উত্তৰ কোৰিয়াৰ শাসক কিম জং উনে নিজৰ চৌপাশে কোনো ধৰণৰ কুচকাৱাজ সহ্য কৰিবলৈ অনিচ্ছুক। সেয়ে, আমেৰিকা, দক্ষিণ কোৰিয়া আৰু জাপানৰ যৌথ অনুশীলন শেষ হোৱাৰ লগে লগে উত্তৰ কোৰিয়াই ক্ষেপণাস্ত্ৰ নিক্ষেপ কৰে।
দক্ষিণ কোৰিয়াৰ যুটীয়া মুখ্য সেনাধ্যক্ষই জনোৱা মতে, শনিবাৰে পুৱা পূব উপকূলৰ ৱনছান অঞ্চলৰ পৰা কেইবাটাও ক্ষেপণাস্ত্ৰ নিক্ষেপ কৰা হয়, যিটো প্ৰায় ২৫০ কিলোমিটাৰ উৰি পূব সাগৰত পৰে। তিনি সপ্তাহৰ বিৰতিৰ অন্তত উত্তৰ কোৰিয়াই পুনৰ ক্ষেপণাস্ত্ৰ নিক্ষেপ কৰে। এই ঘটনাক লৈ অতিশয় ক্ষুব্ধ হৈ পৰিছে দক্ষিণ কোৰিয়া।
যোৱা সোমবাৰৰ পৰা প্ৰশান্ত মহাসাগৰত আৰম্ভ হৈছে আমেৰিকা, দক্ষিণ কোৰিয়া আৰু জাপানৰ পাঁচদিনীয়া যৌথ সামৰিক অনুশীলন ‘ফ্ৰিডম এজ’। এই ঘটনাৰ পিছতে উত্তৰ কোৰিয়াৰ প্ৰতিৰক্ষা মন্ত্ৰীয়ে এই সামৰিক অনুশীলনৰ প্ৰতি সঁহাৰি জনাই উপযুক্ত ব্যৱস্থা গ্ৰহণ কৰা হ’ব বুলি সকীয়াই দিয়ে। একে সময়তে পিয়ংইয়াঙে কয়, ‘যিকোনো সামৰিক অনুশীলন আচলতে যুদ্ধৰ প্ৰৰোচনা।’
সেই অনুশীলন শেষ হোৱাৰ এদিন পিছত শনিবাৰে পূব উপকূলৰ ৱনছান অঞ্চলৰ পৰা কেইবাটাও ক্ষেপণাস্ত্ৰ নিক্ষেপ কৰা হয়, যিটো প্ৰায় ২৫০ কিলোমিটাৰ উৰি পূব সাগৰত পৰে।
মন কৰিবলগীয়া যে যোৱা মাহত উত্তৰ কোৰিয়াক লৈ আমেৰিকাৰ ৰাষ্ট্ৰপতি ড’নাল্ড ট্ৰাম্পে নিজৰ সুৰ নৰম কৰিছিল। তেওঁ নিজৰ ছ’চিয়েল মিডিয়া ‘ট্ৰুথ ছ’চিয়েল’ত লিখিছে – ‘উত্তৰ কোৰিয়াৰ কিম জং উনৰ সৈতে মোৰ অতি ভাল সম্পৰ্কৰ বাবে আমেৰিকাই দক্ষিণ কোৰিয়াৰ সৈতে দীৰ্ঘদিন ধৰি যৌথ সামৰিক অনুশীলনত অংশগ্ৰহণ কৰাটো মই সন্তোষজনক বুলি বিবেচনা কৰা নাই।’
তেওঁ লগতে দাবী কৰে যে, ‘কেৱল এই অনুশীলনসমূহ ব্যয়বহুল হোৱাই নহয়, ইয়াৰ এটা বৃহৎ অংশ (সদায় হৈ অহাৰ দৰেই) আমেৰিকাই বহন কৰে – ইয়াৰ দ্বাৰা সম্পূৰ্ণ অনুপযুক্ত আৰু শত্ৰুতাপূৰ্ণ বাৰ্তা প্ৰেৰণ কৰা হয়, যিসকলে ড’নাল্ড ট্ৰাম্পৰ ৰাষ্ট্ৰপতিত্বৰ সময়ছোৱাত কোনো ধৰণৰ ভাবুকিৰ সৃষ্টি কৰা নাই। আৰু সদায় সন্মানজনক আচৰণ কৰি আহিছে।’ ট্ৰাম্পৰ এই মন্তব্যত বহু লোক আচৰিত হৈছে। কিমৰ প্ৰতি হঠাতে ট্ৰাম্পে ইমান ‘নৰম’ মনোভাৱ কিয় দেখুৱাইছে, সেই বিষয়ে সংশ্লিষ্ট মহল আচৰিত হৈছে।
কিন্তু কিমৰ ভগ্নী কিম ইয়ো জঙে বুজাই দিছে যে উত্তৰ কোৰিয়াই ট্ৰাম্পৰ ‘শান্তিপূৰ্ণ বাৰ্তা’ৰ প্ৰতি কাণ দিয়া নাই। তেওঁ কয়, ‘সামৰিক অনুশীলনৰ সময় আৰু পৰিসৰ কমাই দিলেও ইয়াৰ উত্তেজক আৰু আক্ৰমণাত্মক চৰিত্ৰ সলনি নহ’ব। আমেৰিকাই হয়তো ভাবিব পাৰে যে তেওঁলোকে শেহতীয়াকৈ কৰা এই পদক্ষেপক তথাকথিত ‘সদিচ্ছা’ৰ চিন হিচাপে উপস্থাপন কৰিব পাৰে, কিন্তু তেওঁলোকে আকাংক্ষিত সঁহাৰি নাপাব।’
