জাৰ্মানীৰ ছাক্সনি-আনহাল্ট প্ৰদেশৰ শেহতীয়া নিৰ্বাচনত চৰম সোঁপন্থী ৰাজনৈতিক দল ‘অল্টাৰনেটিভ ফ্যুৰ ডয়চলণ্ড’ (Alternative für Deutschland)-য়ে প্ৰায় ৪৪ শতাংশ ভোট লাভ কৰি বৃহৎ জয় সাব্যস্ত কৰাটোৱে দেশখনৰ ৰাজনীতিত এক গুৰুত্বপূৰ্ণ পৰিৱৰ্তনৰ ইংগিত দিছে। দলটোৱে ৮৩খন আসনৰ ভিতৰত ৩৯খন আসন লাভ কৰিছে যদিও চৰকাৰ গঠনৰ বাবে প্ৰয়োজনীয় ৪২খন আসনৰ সংখ্যাগৰিষ্ঠতা লাভ কৰিব পৰা নাই। ফলত এএফডিয়ে এককভাৱে চৰকাৰ গঠন কৰিব নোৱাৰিলেও, দ্বিতীয় বিশ্বযুদ্ধৰ পাছত জাৰ্মানীৰ এখন ৰাজ্যত চৰম সোঁপন্থী দলটোৰ এনে শক্তিশালী নিৰ্বাচনী প্ৰদৰ্শনে দেশখনৰ ৰাজনৈতিক পৰিৱেশত নতুন প্ৰশ্ন উত্থাপন কৰিছে।
এই ফলাফল কেৱল এখন ৰাজ্যৰ নিৰ্বাচনী ফলাফল হিচাপে সীমাবদ্ধ নহয়। ইউৰোপৰ বিভিন্ন দেশত চৰম সোঁপন্থী আৰু জাতীয়তাবাদী দলসমূহৰ ক্ৰমৱৰ্ধমান সমৰ্থনৰ মাজত জাৰ্মানীৰ এই ফলাফলক বৃহত্তৰ ৰাজনৈতিক প্ৰৱণতাৰ অংশ হিচাপে দেখা হৈছে। বিগত বৰ্ষমূহত ইউৰোপৰ বহু দেশত এই দলসমূহে ভোটৰ অংশ বৃদ্ধি কৰিবলৈ সক্ষম হৈছে। ফলত গণতান্ত্ৰিক আৰু মূলসুঁতিৰ ৰাজনৈতিক দলসমূহে তেওঁলোকৰ সৈতে কেনেদৰে মোকাবিলা কৰিব, সেই প্ৰশ্নটো ক্ৰমশঃ অধিক গুৰুত্বপূৰ্ণ হৈ পৰিছে।
জাৰ্মানীৰ ৰাজনীতিত এএফডিৰ সৈতে সহযোগিতা নকৰাৰ নীতি ‘ব্ৰেণ্ডমাউৰ’ বা ৰাজনৈতিক ফায়াৰৱাল হিচাপে পৰিচিত। এতিয়ালৈকে মূলসুঁতিৰ দলসমূহে এই নীতি বজাই ৰাখিবলৈ চেষ্টা কৰিছে যদিও এএফডিৰ নিৰ্বাচনী সমৰ্থন বৃদ্ধি পোৱাৰ লগে লগে এই ফায়াৰৱাল কিমান দিনলৈ কাৰ্যকৰী হৈ থাকিব, তাক লৈ তীব্ৰ বিতৰ্কৰ সূত্ৰপাত হৈছে। এএফডিয়ে ইতিমধ্যে মূলসুঁতিৰ ৰক্ষণশীল দলসমূহৰ ভিতৰত থকা অসন্তুষ্টি আৰু মতভেদক নিজৰ ৰাজনৈতিক প্ৰভাৱ বৃদ্ধিৰ বাবে ব্যৱহাৰ কৰাৰ চেষ্টা চলাইছে।
ইউৰোপৰ আন দেশসমূহৰ অভিজ্ঞতাইও জাৰ্মানীৰ বাবে এই প্ৰশ্নটো অধিক জটিল কৰি তুলিছে। ইটালীত ‘ব্ৰাদাৰ্ছ অৱ ইটালী’ (Brothers of Italy) নেতৃত্বাধীন চৰকাৰ ক্ষমতাত আছে আৰু ছুইডেনত ‘চুইডেন ডেম’ক্ৰেটছ’ৰ (Sweden Democrats) সমৰ্থনেৰে কেন্দ্ৰীয়-সোঁ পন্থী চৰকাৰে ক্ষমতা ধৰি ৰাখিছে। এই পৰিৱৰ্তনসমূহে ইউৰোপীয় ৰাজনীতিত চৰম সোঁপন্থী দলসমূহৰ সৈতে মূলসুঁতিৰ দলসমূহৰ সম্পৰ্কৰ ধৰণ সলনি হৈ অহাৰ ইংগিত দিছে।
ইফালে, চৰম সোঁপন্থী দলসমূহক চৰকাৰৰ পৰা আঁতৰাই ৰখাৰ উদ্দেশ্যে গঠন কৰা অস্থিৰ মিত্ৰজোঁটসমূহেও সমস্যাৰ সৃষ্টি কৰিছে। জনসাধাৰণৰ দৈনন্দিন জীৱনৰ সৈতে জড়িত অৰ্থনৈতিক সমস্যা, বাসস্থানৰ সংকট, প্ৰব্ৰজন, অপৰাধ, সামাজিক সুৰক্ষা আৰু জীৱন-যাপনৰ ব্যয় আদি বিষয়ত চৰকাৰসমূহে আশানুৰূপ ফলাফল দিব নোৱাৰিলে ভোটাৰ অসন্তুষ্টি বৃদ্ধি পোৱাৰ সম্ভাৱনা থাকে। এই অসন্তুষ্টিকেই চৰম সোঁপন্থী দলসমূহে নিজৰ পক্ষে ব্যৱহাৰ কৰাৰ সুযোগ লাভ কৰে।
ইউৰোপীয় চৰম সোঁপন্থী ৰাজনীতিৰ অন্যতম বিশিষ্ট বিশ্লেষক কাছ মুডেৰ (Cas Mudde) মতে, কেৱল ভয়ৰ ৰাজনীতি বা কোনো দলক নিষিদ্ধ কৰাৰ দাবীৰে এই প্ৰৱণতাক মোকাবিলা কৰাটো যথেষ্ট নহয়। মূলসুঁতিৰ গণতান্ত্ৰিক দলসমূহে ভোটাৰক কেৱল ‘কম ক্ষতিকাৰক বিকল্প’ হিচাপে নিজৰ ফালে টানি অনাৰ কৌশলৰ সলনি জনসাধাৰণৰ বাস্তৱ সমস্যাৰ ওপৰত অধিক বিশ্বাসযোগ্য ৰাজনৈতিক কাৰ্যসূচী আগবঢ়াব লাগিব।
অপৰাধ আৰু প্ৰব্ৰজনৰ দৰে বিষয়ত স্পষ্ট নীতি গ্ৰহণ কৰাৰ লগতে বাসস্থানৰ যোগান বৃদ্ধি, অৰ্থনৈতিক বৈষম্য হ্ৰাস, জলবায়ু পৰিৱৰ্তনৰ মোকাবিলা আৰু ইউৰোপীয় সহযোগিতা শক্তিশালী কৰাৰ দৰে বিষয়তো বাস্তৱসন্মত আৰু ফলপ্ৰসূ নীতি আগবঢ়োৱাটো মূলসুঁতিৰ দলসমূহৰ বাবে গুৰুত্বপূৰ্ণ হৈ পৰিছে। কেৱল এএফডিৰ বিৰুদ্ধে সতৰ্কবাণী জাৰি কৰাৰ সলনি ভোটাৰ কিয় সেই দলটোৰ প্ৰতি আকৰ্ষিত হৈছে, সেই প্ৰশ্নৰ উত্তৰ বিচৰাটো অধিক ফলপ্ৰসূ কৌশল হ’ব পাৰে।
এই পৰিপ্ৰেক্ষিতত আগন্তুক নিৰ্বাচনসমূহ বিশেষ গুৰুত্বপূৰ্ণ। ২০ ছেপ্টেম্বৰত জাৰ্মানীৰ মেকলেনবাৰ্গ-ভৰ্পোমাৰ্ণ আৰু বাৰ্লিনত অনুষ্ঠিত হ’বলগীয়া নিৰ্বাচনে দেশখনত এএফডিৰ সমৰ্থনৰ গতি সম্পৰ্কে নতুন ইংগিত দিব পাৰে। তাৰ পাছত ২০২৭ চনৰ ফ্ৰান্সৰ ৰাষ্ট্ৰপতি নিৰ্বাচনো ইউৰোপীয় ৰাজনীতিত চৰম সোঁপন্থী শক্তিৰ প্ৰভাৱৰ বাবে এক গুৰুত্বপূৰ্ণ পৰীক্ষা হিচাপে বিবেচিত হ’ব।
এএফডিৰ উত্থানৰ তাৎক্ষণিক ৰাজনৈতিক ফলাফল যিয়েই নহওক, ছাক্সনি-আনহাল্টৰ ফলাফলে এটা কথা স্পষ্ট কৰিছে—জাৰ্মানীৰ ‘ফায়াৰৱাল’ নীতিৰ সন্মুখত এতিয়া আগতকৈ অধিক কঠিন ৰাজনৈতিক পৰীক্ষা আহি পৰিছে। চৰম সোঁপন্থী দলসমূহৰ ভোট বৃদ্ধি ৰোধ কৰিবলৈ কেৱল তেওঁলোকক ৰাজনৈতিকভাৱে পৃথক কৰি ৰখাই যথেষ্ট নে, নে মূলসুঁতিৰ দলসমূহে নিজৰ নীতি আৰু ৰাজনৈতিক ভাষ্যৰ ক্ষেত্ৰতো পৰিৱৰ্তন আনিব লাগিব, এই বিতৰ্ক এতিয়া জাৰ্মানীৰ সীমা অতিক্ৰম কৰি সমগ্ৰ ইউৰোপৰ গণতান্ত্ৰিক ৰাজনীতিৰ কেন্দ্ৰলৈ আহিছে।
গতিকে, মূল প্ৰশ্নটো কেৱল এএফডি কিমান শক্তিশালী হৈছে সেয়া নহয়। প্ৰশ্নটো হৈছে গণতান্ত্ৰিক দলসমূহে ভোটাৰৰ অসন্তুষ্টিৰ কাৰণসমূহ কিমান বিশ্বাসযোগ্যভাৱে সমাধান কৰিব পাৰে আৰু চৰম সোঁপন্থী ৰাজনীতিৰ বিকল্প হিচাপে কিমান শক্তিশালী ৰাজনৈতিক আখ্যান গঢ়ি তুলিব পাৰে। জাৰ্মানীৰ আগন্তুক নিৰ্বাচনসমূহে সেই প্ৰশ্নৰ উত্তৰ দিব!
