সাধাৰণ গা-বিষ বা আন সৰু-সুৰা ৰোগৰ বাবে চিকিৎসকৰ পৰামৰ্শ অবিহনে সঘনাই পেইনকিলাৰ আৰু এণ্টিবায়টিক গ্ৰহণ কৰাৰ ফলত মানুহৰ বৃক্কৰ গুৰুতৰ ৰোগ হোৱাৰ আশংকা বৃদ্ধি পাইছে। এই ভয়ংকৰ প্ৰৱণতাৰ প্ৰতি লক্ষ্য ৰাখি ‘কেন্দ্ৰীয় ঔষধ মান নিয়ন্ত্ৰণ সংস্থা’ই ঔষধৰ সঠিক ব্যৱহাৰ সম্পৰ্কে এক নতুন নিৰ্দেশনা জাৰি কৰিছে। সোমবাৰে জাৰি কৰা এই নিৰ্দেশনা অনুসৰি, চিকিৎসকৰ পৰামৰ্শ নোহোৱাকৈ দীৰ্ঘদিন ধৰি নন-ষ্টেৰয়ডেল এণ্টি-ইনফ্লেমেটৰী ড্ৰাগছ বা সাধাৰণ বিষনাশক ঔষধ গ্ৰহণ নকৰিবলৈ জনসাধাৰণক সকীয়াই দিয়া হৈছে। ইয়াৰ লগতে, পূৰ্বৰে পৰা বৃক্কৰ ৰোগত আক্ৰান্ত লোকসকলক পেইনকিলাৰ গ্ৰহণৰ পূৰ্বে চিকিৎসকক অৱগত কৰিবলৈ পৰামৰ্শ দিয়া হৈছে।
নতুন দিল্লীৰ এইমছৰ নেফ্ৰ’লজী বিভাগৰ বিশেষজ্ঞ অধ্যাপক ডাঃ সন্দীপ মহাজনে জনোৱা অনুসৰি, অনিয়ন্ত্ৰিত আৰু দীৰ্ঘদিনীয়া পেইনকিলাৰৰ ব্যৱহাৰে মানুহৰ বৃক্কৰ কাৰ্যক্ষমতা দ্ৰুতগতিত হ্ৰাস কৰে। বিশেষকৈ ক্ৰনিক বৃক্কৰোগত আক্ৰান্ত ৰোগীসকলৰ বাবে ই অতি মাৰাত্মক। তেওঁ কয় যে সকলো ঔষধ কেৱল অৰ্হতাসম্পন্ন চিকিৎসকৰ তত্ত্বাৱধানতহে গ্ৰহণ কৰা উচিত আৰু ঔষধৰ মাত্ৰা তথা সময়সীমা কঠোৰভাৱে মানি চলা প্ৰয়োজন। বিকল্প চিকিৎসা পদ্ধতিৰ ঔষধ গ্ৰহণৰ ক্ষেত্ৰতো সাৱধানতা অৱলম্বন কৰিবলৈ তেওঁ আহ্বান জনায়, কিয়নো ইয়াৰ কিছুমান উপাদানে বৃক্কৰ ক্ষতিসাধন কৰিব পাৰে। একেদৰে, মেক্স ছুপাৰ স্পেচিয়েলিটী হাস্পতালৰ নেফ্ৰ’লজী বিভাগৰ গোট অধ্যক্ষ ডাঃ দীনেশ খুল্লাৰে কয় যে বিষনাশক ঔষধৰ অপব্যৱহাৰে স্পৰ্শকাতৰ ৰোগীৰ ক্ষেত্ৰত হ্ৰস্বম্যাদী ব্যৱহাৰতো বিপজ্জনক ৰূপ ল’ব পাৰে। সেয়েহে ৰাইজক এনেদৰে নিজাকৈ ঔষধ গ্ৰহণ কৰাৰ পৰা বিৰত থাকিবলৈ তেওঁ আহ্বান জনাইছে।
ভাৰতত দ্ৰুতগতিত বৃদ্ধি পোৱা বৃক্কৰোগৰ সমস্যাক লৈ উদ্বেগ প্ৰকাশ কৰাৰ সময়তে এই সতৰ্কবাণী জাৰি কৰা হৈছে। ২০২৫ চনৰ এক প্ৰতিবেদন অনুসৰি, ভাৰতত ক্ৰনিক কিডনী ৰোগৰ প্ৰাদুৰ্ভাৱ প্ৰায় ১৩.২৪ শতাংশ বুলি অনুমান কৰা হৈছে। ইপিনে, নেচনেল চেণ্টাৰ ফৰ ডিজিজ কন্ট্ৰ’লৰ ২০২৪ চনৰ এক সমীক্ষাত পোহৰলৈ আহিছে যে দেশৰ চিকিৎসালয়সমূহত প্ৰথম পৰ্যায়ৰ চিকিৎসা হিচাপে ব্যৱহাৰ কৰিবলগীয়া ‘এক্সেছ’ এণ্টিবায়টিকৰ ব্যৱহাৰ পৰ্যাপ্ত নোহোৱাৰ বিপৰীতে প্ৰতিৰোধ ক্ষমতা অধিক থকা ‘ৱাচ’ (Watch) এণ্টিবায়টিকৰ অত্যধিক ব্যৱহাৰ হৈছে। চিডিএছচিঅ’ৰ শেহতীয়া নিৰ্দেশনাটোত ঔষধ আৰু প্ৰসাধন আইনৰ অধীনত পেইনকিলাৰ আৰু এণ্টিবায়টিকক কেৱল চিকিৎসকৰ প্ৰেছক্ৰিপচনৰ আধাৰত বিক্ৰী কৰিব পৰা ঔষধ হিচাপে শ্ৰেণীভুক্ত কৰা হৈছে। সংস্থাটোৱে চিকিৎসকসকলকো বৃক্কৰোগৰ শংকা থকা ৰোগীক অতি কম সময়ৰ বাবে ন্যূনতম মাত্ৰাত পেইনকিলাৰ প্ৰদান কৰিবলৈ নিৰ্দেশ দিছে।
বৰ্তমান ভাৰতত সাধাৰণ বিষনাশক, জ্বৰৰ ঔষধ আৰু এণ্টিবায়টিক নিজৰ ইচ্ছা অনুসৰি ফাৰ্মাচীৰ পৰা কিনি খোৱাৰ এক সাধাৰণ প্ৰৱণতা দেখা গৈছে। এই সমস্যাৰ মোকাবিলা কৰিবলৈ ঔষধ বিক্ৰেতা আৰু ফাৰ্মাচীসমূহক চিকিৎসকৰ প্ৰেছক্ৰিপচনৰ নিয়ম কঠোৰভাৱে বলৱৎ কৰিবলৈ নিৰ্দেশ দিয়া হৈছে। সমান্তৰালভাৱে, চিকিৎসালয় আৰু ৰাজ্যিক ঔষধ নিয়ন্ত্ৰকসমূহক এই ক্ষেত্ৰত তদাৰকী ব্যৱস্থা কটকটীয়া কৰিবলৈ আৰু বৃক্কৰ ৰোগ তথা এণ্টিমাইক্ৰ’বিয়েল ৰেজিষ্টেন্সৰ দৰে ভয়াবহ পৰিণামৰ বিষয়ে ৰাইজৰ মাজত সজাগতা বৃদ্ধি কৰিবলৈ চৰকাৰে নিৰ্দেশ প্ৰদান কৰিছে।
