ছচিয়েল মিডিয়াত এজন ভাৰতীয় যুৱকৰ সৈতে পৰিচিত হোৱাৰ পিছত থাইলেণ্ডৰ এগৰাকী সফল যুৱতীৰ গোটেই জীৱনটো এক ভয়ংকৰ বিপৰ্যয়ত পৰিণত হয়। থাইলেণ্ডত নিজৰ ব্যৱসায় চলাই থকা উপছাৰ্ন নামৰ যুৱতীগৰাকীৰ সৈতে ছচিয়েল মিডিয়াত কানপুৰৰ ইৰফান নামৰ যুৱকজনৰ চিনাকি হৈছিল আৰু লাহে লাহে সেই চিনাকি গভীৰ প্ৰেমলৈ ৰূপান্তৰিত হয়।
প্ৰেমৰ সম্পৰ্ক গভীৰ হোৱাৰ পিছত ইৰফানে থাইলেণ্ডলৈ গৈ উপছাৰ্নক বিয়াৰ প্ৰস্তাৱ দিয়ে আৰু দুয়ো বিবাহপাশত আবদ্ধ হয়। বিয়াৰ কিছুদিনৰ পাছতে নিজৰ ব্যৱসায়ৰ পুঁজিৰ প্ৰয়োজন বুলি কৈ ইৰফানে নৱ-বিবাহিতা পত্নীৰ পৰা প্ৰায় ষাঠি লাখ টকা সৰকাই লয়। তাৰ পিছত তেওঁ ভাৰতলৈ উভতি আহে। স্বামীৰ পৰা দীৰ্ঘদিন আঁতৰত থাকিবলৈ নিবিচাৰি থাই যুৱতীগৰাকীয়ে নিজৰ দেশ এৰি কানপুৰলৈ স্বামীৰ ঘৰলৈ গুচি আহে।
কানপুৰলৈ অহাৰ পিছতেই উপছাৰ্নৰ চকু কপালত উঠে। তেওঁ জানিব পাৰে যে ইৰফানৰ পূৰ্বৰে পৰা এগৰাকী পত্নী আৰু সন্তান আছে, যি কথা তেওঁৰ পৰা সম্পূৰ্ণ গোপনে ৰখা হৈছিল। এই প্ৰৱঞ্চনাৰ প্ৰতিবাদ কৰাত উপছাৰ্নৰ ওপৰত আৰম্ভ হয় শাৰীৰিক আৰু মানসিক নিৰ্যাতন। ইৰফানে তেওঁক মুকলিকৈ কয় যে যদি তেওঁ লগত থাকিব বিচাৰে, তেন্তে বাধ্যতামূলকভাৱে ইছলাম ধৰ্ম গ্ৰহণ কৰিব লাগিব আৰু বুৰ্খা পিন্ধি থাকিব লাগিব।
সৰ্বস্বান্ত হোৱা আৰু প্ৰৱঞ্চনাৰ বলি হোৱাৰ কথা বুজি পাই বিদেশী যুৱতীগৰাকীয়ে কানপুৰ আৰক্ষীৰ কাষ চাপে। আৰক্ষীয়ে সমগ্ৰ ঘটনাটো গুৰুত্বসহকাৰে লৈ তাৎক্ষণিকভাৱে তদন্ত আৰম্ভ কৰে আৰু প্ৰৱঞ্চক ইৰফানক গ্ৰেপ্তাৰ কৰে। বৰ্তমান উপছাৰ্ন আৰক্ষীৰ নিৰাপত্তাত সুৰক্ষিতভাৱে আছে আৰু নিজৰ ভয়ংকৰ অভিজ্ঞতাৰ কথা ছচিয়েল মিডিয়াত সদৰী কৰি সকলোকে সজাগ হ’বলৈ অনুৰোধ জনাইছে।
