বলীউড আৰু হিন্দী টেলিভিছন জগতৰ অন্যতম জনপ্ৰিয় আৰু প্ৰবীণ অভিনেতা মুস্তাক খানৰ মৃত্যু হৈছে। হাওঁফাওঁৰ কৰ্কট ৰোগৰ সৈতে দীৰ্ঘদিনীয়া যুঁজৰ অন্তত বৃহস্পতিবাৰে মুম্বাইত তেওঁৰ মৃত্যু হয়। তেওঁৰ বয়স আছিল মাত্ৰ ৫৬ বছৰ।
পৰিয়ালৰ সূত্ৰ অনুসৰি তেওঁৰ হাওঁফাওঁৰ কৰ্কট ৰোগ ধৰা পৰিছিল। চিকিৎসাৰ পিছত তেওঁ সুস্থও হৈ উঠিছিল। অৱশ্যে মাত্ৰ ৮ দিন পূৰ্বে তেওঁৰ শৰীৰত ৰোগটো মাৰাত্মকভাৱে পুনৰ ঘূৰি আহিছিল।
তেওঁক ততাতৈয়াকৈ চিকিৎসালয়লৈ লৈ যোৱা হয় যদিও তেওঁক ৰক্ষা কৰিব পৰা নগ’ল। চিকিৎসকে কয় যে তেওঁৰ শৰীৰৰ কেন্সাৰ শেষ পৰ্যায়ত আছিল। বৃহস্পতিবাৰে সন্ধিয়া ৭ বজাত খানে শেষ নিশ্বাস ত্যাগ কৰে।
তিনি দশকৰো অধিক দীঘলীয়া অভিনয় জীৱনত মুস্তাক খানে বহুমাত্ৰিক চৰিত্ৰৰে দৃষ্টি আকৰ্ষণ কৰিছিল। বিশেষকৈ তেওঁৰ নিখুঁত ‘কমিক টাইমিং’য়ে তেওঁক দৰ্শক আৰু সমালোচকৰ প্ৰিয় কৰি তুলিছিল।
২০০০ চনৰ ছুপাৰহিট ছবি ‘হেৰা ফেৰী’ত ‘দেৱৰাজ পুৰীৰ সহায়ক’ বা ‘ৰাউডী ৰাথোৰ’ৰ দৰে ছবিত তেওঁৰ অভিনয় আজিও ছবিৰ দৰ্শকৰ মনত আছে।
অৱশ্যে তেওঁৰ অভিনয় জীৱনৰ অন্যতম স্মৰণীয় আৰু আকৰ্ষণীয় অভিনয় হৈছে ২০০৭ চনৰ ব্লকবাষ্টাৰ ছবি ‘ৱেলকাম’ত। অক্ষয় কুমাৰ আৰু কেটৰিনা কাইফে অভিনয় কৰা এই ছবিখনত তেওঁৰ এটা সংলাপ ভাৰতীয় পপ-সংস্কৃতিত অমৰ হৈয়েই আছে – “মেৰী এক টাং নকলি হায়, মেইন হকী কা বাহাত বৰা খিলাড়ি থা… এক দিন উদয় ভাই…” তেওঁৰ মুখৰ এই সংলাপ আৰু আইকনিক দৃশ্যই বছৰ বছৰ ধৰি ছ’চিয়েল মিডিয়াত মিম আৰু হাঁহিৰ অফুৰন্ত উৎস হৈ আহিছে।
কেৱল পুৰণি চিনেমাতে নহয়, শেহতীয়া সময়তো তেওঁ নিয়মীয়াকৈ ডাঙৰ পৰ্দাত কাম কৰি আহিছে। বক্স অফিচত আলোড়নৰ সৃষ্টি কৰা ‘গাদৰ ২’, ‘ষ্ট্ৰী ২’ আৰু ‘বধাই দো’ৰ দৰে ব্যৱসায়িকভাৱে সফল ছবিতো তেওঁৰ গুৰুত্বপূৰ্ণ ভূমিকা আছিল।সৰু পৰ্দাতো তেওঁ সমানেই ভাল কাম কৰিছে; জনপ্ৰিয় ধাৰাবাহিক ‘কুচ ৰং প্যাৰ কে এইছে ভী’ত তেওঁৰ অভিনয়ে দৰ্শকৰ হৃদয় জয় কৰিছিল।
মুস্তাক খানৰ আকস্মিক মৃত্যুৱে ভাৰতীয় চলচ্চিত্ৰ জগতত শোকৰ ছাঁ পেলাইছে। বলীউডত তেওঁৰ বহু সহ-অভিনেতা আৰু অনুৰাগীয়ে ছ’চিয়েল মিডিয়াত এই প্ৰতিভাৱান শিল্পীগৰাকীক গভীৰ শ্ৰদ্ধা আৰু সমবেদনা জনাইছে।
