গোলাঘাট জিলাৰ মাজেৰে পাঁচ বছৰীয়া এটা হাতী উত্তৰ প্ৰদেশলৈ সৰবৰাহৰ অভিযোগক কেন্দ্ৰ কৰি নতুনকৈ ৰহস্য ঘনীভূত হৈছে। স্থানীয় লোকসকলে পথত হাতীটো লৈ যোৱা অৱস্থাত বাধা দিয়াৰ পাছত বন বিভাগে হাতীটো নিজৰ জিম্মাত লয়। ‘গায়ত্ৰী’ নামৰ হাতীটো ডিগবৈ অঞ্চলৰ পৰা উত্তৰ প্ৰদেশলৈ লৈ যোৱা হৈছিল বুলি জানিব পৰা গৈছে।
স্থানীয় লোকৰ মতে, হাতীটো খোজকঢ়াই লৈ যোৱা হৈছিল । ঘটনা পোহৰলৈ অহাৰ পাছতে অৰণ্য সুৰক্ষা সমিতিয়ে হাতীটোৰ মালিকানা, প্ৰশিক্ষণ, কাগজ-পত্ৰ আৰু সৰবৰাহৰ বৈধতা সন্দৰ্ভত সম্পূৰ্ণ তদন্তৰ দাবী জনাইছে।
অৰণ্য সুৰক্ষা সমিতিৰ অভিযোগ অনুসৰি, ‘গায়ত্ৰী’ৰ মালিক উত্তৰ প্ৰদেশৰ বাসিন্দা আশ্ৰাফ আলী। বৰ্তমান তেওঁ বোকাখাতত বসবাস কৰি আছে বুলি সংগঠনটোৱে দাবী কৰিছে। সংগঠনটোৱে লগতে আশ্ৰাফ আলীৰ অবৈধ হাতী বাণিজ্যৰ সৈতে যোগসূত্ৰ থকাৰো অভিযোগ উত্থাপন কৰিছে। অৱশ্যে এই অভিযোগসমূহ এতিয়ালৈকে স্বতন্ত্ৰভাৱে নিশ্চিত হোৱা নাই।
ইফালে, হাতীটোৰ প্ৰশিক্ষণক লৈও একাধিক প্ৰশ্ন উত্থাপন হৈছে। সংগঠনটোৰ মতে, উত্তৰ প্ৰদেশৰ বিজয় যাদৱ আৰু সত্যেন্দ্ৰ যাদৱ নামৰ দুজন মাউতে প্ৰায় ছয় মাহ ধৰি গায়ত্ৰীক প্ৰশিক্ষণ দিছিল। তাৰ পাছতেই হাতীটোক উত্তৰ প্ৰদেশলৈ লৈ যোৱাৰ প্ৰস্তুতি চলোৱা হৈছিল।
প্ৰশিক্ষণৰ ক্ষেত্ৰতো সংগঠনটোৱে বন বিভাগৰ ওচৰত একাধিক প্ৰশ্ন ৰাখিছে। অসমত হাতী প্ৰশিক্ষণ দিয়াৰ বাবে উক্ত মাউত দুজনৰ কোনো বৈধ অনুমতি আছিল নে নাই, তেওঁলোক কেনেকৈ অসমলৈ আহিছিল আৰু হাতী প্ৰশিক্ষণৰ ক্ষেত্ৰত প্ৰযোজ্য নিয়মসমূহ মানি চলা হৈছিল নে নাই, সেই বিষয়ে তদন্তৰ দাবী উঠিছে। সংগঠনটোৱে দাবী কৰিছে যে নিৰ্দিষ্ট পৰিস্থিতিত অসমত থকা হাতীক ৰাজ্যখনৰ মাউতেই প্ৰশিক্ষণ দিয়াৰ ব্যৱস্থা আছে।
আনহাতে, গায়ত্ৰীৰ দেহত থকা বুলি কোৱা মাইক্ৰ’চিপক লৈও সন্দেহ প্ৰকাশ কৰিছে অৰণ্য সুৰক্ষা সমিতিয়ে। সংগঠনটোৰ অভিযোগ অনুসৰি, হাতীটোৰ পৰিচয় নম্বৰ সন্দেহজনক আৰু ইয়াত জালিয়াতিৰ সম্ভাৱনাও নুই কৰিব নোৱাৰি। সেয়েহে মাইক্ৰ’চিপৰ নম্বৰ, হাতীটোৰ পৰিচয়-পঞ্জীয়ন আৰু সংশ্লিষ্ট সকলো নথি স্বতন্ত্ৰভাৱে পৰীক্ষা কৰাৰ দাবী জনোৱা হৈছে।
এই ঘটনাত বন বিভাগৰ বিশেষ মুখ্য সচিব এম কে যাদৱৰ নামো সংগঠনটোৱে উত্থাপন কৰিছে। বিষয়টোৰ সৈতে তেওঁৰ কোনো ভূমিকা আছিল নে নাই, সেই সন্দৰ্ভতো তদন্তৰ দাবী জনোৱা হৈছে।
গায়ত্ৰীক লৈ সৃষ্টি হোৱা এই বিতৰ্কৰ মাজতে আন এটা হাতী ‘দুৰ্গা’ক মানাহ ৰাষ্ট্ৰীয় উদ্যানৰ পৰা বন বিভাগৰ তত্বাৱধানত মাদুৰাইলৈ স্থানান্তৰ কৰাৰ ঘটনাক লৈও বিতৰ্ক চলি আছে। তাৰ কিছুদিন পাছতেই গায়ত্ৰীক উত্তৰ প্ৰদেশলৈ নিয়াৰ ঘটনাই হাতী সৰবৰাহৰ নিয়ম আৰু বন বিভাগৰ তদাৰকিক লৈ নতুনকৈ প্ৰশ্ন উত্থাপন কৰিছে।
অৰণ্য সুৰক্ষা সমিতিয়ে অসম চৰকাৰ আৰু মুখ্যমন্ত্ৰী হিমন্ত বিশ্ব শৰ্মাৰ ওচৰত গায়ত্ৰীৰ মালিকানা, প্ৰশিক্ষণ, সৰবৰাহ, মাইক্ৰ’চিপ, নথি-পত্ৰ আৰু এই ঘটনাৰ সৈতে জড়িত বুলি অভিযোগ উঠা ব্যক্তিসকলৰ সম্ভাব্য সম্পৰ্কৰ বিষয়ে এক বিস্তৃত তদন্তৰ দাবী জনাইছে। এতিয়া তদন্ত আৰম্ভ হয় নে নাই আৰু হাতীটোৰ সৰবৰাহৰ আঁৰৰ প্ৰকৃত তথ্য কি, সেয়াই হৈ পৰিছে মূল প্ৰশ্ন।
