আন্তঃৰাষ্ট্ৰীয় অলিম্পিক কমিটীয়ে (আইঅ’চি) ২০৩৬ চনৰ গ্ৰীষ্মকালীন অলিম্পিক আয়োজনৰ বাবে প্ৰতিদ্বন্দ্বিতাত অৱতীৰ্ণ হোৱা সাতখন দেশৰ তালিকাত ভাৰতৰ লগতে কাটাৰৰ নাম মঙলবাৰে আনুষ্ঠানিকভাৱে নিশ্চিত কৰিছে। এই দৌৰত অংশগ্ৰহণ কৰা আন দেশসমূহ হৈছে দক্ষিণ আফ্ৰিকা, দক্ষিণ কোৰিয়া, জাৰ্মানী, হাংগেৰী আৰু তুৰস্ক। অহা ২০২৯ চনত আইঅ’চিৰ শতাধিক সদস্যৰ মাজত অনুষ্ঠিত হ’বলগীয়া এক প্ৰতিযোগিতামূলক ভোটদান প্ৰক্ৰিয়াৰ জৰিয়তে ২০৩৬ চনৰ আয়োজক দেশৰ নাম চূড়ান্ত কৰা হ’ব বুলি কমিটীয়ে জানিবলৈ দিছে। ভাৰত আৰু কাটাৰক দীৰ্ঘদিন ধৰি অলিম্পিক আয়োজনৰ বাবে প্ৰধান দাবীদাৰ হিচাপে গণ্য কৰা হৈছে। উল্লেখযোগ্য যে, আইঅ’চিৰ ভোটাধিকাৰ থকা সদস্যসকলৰ ভিতৰত ভাৰতৰ নিতা আম্বানি আৰু কাটাৰৰ আমিৰ শ্বেইখ তামিম বিন হামাদ আল থানিও অন্তৰ্ভুক্ত।
আন্তঃৰাষ্ট্ৰীয় অলিম্পিক কমিটীয়ে জনোৱা মতে, এই সাতখন দেশৰ সৈতে ভৱিষ্যতৰ ২০৪০ আৰু ২০৪৪ চনৰ সংস্কৰণসমূহৰ আয়োজনক লৈয়ো আলোচনা চলি আছে। এই প্ৰসংগত আইঅ’চিৰ অধ্যক্ষা তথা দুবাৰকৈ সাঁতোৰত স্বৰ্ণ পদক বিজয়ী কাৰ্ষ্টি কভেন্ট্ৰীয়ে কয় যে গেমছ য’তেই অনুষ্ঠিত নহওক কিয়, খেলুৱৈসকল সদায় সকলো কামৰ কেন্দ্ৰবিন্দুত থাকিব লাগিব। ইয়াৰ উপৰিও, ২০৩৬ চনৰ আয়োজকৰ দৌৰত অংশগ্ৰহণ কৰিব বিচৰা আন ৰাষ্ট্ৰীয় অলিম্পিক সংস্থাসমূহৰ বাবে কমিটীয়ে ৩১ অক্টোবৰৰ সময়সীমা বান্ধি দিয়াৰ লগতে মঙলবাৰে নিবিদা দাখিলকাৰী দেশসমূহৰ নিৰ্দেশনাৰ বাবে এখন ৩০ পৃষ্ঠাৰ নথিপত্ৰ প্ৰকাশ কৰিছে।
নিবিদা দাখিল কৰা দেশসমূহৰ প্ৰস্তাৱিত চহৰসমূহৰ ভিতৰত ভাৰতৰ দাবী প্ৰধানকৈ আহমেদাবাদ চহৰক কেন্দ্ৰ কৰি গঢ় লৈ উঠিছে। এই চহৰখনে ২০৩০ চনৰ কমনৱেলথ গেমছ আয়োজন কৰিব আৰু ইয়াত প্ৰধানমন্ত্ৰী নৰেন্দ্ৰ মোদীৰ নামত নামাংকিত বিশ্বৰ সৰ্ববৃহৎ ক্ৰিকেট ষ্টেডিয়ামখন অৱস্থিত। আনহাতে, ২০২২ চনৰ ফুটবল বিশ্বকাপকে ধৰি বহুতো বিশ্ব চেম্পিয়নশ্বিপ সফলতাৰে আয়োজন কৰা কাটাৰে দোহাৰ লগতে চুবুৰীয়া উপসাগৰীয় দেশসমূহতো ক্ৰীড়াসমূহ অনুষ্ঠিত কৰাৰ প্ৰস্তাৱ দিব পাৰে। অৱশ্যে, কাটাৰত অলিম্পিক অনুষ্ঠিত হ’লে ২০০৪ চনৰ আথেন্স অলিম্পিকৰ পৰা ২০৩২ চনৰ ব্ৰিছবেন অলিম্পিকলৈকে প্ৰচলিত হৈ অহা জুলাই-আগষ্ট মাহৰ সময়সূচী সলনি কৰাৰ প্ৰয়োজন হ’ব। ইফালে, দক্ষিণ কোৰিয়াৰ প্ৰস্তাৱ ১৯৮৮ চনৰ আয়োজক চহৰ ছিউলক কেন্দ্ৰ কৰি সমগ্ৰ দেশজুৰি বিস্তৃত হৈ আছে। যোৱা মাহত জাৰ্মানীৰ অলিম্পিক বিষয়াসকলে ১৯৭২ চনৰ আয়োজক চহৰ মিউনিখক নিৰ্বাচন কৰিছে। আনহাতে, দক্ষিণ আফ্ৰিকাৰ প্ৰস্তাৱ কেপ টাউনক কেন্দ্ৰ কৰি প্ৰস্তুত কৰা হৈছে আৰু নিৰ্বাচিত হ’লে ১৮৯৬ চনত আধুনিক অলিম্পিক সৃষ্টি হোৱাৰ পাছত গ্ৰীষ্মকালীন অলিম্পিক আয়োজন কৰা এইখন প্ৰথম আফ্ৰিকীয় দেশ হ’ব। একেদৰে হাংগেৰী আৰু তুৰস্কই ক্ৰমে বুডাপেষ্ট আৰু ইস্তানবুলক প্ৰস্তাৱিত চহৰ হিচাপে আগবঢ়াইছে।
আইঅ’চিৰ মতে, অহা মাৰ্চ মাহত কাৰ্ষ্টি কভেন্ট্ৰীৰ নেতৃত্বত থকা কাৰ্যবাহী ব’ৰ্ডে প্ৰাৰ্থী দেশসমূহৰ এখন সংক্ষিপ্ত তালিকা অনুমোদন কৰিব আৰু তাৰ পাছতহে প্ৰকল্পসমূহৰ বিতং পৰ্যালোচনা কৰা হ’ব। পৰৱৰ্তী আঢ়ৈ বছৰীয়া প্ৰচাৰ অভিযানৰ অন্তত ২০২৯ চনত ভোটদানৰ জৰিয়তে আয়োজক দেশ নিৰ্বাচন কৰাৰ এই প্ৰক্ৰিয়াটোৱে আইঅ’চিৰ পুৰণি আৰু দীৰ্ঘম্যাদী পৰম্পৰালৈ ঘূৰি যোৱাটো সূচাইছে। উল্লেখযোগ্য যে, ২০৩২ চনৰ ব্ৰিছবেন অলিম্পিকৰ বাবে ১১ বছৰ পূৰ্বেই বিনা প্ৰতিদ্বন্দ্বিতাৰে আয়োজক নিৰ্বাচন কৰা গোপন তথা দ্ৰুত প্ৰক্ৰিয়াটোক ২০২৫ চনৰ জুন মাহত কাৰ্যভাৰ গ্ৰহণ কৰাৰ পাছতেই কভেন্ট্ৰীয়ে স্থগিত ৰাখিছিল। বৰ্তমান পুনৰাই স্বচ্ছ ভোটদান প্ৰক্ৰিয়াৰ জৰিয়তে ২০৩৬ চনৰ গ্ৰীষ্মকালীন অলিম্পিকৰ আয়োজক দেশ নিৰ্বাচনৰ পথ প্ৰশস্ত হৈছে।
