জম্মু-কাশ্মীৰৰ কৰ্মক্ষেত্ৰৰ পৰা ছুটীত ঘৰলৈ উভতি অহাৰ পথতে মিজোৰামৰ ক‘লাচিবত এক ভয়ংকৰ পথ-সংঘাতৰ বলি হৈ প্ৰাণ হেৰুৱাইছে এগৰাকী ২৯ বছৰীয়া সেনা জোৱানে। যোৱা ২০ ছেপ্টেম্বৰত লেংপুই বিমানবন্দৰৰ পৰা এখন ট্ৰাকেৰে নিজ গাঁও নিউ বুইলুমলৈ গৈ থকা অৱস্থাত বনভোজৰ পৰা উভতি অহা একাংশ যুৱকৰ সৈতে হোৱা সামান্য যান-বাহন বিতৰ্কৰ পৰিণতিত অসম ৰেজিমেণ্টৰ জোৱান জাকাৰিয়া লালহ্ৰিয়াতলুৱাংগাক মৰিয়াই মৰিয়াই হত্যা কৰা হয়।
জোৱানগৰাকীৰ মাতৃ লালথাজোৱীয়ে সংবাদ মাধ্যমক জানিবলৈ দিয়া অনুসৰি, ২০ ছেপ্টেম্বৰৰ সন্ধিয়া জাকাৰিয়া আৰু তেওঁৰ বন্ধু জন লালটানপুইয়াই বুয়ালপুইত চাহ খাবলৈ ৰৈছিল। তাৰ পৰা যাত্ৰা আৰম্ভ কৰাৰ পাছতেই বেয়া পথৰ বাবে বিপৰীত দিশৰ পৰা ভুল পথেৰে আহি থকা এখন ট্ৰাকৰ সৈতে তেওঁলোকৰ মুখামুখি হয়। প্ৰত্যক্ষদৰ্শীৰ মতে, জনে ট্ৰাক চালকজনক ৰ‘বলৈ কোৱাৰ সময়তে কাৱনপুই চহৰৰ এটা হকী দলৰ প্ৰায় ২০ জনীয়া যুৱকৰ দল এটা এখন পিক-আপ ভানত আহি উপস্থিত হয়। থিংডাউলৰ সমীপৰ এখন বনভোজস্থলীৰ পৰা বিজয় উৎসৱ পালন কৰি উভতি অহা যুৱকৰ দলটো সুৰাসক্ত অৱস্থাত আছিল বুলি সন্দেহ কৰা হৈছে। যুৱকসকলে বাহনৰ পৰা নামি আহি জনক বাহিৰলৈ টানি উলিয়াই প্ৰহাৰ কৰিবলৈ আৰম্ভ কৰে। এই পৰিস্থিতিত জাকাৰিয়াই বাধা দিবলৈ চেষ্টা কৰোতেই তেওঁকো আক্ৰমণ কৰে। আনকি চিঞৰ-বাখৰ শুনি ঘটনাস্থলীত উপস্থিত হোৱা তেওঁলোকৰ আন এগৰাকী বন্ধু লালচাৱিলিয়ানাকো যুৱকৰ দলটোৱে প্ৰহাৰ কৰে। এই আক্ৰমণৰ ফলত জাকাৰিয়াৰ থিতাতে মৃত্যু হয় আৰু ট্ৰাক চলাই অহা তেওঁৰ বন্ধু জন সামান্যভাৱে আঘাতপ্ৰাপ্ত হয়।
২০১৭ চনত অসম ৰেজিমেণ্টত যোগদান কৰা জাকাৰিয়া শ্ৰীনগৰত নিয়োজিত হৈ আছিল। পাঁচগৰাকী ভাতৃ-ভগ্নীৰ মাজত দ্বিতীয় কনিষ্ঠ জাকাৰিয়াই পৰিয়ালটোৰ একমাত্ৰ উপাৰ্জনকাৰী আছিল। তেওঁৰ ৬০ বছৰীয়া মাতৃ আৰু ৮০ বছৰীয়া পিতৃ ভি এল ডুৱাইলোভা বৃদ্ধাৱস্থাৰ বাবে উপাৰ্জন কৰিবলৈ অক্ষম। জাকাৰিয়াৰ কনিষ্ঠ ভাতৃ ষ্টিফেন লালৰিংঘেটাই দিনহাজিৰা কৰি পৰিয়ালটোক সহায় কৰে, আনহাতে জ্যেষ্ঠ ভাতৃ আৰু ভগ্নী নিজা পৰিয়ালৰ সৈতে পৃথককৈ থাকে। মাতৃ লালথাজোৱীয়ে আক্ষেপ প্ৰকাশ কৰি কয় যে ঘৰ নিৰ্মাণৰ বাবে জাকাৰিয়াই ঋণো লৈছিল আৰু তেওঁৰ মৃত্যুৱে সমগ্ৰ পৰিয়ালটোক দিশহাৰা কৰি তুলিছে। ঘটনাৰ ঠিক পূৰ্বে জাকাৰিয়াই মাতৃলৈ ফোন কৰি সন্ধিয়া প্ৰায় ৬.৩০ বজাত ঘৰ পাব বুলি জনাইছিল। নিৰ্ধাৰিত সময়ত উপস্থিত নোহোৱাত পৰিয়ালৰ লোকে পুনৰ ফোন কৰাত বেয়া পথৰ বাবে পলম হোৱা বুলি তেওঁ জনাইছিল, কিন্তু তাৰ কিছু সময়ৰ পাছতেই বন্ধু লালচাৱিলিয়ানাই এই মৰ্মান্তিক খবৰটো পৰিয়ালটোক দিয়ে।
দেশমাতৃৰ সেৱাত নিয়োজিত এগৰাকী সেনা জোৱানে নিজগৃহলৈ উভতি অহাৰ পথতে দুৰ্বৃত্তৰ আক্ৰমণত এনেদৰে প্ৰাণ হেৰুৱাবলগীয়া হোৱা ঘটনাই পৰিয়ালবৰ্গৰ লগতে সমগ্ৰ অঞ্চলটোতে গভীৰ শোকৰ ছাঁ পেলাইছে। পুত্ৰহাৰা মাতৃয়ে দোষীসকলক শীঘ্ৰে চিনাক্ত কৰি কঠোৰশাস্তি প্ৰদানৰ জৰিয়তে ন্যায় বিচাৰি প্ৰশাসনৰ ওচৰত কাতৰ আহ্বান জনাইছে। ইপিনে, আৰক্ষীয়ে সমগ্ৰ ঘটনাৰ তদন্ত ক্ষিপ্ৰতৰ কৰি তুলিছে আৰু ইতিমধ্যে এই জঘন্য হত্যাকাণ্ডত জড়িত থকাৰ অভিযোগত দুজন নাবালকসহ মুঠ আঠগৰাকী অভিযুক্তক গ্ৰেপ্তাৰ কৰিবলৈ সক্ষম হৈছে। পৰৱৰ্তী সময়ত আৰক্ষীৰ নিৰপেক্ষ তদন্ত আৰু আইনী প্ৰক্ৰিয়াৰ জৰিয়তে ঘটনাৰ প্ৰকৃত সত্য পোহৰলৈ অহাৰ লগতে দোষীয়ে দৃষ্টান্তমূলক শাস্তি লাভ কৰিব বুলি আশা কৰা হৈছে।
