱা নথিপত্ৰত তেওঁলোকৰ পৰা বলপূৰ্বক স্বাক্ষৰ গ্ৰহণ কৰা হৈছিল। প্ৰতিবাদৰ উকমুকনি উঠাৰ পিছতেই যোৱা ২৬ আগষ্টত ৱাৰ্ডেনৰ বিৰুদ্ধে আৰক্ষীত এজাহাৰ দাখিল কৰা হৈছিল আৰু তেওঁক বৰ্তমান নিলম্বন কৰা হৈছে।
ইফালে, ছাত্ৰীসকল মানসিকভাৱে ইমানেই ভাগি পৰিছে যে বহুতে ‘এংজাইটি এটেক’ৰ সন্মুখীন হৈছে। সমাজকৰ্মী ইক্ৰা চৌধুৰীয়ে জনোৱা মতে, তেওঁলোকৰ উপস্থিতিতেই এগৰাকী ছাত্ৰী অচেতন হৈ বাগৰি পৰে। বিজেপিৰ বিধায়ক শক্তি ৰাজ পৰিহাৰেও এই ঘটনাক লৈ গভীৰ উদ্বেগ প্ৰকাশ কৰি জনজাতীয় পৰিক্ৰমা মন্ত্ৰী জাভেদ ৰাণাক তাৎক্ষণিক তদন্তৰ দাবী জনাইছে।
পৰিস্থিতিৰ গুৰুত্ব উপলব্ধি কৰি ডোডাৰ উপায়ুক্ত কৃষ্ণ লাল, জ্যেষ্ঠ আৰক্ষী অধীক্ষক কাৰ্তিক শ্ৰোত্ৰিয়া আৰু অন্যান্য বিষয়াসকল হোষ্টেলত উপস্থিত হৈ ছাত্ৰীসকলৰ সৈতে মত বিনিময় কৰে। উপায়ুক্তগৰাকীয়ে জনোৱা মতে, সমগ্ৰ ঘটনাৰ তদন্তৰ বাবে অতিৰিক্ত উপায়ুক্তৰ অধ্যক্ষতাত এখন সমিতি গঠন কৰা হৈছে। সমিতিখনে হোষ্টেলৰ সামগ্ৰিক পৰিচালনা, নথিপত্ৰ আদি পৰীক্ষা কৰি শীঘ্ৰেই প্ৰতিবেদন দাখিল কৰিব। দোষী সাব্যস্ত হ’লে জড়িত বিষয়া বা কৰ্মচাৰীৰ বিৰুদ্ধে কঠোৰ আইনী ব্যৱস্থা গ্ৰহণ কৰা হ’ব বুলিও প্ৰশাসনে স্পষ্ট কৰি দিছে।
