ইউক্ৰেইন আৰু ইৰাণ-উপসাগৰীয় সংঘাতৰ ফলত সমগ্ৰ বিশ্বই আগন্তুক মাহকেইটাত এক “ভয়াবহ খাদ্য সংকট”ৰ সন্মুখীন হ’ব পাৰে বুলি সতৰ্কবাণী কৰিছে ভাৰতৰ বৈদেশিক পৰিক্ৰমা মন্ত্ৰী এছ. জয়শংকৰে। সোমবাৰে অৰ্থাৎ ২৮ ছেপ্টেম্বৰত নিউয়ৰ্কৰ এছিয়া ছ’চাইটিত অনুষ্ঠিত এক বাৰ্তালাপত অংশগ্ৰহণ কৰি তেওঁ কয় যে এই সংঘাতসমূহৰ ফলত বিশ্বজুৰি সাৰৰ তীব্ৰ নাটনি হোৱাৰ লগতে ‘গোলকীয় দক্ষিণ’ৰ (Global South) উন্নয়নশীল অৰ্থনীতিসমূহ অত্যন্ত চাপৰ সন্মুখীন হৈছে।
বৰ্তমানৰ গোলকীয় শক্তি পৰিস্থিতিৰ ওপৰত আলোকপাত কৰি মন্ত্ৰীগৰাকীয়ে কয় যে আন্তঃৰাষ্ট্ৰীয় বজাৰত শক্তিৰ যোগান অত্যন্ত সীমিত হৈ পৰিছে। ইয়াৰ ওপৰতো যদি কোনো ৰাষ্ট্ৰই ৰাজনীতি কৰিবলৈ বিচাৰে, তেন্তে ই বজাৰখনক অধিক জটিল কৰি তুলিব। তেল যোগানৰ নিৰাপত্তা আৰু ইয়াক লৈ চলা ৰাজনীতিয়ে পৰস্পৰক প্ৰভাৱিত কৰি এক দুৰ্ঘোৰ সংকটৰ সৃষ্টি কৰা বুলি তেওঁ উল্লেখ কৰে। খাদ্য সংকট সন্দৰ্ভত তেওঁ কয় যে বৰ্তমান বিশ্বৰ প্ৰধান শস্য ৰপ্তানিকাৰী ৰাষ্ট্ৰসমূহে বিশেষকৈ কৃষ্ণ সাগৰৰ মাজেৰে নিজৰ সামগ্ৰী প্ৰেৰণ কৰাত ব্যৰ্থ হৈছে। ইয়াৰ সমান্তৰালভাৱে পশ্চিম এছিয়া আৰু ৰাছিয়াৰ দৰে প্ৰধান সাৰ উৎপাদক ৰাষ্ট্ৰসমূহত উৎপাদন প্ৰভাৱিত হোৱাৰ ফলত বিশ্বজুৰি সাৰৰো বৃহৎ নাটনি দেখা গৈছে।
ছুপাৰ এল নিন’ৰ দৰে জলবায়ু পৰিৱৰ্তনৰ প্ৰভাৱৰ সৈতে এই সংঘাতসমূহ একত্ৰিত হ’লে আগন্তুক মাহকেইটাত এক বৃহৎ খাদ্য সংকটৰ সৃষ্টি হ’ব বুলি জয়শংকৰে সকীয়াই দিয়ে। তেওঁ বিশ্লেষণ কৰি কয় যে শক্তি সংকট, খাদ্য আৰু সাৰৰ নাটনিৰ লগতে যুদ্ধৰ সময়ত বিত্তীয় পুঁজি গোলকীয় দক্ষিণৰ পৰা সুৰক্ষিত স্থানলৈ গুচি যোৱাৰ ফলত উন্নয়নশীল ৰাষ্ট্ৰসমূহত এক তীব্ৰ অৰ্থনৈতিক হেঁচা পৰিছে। এই সন্দৰ্ভত উন্নত ৰাষ্ট্ৰসমূহৰ নীতিনিৰ্ধাৰকসকলক সমালোচনা কৰি তেওঁ কয় যে কোনো দেশেই ইমানেই আত্মকেন্দ্ৰিক হোৱা উচিত নহয় য’ত তেওঁলোকে নিজৰ সিদ্ধান্তৰ দ্বাৰা আনৰ জীৱনলৈ নমাই অনা দুৰ্যোগক কেৱল ‘অনিচ্ছাকৃত’ বুলি আওকাণ কৰিব পাৰে।
ৰাজনৈতিক অস্থিৰতাৰ প্ৰসংগ টানি বৈদেশিক পৰিক্ৰমা মন্ত্ৰীগৰাকীয়ে কয় যে শক্তি সংকটে প্ৰত্যক্ষভাৱে ৰাজনৈতিক অস্থিৰতাৰ সৃষ্টি কৰে, যিটো ইউক্ৰেইন যুদ্ধৰ পাছত ভাৰতৰ চুবুৰীয়া ৰাষ্ট্ৰসমূহত পৰিলক্ষিত হৈছিল। ইৰাণ আৰু উপসাগৰীয় অঞ্চলৰ বৰ্তমানৰ পৰিস্থিতিয়ে এই অস্থিৰতা আৰু অধিক বৃদ্ধি কৰিব বুলি তেওঁ আশংকা প্ৰকাশ কৰে। গোলকীয় সংঘাতৰ মাজতো একাংশ দেশে নিজৰ স্বাধীনতা আৰু স্বতন্ত্ৰতা বজাই ৰাখিবলৈ সক্ষম হ’ব যদিও আন একাংশৰ বাবে সেয়া কঠিন হৈ পৰিব পাৰে বুলিও তেওঁ মন্তব্য কৰে। অৱশ্যে পৰিস্থিতি সাপেক্ষে কোনো দেশে বুজাবুজিৰে আগবাঢ়িব আৰু কোনো দেশে সংঘাতৰ প্ৰতিৰোধ কৰিব বুলিও তেওঁ প্ৰতিবেদনত উল্লেখ কৰে।
