উচ্চতম ন্যায়ালয়ত শপতনামা দাখিল কৰি বিজেপি নেতৃত্বাধীন কেন্দ্ৰীয় চৰকাৰে জানিবলৈ দিছে যে অসমৰ এনআৰচিৰ পৰা বাদ পৰা ১৯ লাখৰো অধিক লোকক প্ৰত্যাখ্যান পত্ৰ বিতৰণৰ কাম বিগত সাত বছৰেও আৰম্ভ কৰা হোৱা নাই। উল্লেখযোগ্য যে, এই পত্ৰ লাভ কৰাৰ পাছতহে নাম বাদ পৰা লোকসকলে বিদেশী ন্যায়াধিকৰণত নিজৰ নাগৰিকত্বৰ দাবীৰে আইনী প্ৰত্যাহ্বান জনাব পাৰিব। এনআৰচি উন্নীতকৰণ প্ৰক্ৰিয়াৰ এইটো এটা অতি নিৰ্ণায়ক পদক্ষেপ যদিও বৰ্তমানলৈকে ইয়াৰ কোনো বাস্তৱায়ন নোহোৱাটোৱে চৰকাৰৰ ভূমিকাক লৈও প্ৰশ্নৰ উদ্ৰেক কৰিছে।
যোৱা ২৮ ছেপ্টেম্বৰত উচ্চতম ন্যায়ালয়ত দাখিল কৰা এখন শপতনামাত ভাৰতৰ মহাপঞ্জীয়কে প্ৰকাশ কৰিছে যে ৰাজ্যিক সমন্বয়কৰ দ্বাৰা এনআৰচিৰ তথ্যৰ সুৰক্ষা ব্যৱস্থাৱলী প্ৰস্তুত কৰাৰ কাম বৰ্তমানো চলি আছে। ইয়াৰ ফলস্বৰূপে মহাপঞ্জীয়কৰ সৈতে তথ্যসমূহ এতিয়াও বিনিময় কৰা হোৱা নাই। ন্যায়াধীশ পি এছ নৰসিংহ আৰু ন্যায়াধীশ অলোক আৰাধেৰে গঠিত বিচাৰপীঠৰ সন্মুখত মহাপঞ্জীয়কে স্পষ্ট কৰি দিয়ে যে তথ্য লাভ কৰাৰ পাছতহে চূড়ান্ত এনআৰচিৰ অধিসূচনা জাৰি কৰিব পৰা যাব। ৰাজ্যিক এনআৰচি সমন্বয়কে প্ৰত্যাখ্যান পত্ৰ প্ৰদানৰ প্ৰক্ৰিয়া বৰ্তমানলৈকে আৰম্ভ কৰা নাই বুলিও বিচাৰপীঠক অৱগত কৰা হয়।
উল্লেখযোগ্য যে, ২০১৯ চনৰ ১৩ আগষ্টত সৰ্বোচ্চ ন্যায়ালয়ে আধাৰৰ তথ্যৰ দৰেই এনআৰচিৰ তথ্যৰ বাবেও এক কটকটীয়া সুৰক্ষা ব্যৱস্থা গঢ়ি তুলিবলৈ নিৰ্দেশ দিছিল। শেহতীয়া শপতনামাত কেন্দ্ৰই প্ৰকাশ কৰিছে যে এই সুৰক্ষা ব্যৱস্থা এতিয়াও প্ৰস্তুতিৰ পৰ্যায়তে আছে। আনহাতে, সংবাদ মাধ্যমত প্ৰকাশিত তথ্য অনুসৰি, ২০১২ চনতে গৃহ মন্ত্ৰণালয়ে অসমৰ বিজেপি চৰকাৰক নাগৰিকৰ তালিকাৰ পৰা নাম বাদ পৰা আৱেদনকাৰীসকলক তৎকালীনভাৱে প্ৰত্যাখ্যান পত্ৰ প্ৰদান কৰিবলৈ নিৰ্দেশ দিছিল।
উল্লেখ্য যে, ১৯৫১ চনৰ পাছত প্ৰথমবাৰৰ বাবে অসমত উন্নীত কৰা এনআৰচিৰ বাবে প্ৰায় ৩.২৯ কোটি লোকে আৱেদন কৰিছিল। কিন্তু ২০১৯ চনত ভাৰতৰ মহাপঞ্জীয়কে প্ৰকাশ কৰা চূড়ান্ত তালিকাত ১৯,০৬,৬৫৭ গৰাকী লোকৰ নাম বাদ পৰে। শেহতীয়াকৈ উচ্চতম ন্যায়ালয়ত অনুষ্ঠিত শুনানিত অসম চৰকাৰে নিজৰ স্থিতি জনাবলৈ সময় বিচৰাত পৰৱৰ্তী শুনানি অহা ৬ নৱেম্বৰলৈ পিছুৱাই দিয়া হৈছে। বৰ্তমান সম্পূৰ্ণৰূপে স্থবিৰ হৈ থকা প্ৰত্যাখ্যান পত্ৰ বিতৰণ আৰু চূড়ান্ত এনআৰচি প্ৰকাশৰ প্ৰক্ৰিয়াটোৱে ন্যায়ালয়ৰ এই পৰৱৰ্তী শুনানিৰ পাছতহে এক স্পষ্ট গতি লাভ কৰিব বুলি আশা কৰা হৈছে।
