২১ জুলাইৰ পৰা লণ্ডনত অনুষ্ঠিত হ’বলগীয়া মহিলা হকী বিশ্বকাপৰ ১৮ জনীয়া ভাৰতীয় মহিলা দলত স্থান লাভ কৰিবলৈ সক্ষম হৈছে মিজোৰামৰ যুৱ প্ৰতিভাধৰ হকী খেলুৱৈ লালৰেমছিয়ামী ।
মিজোৰামৰ এইগৰাকী প্ৰতিভাধৰ খেলুৱৈ লালৰেমছিয়ামীয়ে ভাৰতীয় মহিলা দলটোৰ আক্ৰমণৰ গুৰু দায়িত্ব বহন কৰিব। ১৮ জনীয়া ভাৰতীয় মহিলা দলটোক নেতৃত্ব প্ৰদান কৰিব অভিজ্ঞ খেলুৱৈ ৰানীয়ে।
উল্লেখ্য যে অতি গুৰুত্বপূৰ্ণ হিচাপে বিবেচিত হকী বিশ্বকাপত ভাৰতে পুল বিত আমেৰিকা যুক্তৰাষ্ট্ৰ, আয়াৰলেণ্ড আৰু আয়োজক ইংলেণ্ডৰ সৈতে প্ৰতিদ্বণ্ডিতা আগবঢ়াব।
উল্লেখযোগ্য যে বিশ্বকাপলৈ যাবলগীয়া ভাৰতীয় মহিলা দলটোৰ আটাইতকৈ কনিষ্ঠতম খেলুৱৈগৰাকীয়ে হৈছে মিজোৰামৰ লালৰেমছিয়ামী। লালৰেমছিয়ামীয়ে সদ্য সমাপ্ত এছিয়ান য়ুথ অলিম্পিক গেইমছত ভাৰতীয় জুনিয়ৰ দলত দুৰ্দান্ত প্ৰদৰ্শন আগবঢ়ায় প্ৰতিযোগিতাখনত মুঠ সাতটা গ’ল কৰিবলৈ সক্ষম হৈছিল। এই প্ৰদৰ্শনৰ বাবেই লালৰেমছিয়ামীয়ে মূল ভাৰতীয় মহিলা দলত স্থান লাভ কৰি বিশ্বকাপ খেলিবলৈ সুযোগ লাভ কৰিলে।
মিজোৰামৰ ক’লাচিবৰ বাসিন্দা লালৰেমছিয়ামীয়ে স্প’ৰ্টছ অথ’ৰিটি অব ইণ্ডিয়া আৰু থেনজলস্থিত মিজোৰাম ৰাজ্যিক হকী একাডেমিত প্ৰশিক্ষণ গ্ৰহণ কৰি থকা সময়তে ভাৰতীয় দলৰ প্ৰশিক্ষকে খেলুৱৈগৰাকীৰ প্ৰতিভা দেখি আকৰ্ষিত হৈ ভাৰতীয় জুমিয়ৰ আৰু ছিনিয়ৰ দলত অংসগ্ৰহণৰ সুযোগ প্ৰদান কৰে।
লালৰেমছিয়ামীয়ে সুযোগ পোৱা মাত্ৰেই আন্তঃৰাষ্ট্ৰীয় পৰ্যায়ত নিজৰ প্ৰতিভাৰ সৰ্বোচ্চ উজাৰি দিয়ে আৰু এইদৰে এখনৰ পাছত আন এখন গুৰুত্বপূৰ্ণ প্ৰতিযোগিতাত ভাৰতীয় দলত স্থান লাভ কৰি নিজৰ ৰাজ্যলৈ গৌৰৱ কঢ়িয়াই আনিবলৈ সক্ষম হয়।
২০১৭ বৰ্ষৰ এছিয়ান চেম্পিয়নশ্বিপৰ বিজয়ী দলৰ সদস্যা লালৰেমছিয়ামীয়ে নিজৰ এই সাফল্যত ভগৱান, মিজোৰামৰ হকী বিষয়াৰ লগতে স্প’ৰ্টছ অথ’ৰিটি অব ইণ্ডিয়াক অশেষ ধন্যবাদ জ্ঞাপন কৰে।
