মহাপুৰুষ শ্ৰীমন্ত শংকৰদেৱৰ মহান দৰ্শন আৰু আদৰ্শৰ প্ৰতি শ্ৰদ্ধা জনোৱাৰ লগতে যুৱপ্ৰজন্মৰ মাজত ইয়াৰ প্ৰসাৰ ঘটোৱাৰ উদ্দেশ্যে অহা ৮ আৰু ৯ অক্টোবৰত গুৱাহাটীত ‘তৃতীয় বীণা চৌধুৰী শ্ৰীমন্ত শংকৰদেৱ ঐতিহ্য মহোৎসৱ ২০২৬’ অনুষ্ঠিত হ’ব। শ্ৰীমন্ত শংকৰ একাডেমী আৰু গিৰিজানন্দ চৌধুৰী বিশ্ববিদ্যালয়ৰ যৌথ উদ্যোগত আজাৰাস্থিত বিশ্ববিদ্যালয় চৌহদত এই মহোৎসৱৰ আয়োজন কৰা হৈছে। ২৩ ছেপ্টেম্বৰত গুৱাহাটী প্ৰেছ ক্লাবত আয়োজিত এখন সংবাদমেলযোগে উদযাপন সমিতিয়ে এই দুদিনীয়া বৰ্ণাঢ্য সাংস্কৃতিক কাৰ্যসূচীৰ কথা আনুষ্ঠানিকভাৱে ঘোষণা কৰে।
আঞ্চলিক সাংস্কৃতিক শিপাৰ সৈতে নৱপ্ৰজন্মৰ প্ৰকাশভংগীৰ সমন্বয় সাধনৰ লক্ষ্যৰে আয়োজিত এই মহোৎসৱত পৰম্পৰাগত কলা আৰু শৈক্ষিক প্ৰতিযোগিতাৰ এক বিশাল সমাহাৰ ঘটিব। আয়োজক সমিতিয়ে জানিবলৈ দিয়া অনুসৰি, বিদ্যালয় আৰু মহাবিদ্যালয় পৰ্যায়ৰ ছাত্ৰ-ছাত্ৰীসকলৰ বাবে বৰগীত, সত্ৰীয়া নৃত্য, ঐতিহ্যমূলক কুইজ, ৰচনা প্ৰতিযোগিতা আৰু চাৰুকলাৰ দৰে বিভিন্ন প্ৰতিযোগিতামূলক অনুষ্ঠানৰ আয়োজন কৰা হৈছে। ইয়াৰ উপৰিও, আঞ্চলিক পৰ্যায়ৰ নৱাগত আৰু উদীয়মান শিল্পীসকলৰ প্ৰতিভাক স্বীকৃতি আৰু উৎসাহ প্ৰদান কৰাৰ উদ্দেশ্যে এই মহোৎসৱত বিশেষ ‘ঐতিহ্য বঁটা’ প্ৰদান কৰা হ’ব.
প্ৰতিযোগিতামূলক অনুষ্ঠানসমূহৰ সমান্তৰালভাৱে দৰ্শনাৰ্থীসকলৰ আকৰ্ষণৰ বাবে মহোৎসৱস্থলীত আন কেতবোৰ ব্যতিক্ৰমী কাৰ্যসূচীৰো ব্যৱস্থা কৰা হৈছে। লোক-সংস্কৃতিৰ সৈতে ৰাইজক একাত্ম কৰোৱাৰ প্ৰয়াসেৰে পৰম্পৰাগত অসমীয়া মুখাশিল্প আৰু সাঁচিপতীয়া লিখনশৈলীৰ কৰ্মশালা অনুষ্ঠিত কৰা হ’ব। লগতে আঞ্চলিক কলা আৰু ঐতিহাসিক শিল্পকৰ্ম প্ৰদৰ্শন কৰা এখন বিশেষ ‘ঐতিহ্য প্ৰদৰ্শনী’য়েও দৰ্শনাৰ্থীসকলক বাৰুকৈয়ে আকৰ্ষণ কৰিব। আধুনিক সমাজত থলুৱা পৰম্পৰাৰ গুৰুত্ব আৰু প্ৰাসংগিকতা সন্দৰ্ভত এক বিস্তৃত আলোচনাৰ বাবে পণ্ডিত, শিল্পী আৰু সংস্কৃতিপ্ৰেমীসকলৰ অংশগ্ৰহণেৰে এখন বিশেষ পেনেল আলোচনা চক্ৰৰো আয়োজন কৰা হৈছে।
অসমৰ জীৱন্ত ঐতিহ্যৰ এই মহাসংগমত অংশগ্ৰহণ কৰি অনুষ্ঠানটি সাফল্যমণ্ডিত কৰি তুলিবলৈ উদযাপন সমিতিয়ে সাংস্কৃতিক জগতৰ ব্যক্তি, শিক্ষাবিদ, ছাত্ৰ-ছাত্ৰী আৰু সৰ্বসাধাৰণ ৰাইজক আন্তৰিকতাৰে আমন্ত্ৰণ জনাইছে। মহোৎসৱ সম্পৰ্কীয় সবিশেষ তথ্য জানিব বিচৰা ব্যক্তি তথা সংবাদ মাধ্যমৰ প্ৰতিনিধিসকলে গিৰিজানন্দ চৌধুৰী বিশ্ববিদ্যালয়ৰ সাংবাদিকতা আৰু গণসংযোগ বিভাগৰ মুৰব্বী ড° পূজা সেনক ৯১০১০ ৭১৪১০ ম’বাইল নম্বৰত অথবা [email protected] ই-মেইল ঠিকনাত যোগাযোগ কৰিব পাৰিব বুলি কৰ্তৃপক্ষই অৱগত কৰিছে।
