উত্তৰ প্ৰদেশৰ হাৰদোইত সংঘটিত হৈছে এক অতিশয় চাঞ্চল্যকৰ আৰু শিহৰণকাৰী ঘটনা। বিবাহ বহিৰ্ভূত সম্পৰ্ক থকাৰ সন্দেহতে এগৰাকী স্বামীয়ে নিজৰ পত্নীক নিৰ্মমভাৱে হত্যা কৰাৰ অভিযোগ উত্থাপন হৈছে। কেৱল হত্যা কৰাই নহয়, শুই থকা অৱস্থাত পত্নীৰ শিৰচ্ছেদ কৰাৰ দৰে জঘন্য কাণ্ড সংঘটিত কৰিছে পাষাণ স্বামীয়ে।
আৰক্ষীৰ সূত্ৰৰ পৰা জানিব পৰা মতে, মৃত মহিলাগৰাকীৰ নাম হৈছে নাগমা আৰু তেওঁৰ বয়স ২৮ বছৰ। প্ৰায় ১২ বছৰ পূৰ্বে পাৰভেজ নামৰ যুৱকজনৰ সৈতে তেওঁৰ বিবাহ সম্পন্ন হৈছিল। শেহতীয়াকৈ পাৰভেজে নিজৰ পৈতৃক বাসগৃহ বিক্ৰী কৰি দিছিল। যোৱা প্ৰায় ডেৰ মাহ ধৰি ইছলামনগৰ টিলিয়া অঞ্চলত পত্নীৰ সৈতে এটা ভাড়াগড়ত বসবাস কৰি আছিল পাৰভেজে। অভিযোগ অনুসৰি, এই ভাড়াগড়লৈ অহাৰ পিছৰে পৰা পাৰভেজে পত্নীৰ আন পুৰুষৰ সৈতে অবৈধ সম্পৰ্ক থকা বুলি সন্দেহ কৰিবলৈ আৰম্ভ কৰিছিল। এই বিষয়টোক লৈ দুয়োৰে মাজত কেইবাবাৰো তীব্ৰ কাজিয়াৰ সূত্ৰপাত হৈছিল। যোৱা ৯ ছেপ্টেম্বৰৰ নিশা নাগমা যেতিয়া গভীৰ টোপনিত আছিল, তেতিয়াই খঙৰ ভমকত পাৰভেজে এখন চোকা চুৰিৰে পত্নীৰ ওপৰত আক্ৰমণ চলায়। পত্নীক ঘপিয়াই হত্যা কৰাৰ পিছত তেওঁৰ মূৰটো শৰীৰৰ পৰা পৃথক কৰি পেলায় বুলি জঘন্য অভিযোগ উত্থাপন হৈছে।
এই ভয়ংকৰ কাণ্ডৰ খবৰ পোৱাৰ লগে লগে আৰক্ষীৰ দল ততাতৈয়াকৈ ঘটনাস্থলীত উপস্থিত হয়। তেজৰে লুতুৰি-পুতুৰি হৈ থকা মৃতদেহটো উদ্ধাৰ কৰি মৰণোত্তৰ পৰীক্ষাৰ বাবে চিকিৎসালয়লৈ প্ৰেৰণ কৰে। আৰক্ষীয়ে জানিবলৈ দিয়া মতে, পত্নীক হত্যা কৰাৰ পিছত পাৰভেজে নিজেই গৈ আৰক্ষী থানাত আত্মসমৰ্পণ কৰে আৰু নিজৰ অপৰাধ স্বীকাৰ কৰি লয়। আনহাতে, মৃত নাগমাৰ ভগ্নী ছাব্বুৱে এক গুৰুতৰ অভিযোগ উত্থাপন কৰিছে। তেওঁৰ মতে, যোৱা এসপ্তাহ ধৰি নাগমাই স্বামীৰ হাতত চৰম নিৰ্যাতন আৰু মাৰপিটৰ বলি হ’বলগীয়া হৈছিল। পাৰভেজে প্ৰায়ে নাগমাক ডিঙি কাটি হত্যা কৰাৰ ভাবুকি দিছিল বুলিও ভগ্নীগৰাকীয়ে প্ৰকাশ কৰিছে। এই সমগ্ৰ ঘটনাত পাৰভেজৰ মাতৃ আৰু ভগ্নীও জড়িত থকা বুলি তেওঁ দাবী কৰিছে।
