শিৱসাগৰ ৰে’ল ষ্টেচনত মঙলবাৰে সৃষ্টি হয় এক উত্তপ্ত পৰিস্থিতিৰ। গুৱাহাটীত অনুষ্ঠিত হ’বলগীয়া প্ৰতিবাদী সমাৱেশত অংশ ল’বলৈ ওলোৱা একাংশ বানপীড়িত লোকক ষ্টেচন চৌহদতে আৰক্ষী আৰু চি আৰ পি এফে বাধা দিয়াৰ অভিযোগ উত্থাপন হৈছে। এই ঘটনাক লৈ ষ্টেচন চৌহদত ক্ষোভ প্ৰকাশ কৰে প্ৰতিবাদীসকলে।
উল্লেখ্য, অহা ২৩ ছেপ্টেম্বৰত ৰাইজৰ দলৰ নেতৃত্বত গুৱাহাটীত এক বৃহৎ গণ সমাৱেশৰ আহ্বান জনোৱা হৈছে। বিগত জুলাই মাহৰ প্ৰলয়ংকাৰী বানত ক্ষতিগ্ৰস্ত হোৱা প্ৰতিটো পৰিয়ালক ১০ লাখ টকাকৈ ক্ষতিপূৰণ দিয়াৰ দাবীত এই সমাৱেশৰ আয়োজন কৰা হৈছে।
এই সমাৱেশত অংশ লোৱাৰ উদ্দেশ্যে আজি তিনিচুকীয়া-ৰঙিয়া এক্সপ্ৰেছযোগে গুৱাহাটীলৈ যাত্ৰা কৰিবলৈ ওলাইছিল শিৱসাগৰৰ শতাধিক বানপীড়িত লোক। কিন্তু ষ্টেচন চৌহদত প্ৰৱেশ কৰাৰ পাছতেই আৰক্ষী আৰু চি আৰ পি এফে কটকটীয়া নিৰাপত্তা ব্যৱস্থা গঢ়ি তুলি একাংশ লোকক আগবাঢ়িবলৈ বাধা দিয়াৰ অভিযোগ উঠিছে।
ঘটনাক কেন্দ্ৰ কৰি ষ্টেচন চৌহদতে ক্ষোভ প্ৰকাশ কৰে সাধাৰণ ৰাইজে। কৃষক মুক্তি সংগ্ৰাম সমিতিৰ সম্পাদক বিদ্যুৎ শইকীয়াই চৰকাৰ আৰু প্ৰশাসনৰ বিৰুদ্ধে তীব্ৰ অসন্তুষ্টি প্ৰকাশ কৰি অভিযোগ কৰে যে বানপীড়িতক ক্ষতিপূৰণ দিয়াৰ ক্ষেত্ৰত চৰকাৰ ব্যৰ্থ হোৱাৰ বিপৰীতে তেওঁলোকে নিজৰ অধিকাৰ বিচাৰি প্ৰতিবাদ কৰিবলৈ ওলোৱাৰ সময়ত আৰক্ষী মোতায়েন কৰি কণ্ঠ ৰোধ কৰাৰ চেষ্টা চলোৱা হৈছে।
বিদ্যুৎ শইকীয়াৰ অভিযোগ অনুসৰি, বানে সৰ্বস্ব হেৰুওৱা লোকসকলে ক্ষতিপূৰণৰ দাবীত ৰাজধানীলৈ গৈ গণতান্ত্ৰিকভাৱে প্ৰতিবাদ সাব্যস্ত কৰিব বিচাৰিছিল। কিন্তু তেওঁলোকক বাটতে বাধা দিয়াৰ চেষ্টা চলাইছে প্ৰশাসনে। এনে পদক্ষেপে বানপীড়িত ৰাইজৰ সংগ্ৰাম স্তব্ধ কৰিব নোৱাৰে বুলিও তেওঁ মন্তব্য কৰে।
ঘটনাটোক লৈ বিধায়ক অখিল গগৈয়েও অসন্তুষ্টি প্ৰকাশ কৰিছে। বানপীড়িত লোকসকলক প্ৰতিবাদী সমাৱেশত অংশগ্ৰহণৰ ক্ষেত্ৰত বাধা দিয়াৰ অভিযোগ উত্থাপন কৰি তেওঁ এই কাৰ্যক গৰিহণা দিয়ে।
ইফালে, শিৱসাগৰ ৰে’ল ষ্টেচন চৌহদত কিছু সময়লৈ পৰিস্থিতি উত্তপ্ত হৈ থাকে। আৰক্ষী আৰু অৰ্ধসামৰিক বাহিনীৰ বাধাৰ মাজতো অৱশেষত একাংশ বানপীড়িত লোকে গুৱাহাটী অভিমুখে যাত্ৰা কৰিবলৈ সক্ষম হয়।
বানত ক্ষতিগ্ৰস্ত লোকৰ ক্ষতিপূৰণৰ দাবীক কেন্দ্ৰ কৰি গঢ় লৈ উঠা এই প্ৰতিবাদৰ পূৰ্বে শিৱসাগৰত সৃষ্টি হোৱা এই পৰিস্থিতিয়ে পুনৰ চৰকাৰৰ প্ৰতিবাদ মোকাবিলাৰ পদ্ধতি আৰু ৰাইজৰ গণতান্ত্ৰিক অধিকাৰক লৈ নতুনকৈ চৰ্চা সৃষ্টি কৰিছে।
