বলিউডৰ অভিনেত্ৰী কংগনা ৰানাৱট আৰু ৰাখি সাৱন্তৰ মাজৰ বাকযুদ্ধ নতুন কথা নহয়। কিন্তু এইবাৰ সেই সংঘাত অধিক তীব্ৰ ৰূপ লৈছে। শেহতীয়াকৈ ৰাখি সাৱন্তে কংগনা ৰানাৱট, প্ৰাক্তন কেন্দ্ৰীয় মন্ত্ৰী স্মৃতি ইৰাণী আৰু প্ৰধানমন্ত্ৰী নৰেন্দ্ৰ মোদীক লৈ আপত্তিজনক মন্তব্য কৰাৰ পাছতে সামাজিক মাধ্যমত তীব্ৰ প্ৰতিক্ৰিয়া সৃষ্টি হয়। ইয়াৰ পাছতেই বহুদিন নীৰৱ হৈ থকা কংগনাই ৰাখিক লক্ষ্য কৰি কঠোৰ ভাষাৰে প্ৰত্যুত্তৰ দিয়ে।
ইনষ্টাগ্ৰাম ষ্ট’ৰীত নাম উল্লেখ নকৰাকৈ ৰাখিক আক্ৰমণ কৰি কংগনাই লিখে যে সমাজত বহু বিফল আৰু ঈৰ্ষাপৰায়ণ মানুহে নিজৰ অহংকাৰ আৰু ব্যৰ্থতা লুকুৱাবলৈ সফল মহিলাৰ চৰিত্ৰক লক্ষ্য কৰি আক্ৰমণ চলায়। এনে সস্তীয়া আক্ৰমণত আঘাত পোৱা বা লজ্জিত হোৱাৰ প্ৰয়োজন নাই বুলিও কংগনাই মন্তব্য কৰে। তেওঁৰ মতে, সফল মহিলাই কাৰো আগত নিজৰ সাফল্যৰ কাৰণে কৈফিয়ত দিয়াৰ প্ৰয়োজন নাই।
কংগনাই ইয়াতেই থমকি নৰ’ল। ৰাখিৰ সফলতাৰ প্ৰতি কটাক্ষ কৰি তেওঁ কয় যে সফল হোৱাৰ বাবে বহু কিবা দিবলৈ সাজু থাকিলেও বাস্তৱ কথাটো হ’ল, ৰাখিৰ পৰা ল’বলগীয়া একো নাই। আনকি বহু অনুনয়-বিনয় কৰিলেও কোনোবাই তেওঁক ঝাড়ুৱালীৰ চাকৰিও নিদিব বুলি কংগনাই তীব্ৰ কটাক্ষ কৰে। সেই চাকৰিৰ বাবেও কিছু যোগ্যতা লাগে বুলি উল্লেখ কৰি তেওঁ ৰাখিক শান্ত তেওঁৰ ৰীল চাই থাকিবলৈ আৰু কান্দিবলৈ কয়।
উল্লেখযোগ্য যে, ইয়াৰ পূৰ্বেও ৰাখি সাৱন্তে কংগনা ৰানাৱটক ‘গাটাৰ মাউথ’ বুলি কটাক্ষ কৰিছিল। তাৰ প্ৰত্যুত্তৰত কংগনাই দাবী কৰে যে তেওঁৰ সাফল্যৰ এক শতাংশও লাভ কৰিব নোৱাৰা লোকসকলে তেওঁৰ চৰিত্ৰ বা অতীতক লৈ সংবাদ মাধ্যমত চৰ্চা লাভ কৰিবলৈ চেষ্টা কৰে। আশুতোষ ৰানা, সোণু সুদ, তাপসী পান্না আৰু ৰাখি সাৱন্তৰ নাম উল্লেখ কৰি তেওঁ কয় যে প্ৰথমে তেওঁৰ পৰ্যায়ত উপনীত হওক, তাৰ পাছতহে কথা ক’ব লাগে।
ইফালে, শেহতীয়াকৈ সময় ৰাইনাৰ ‘ইণ্ডিয়াজ গট লেটেণ্ট’ অনুষ্ঠানত অশ্নীৰ গ্ৰোভাৰৰ সৈতে ৰাখি সাৱন্তক দেখা গৈছিল। আনহাতে কংগনা ৰানাৱটক শেহতীয়াকৈ ‘ভাৰত ভাগ্য বিধাতা’ ছবিত দেখা গৈছে। কংগনাৰ এই তীব্ৰ আক্ৰমণৰ পাছত ৰাখি সাৱন্তে কি প্ৰত্যুত্তৰ দিয়ে, এতিয়া সেই কথাকলৈয়ে দৃষ্টি ৰাখিছে সামাজিক মাধ্যমৰ ব্যৱহাৰকাৰীসকলে।
