গাঁও আৰু চহৰৰ মাজত বাঢ়িছে মজুৰিৰ বৈষম্য: মূল্যবৃদ্ধিয়ে কোঙা কৰিছে গ্ৰাম্য অৰ্থনীতিক

অত্যাধিক মূল্যবৃদ্ধি আৰু বতৰৰ প্ৰতিকূলতাই দেশৰ গ্ৰাম্য অৰ্থনীতিলৈ নমাই আনিছে চৰম দুৰ্দিন। বৰষুণৰ অভাৱত খাৰিফ শস্যৰ খেতি পিছুৱাই যোৱাৰ বাবেই এপ্ৰিলৰ পৰা জুলাইৰ ভিতৰত গাঁৱৰ শ্ৰমিকৰ আয় ৮.৯ শতাংশ হ্ৰাস পায়। একে সময়তে চহৰৰ শ্ৰমিকৰ মজুৰি সামান্য বাঢ়িছে যদিও, কেৱল জুলাই মাহতে সামগ্ৰিকভাৱে সমগ্ৰ দেশৰ শ্ৰমিকৰ মজুৰি ১.৫ শতাংশ হ্ৰাস পোৱাটো এক গভীৰ উদ্বেগৰ কাৰণ হৈ পৰিছে

‘ফাইনেঞ্চিয়েল এক্সপ্ৰেছ’ত প্ৰকাশিত প্ৰতিবেদন অনুসৰি, চেণ্টাৰ ফৰ মণিটৰিং ইণ্ডিয়ান ইকনমিৰ (CMIE) তথ্যই উদঙাই দিছে যে এই পৰিস্থিতিয়ে গাঁও আৰু চহৰৰ শ্ৰমিকৰ মাজত থকা মজুৰিৰ বৈষম্য অধিক বৃদ্ধি কৰিছে। ২০২৫ চনৰ জুলাই মাহৰ পাছত এয়া হৈছে মজুৰি হ্ৰাস পোৱাৰ পঞ্চমটো ঘটনা আৰু যোৱা তিনি বছৰৰ ভিতৰত বিগত তিনি মাহৰ এই অৱস্থা আটাইতকৈ শোচনীয়।

মজুৰি আৰু মূল্যবৃদ্ধিৰ তুলনাত্মক তথ্য (এপ্ৰিল – জুলাই):

চেণ্টাৰ ফৰ মণিটৰিং ইণ্ডিয়ান ইকনমিৰ পৰিচালন সঞ্চালক তথা মুখ্য কাৰ্যবাহী বিষয়া মহেশ ব্যাসে এক টোকাত জানিবলৈ দিয়া মতে, আয়ৰ ওপৰত পূৰ্বৰে পৰা থকা মূল্যবৃদ্ধিৰ বোজাৰ সমান্তৰালভাৱে এই সময়ছোৱাত গ্ৰাম্যাঞ্চলত গ্ৰাহক মূল্যসূচক ২.৯ শতাংশলৈ বৃদ্ধি পাইছে, যিটো একে সময়তে চহৰাঞ্চলত হোৱা মূল্যবৃদ্ধিতকৈ (২.৪%) অধিক।

দুয়োটা অঞ্চলৰ মজুৰিৰ এই বিপৰীতমুখী গতিৰ বাবেই বৈষম্যৰ ব্যৱধান যথেষ্ট বাঢ়ি গৈছে। ব্যাসৰ বিশ্লেষণ অনুসৰি, পূৰ্বতে চহৰৰ শ্ৰমিকৰ মজুৰিৰ তুলনাত গ্ৰাম্য শ্ৰমিকৰ মজুৰি ৬৬ শতাংশ আছিল যদিও বৰ্তমান সেয়া মাত্ৰ ৬২ শতাংশলৈ অৱনমিত হৈছে। দেশৰ সামগ্ৰিক শ্ৰমিক বজাৰৰ বাবে ই এক গভীৰ উদ্বেগৰ বিষয় হিচাপে বিবেচিত হৈছে।