দীৰ্ঘ ১৩ বছৰৰ আইনী যুঁজৰ অন্তত অৱশেষত আদালতত আত্মসমৰ্পণ কৰিলে ‘তেহেলকা’ৰ প্ৰতিষ্ঠাপক তথা প্ৰাক্তন সম্পাদক তৰুণ তেজপালে। সহকৰ্মীক ধৰ্ষণৰ গোচৰত বোম্বে উচ্চ ন্যায়ালয়ে ১০ বছৰৰ সশ্ৰম কাৰাদণ্ডৰ শাস্তি ঘোষণা কৰাৰ পাছত উচ্চতম ন্যায়ালয়ৰ নিৰ্দেশ অনুসৰি সোমবাৰে পুৱা গোৱাৰ মাপুসা আদালতত উপস্থিত হৈ আত্মসমৰ্পণ কৰে তেজপালে।
ইয়াৰ পূৰ্বে বোম্বে উচ্চ ন্যায়ালয়ৰ দ্বৈত বিচাৰপীঠে গোৱাৰ অধিৱেশন আদালতৰ ৰায় বাতিল কৰি তেজপালক দোষী সাব্যস্ত কৰিছিল। অধিৱেশন আদালতে ২০২১ চনত তেওঁক সকলো অভিযোগৰ পৰা মুক্তি দিছিল। কিন্তু সেই ৰায়ক সম্পূৰ্ণৰূপে বাতিল কৰি উচ্চ ন্যায়ালয়ে তেজপালক ১০ বছৰৰ সশ্ৰম কাৰাদণ্ডৰ শাস্তি দিয়ে।
উচ্চ ন্যায়ালয়ৰ ৰায়ৰ বিৰুদ্ধে তেজপালে উচ্চতম ন্যায়ালয়ত আবেদন দাখিল কৰিছিল। কিন্তু ২৫ আগষ্টত উচ্চতম ন্যায়ালয়ে স্পষ্ট কৰি দিয়ে যে আবেদনখনৰ শুনানি হোৱাৰ পূৰ্বে তেজপালে তিনি সপ্তাহৰ ভিতৰত আত্মসমৰ্পণ কৰিব লাগিব। ২১ ছেপ্টেম্বৰৰ ভিতৰত আত্মসমৰ্পণৰ সৈতে জড়িত নথি আদালতত দাখিল হোৱাৰ পাছতহে ২২ ছেপ্টেম্বৰত তেওঁৰ আবেদন শুনানিৰ বাবে গ্ৰহণ কৰা হ’ব বুলি শীৰ্ষ আদালতে জনাইছিল। সেই নিৰ্দেশ মানি সোমবাৰে আদালতত উপস্থিত হয় তেজপাল।
এই গোচৰৰ সূচনা হৈছিল ২০১৩ চনত। গোৱাৰ এখন পাঁচতৰকা হোটেলৰ লিফ্টত তেতিয়াৰ প্ৰভাৱশালী সম্পাদক তেজপালৰ বিৰুদ্ধে তেওঁৰ এগৰাকী যুৱতী সহকৰ্মীক যৌন নিৰ্যাতন আৰু ধৰ্ষণ কৰাৰ অভিযোগ উত্থাপন হৈছিল। ঘটনাটোৱে দেশজুৰি তীব্ৰ চৰ্চা লাভ কৰাৰ পাছত ২০১৪ চনত গোৱা আৰক্ষীৰ অপৰাধ শাখাই প্ৰায় ৩,০০০ পৃষ্ঠাৰ অভিযোগপত্ৰ দাখিল কৰিছিল। একে বছৰৰ জুলাই মাহত উচ্চতম ন্যায়ালয়ৰ পৰা জামিন লাভ কৰিছিল তেজপালে।
পৰৱৰ্তী সময়ত ২০১৭ চনত গোৱাৰ অধিৱেশন আদালতে তেজপালৰ বিৰুদ্ধে ধৰ্ষণ আৰু যৌন নিৰ্যাতনৰ অভিযোগত আনুষ্ঠানিকভাৱে গোচৰ চলোৱাৰ পথ মুকলি কৰে। ২০১৯ চনত গোচৰটো বাতিল কৰাৰ বাবে তেজপালে কৰা আবেদন নাকচ কৰি উচ্চতম ন্যায়ালয়ে বিচাৰ প্ৰক্ৰিয়া আগবঢ়াই নিবলৈ নিৰ্দেশ দিয়ে।
অৱশেষত ২০২১ চনত গোৱাৰ অধিৱেশন আদালতে তেজপালক সকলো অভিযোগৰ পৰা মুক্তি দিয়ে। কিন্তু সেই সিদ্ধান্তৰ বিৰুদ্ধে দাখিল হোৱা আবেদনৰ ভিত্তিত বোম্বে উচ্চ ন্যায়ালয়ে সেই ৰায় বাতিল কৰি তেজপালক দোষী সাব্যস্ত কৰে আৰু ১০ বছৰৰ সশ্ৰম কাৰাদণ্ডৰ শাস্তি ঘোষণা কৰে। এতিয়া উচ্চতম ন্যায়ালয়ত তেওঁৰ আবেদনত পৰৱৰ্তী শুনানি হ’ব।
