বৈধ নথিপত্ৰ নথকা মানেই গৰু সৰবৰাহৰ উদ্দেশ্য গো-হত্যা হ’ব নোৱাৰে বুলি এক ঐতিহাসিক ৰায় প্ৰদান কৰিছে উচ্চতম ন্যায়ালয়ে। ছত্তীশগড়ত বেআইনীভাৱে গৰু কঢ়িওৱাৰ অভিযোগত দণ্ডিত সুৰভ বাজাজ নামৰ ব্যক্তিগৰাকীক দোষমুক্ত কৰি শীৰ্ষ আদালতে প্ৰকাশ কৰে যে উপযুক্ত প্ৰমাণ অবিহনে কেৱল এজন হেড কনিষ্টবলৰ সন্দেহ বা অনুমানৰ ভিত্তিত কোনো ব্যক্তিক অপৰাধী সজাব নোৱাৰি।
প্ৰাপ্ত তথ্য অনুসৰি, সুৰভ বাজাজক ছত্তীশগড়ত ৩২ টা বলধ গৰু বেআইনীভাৱে সৰবৰাহ কৰাৰ অভিযোগত গ্ৰেপ্তাৰ কৰা হৈছিল। ছত্তীশগড়ৰ গবাদি পশু সংৰক্ষণ আইন, ২০০৪ ৰ অধীনত নিম্ন আদালতে তেওঁক দোষী সাব্যস্ত কৰি এবছৰৰ কাৰাদণ্ড আৰু ১,০০০ টকাৰ জৰিমনা বিহিছিল। পৰৱৰ্তী সময়ত ছত্তীশগড় উচ্চ ন্যায়ালয়েও নিম্ন আদালতৰ এই ৰায় বাহাল ৰাখিছিল। কিন্তু সৰ্বোচ্চ ন্যায়ালয়ে এই দুয়োখন আদালতৰ ৰায় নাকচ কৰি অভিযুক্তগৰাকীক সসন্মানে অপৰাধমুক্ত কৰে।
শীৰ্ষ আদালতৰ বিচাৰপীঠখনে নিৰীক্ষণ কৰে যে ছত্তীশগড়ৰ উক্ত আইনখনৰ অধীনত কাৰোবাক দোষী সাব্যস্ত কৰিবলৈ হ’লে তদন্তকাৰী সংস্থাৰ হাতত স্পষ্ট প্ৰমাণ থাকিব লাগিব যে গবাদি পশুসমূহ সঁচাকৈয়ে হত্যাৰ উদ্দেশ্যে লৈ যোৱা হৈছিল বা তেনে কোনো সম্ভাৱনা আছিল। কিন্তু এই গোচৰটোত আৰক্ষীৰ অনুমানৰ বাহিৰে আন কোনো নিৰ্দিষ্ট প্ৰমাণ দাখিল কৰিব পৰা হোৱা নাছিল। তদুপৰি, আদালতত এজন পশু চিকিৎসক আৰু এখন গোশালা সমিতিৰ মতামতো গ্ৰহণ কৰা হৈছিল। তেওঁলোকে জনোৱা মতে, জব্দ কৰা বলধকেইটা কৃষিকৰ্মৰ বাবে সম্পূৰ্ণ উপযুক্ত আছিল, সেয়েহে সেইবোৰ হত্যাৰ উদ্দেশ্যে নিয়াৰ সম্ভাৱনা অতি ক্ষীণ আছিল।
সকলো পক্ষৰ যুক্তি আৰু তথ্য-প্ৰমাণ পৰীক্ষা কৰাৰ অন্তত উচ্চতম ন্যায়ালয়ে উল্লেখ কৰে যে অভিযুক্তৰ হাতত গৰু সৰবৰাহৰ বৈধ নথিপত্ৰ নাছিল যদিও কেৱল তাৰ ভিত্তিতে পশুকেইটা জবাই কৰাৰ উদ্দেশ্যে নিয়া হৈছিল বুলি ধৰি ল’ব নোৱাৰি। সেয়েহে নিম্ন আদালত আৰু উচ্চ ন্যায়ালয়ে প্ৰদান কৰা পূৰ্বৰ ৰায় বাহাল ৰখাৰ কোনো যুক্তি নাই বুলি উল্লেখ কৰি সৰ্বোচ্চ ন্যায়ালয়ে সমগ্ৰ গোচৰটোৰ পৰিসমাপ্তি ঘটায় আৰু অভিযুক্তক সসন্মানে মুক্তি প্ৰদান কৰে।
