প্ৰবীণ বিজেপি নেতা তথা দলৰ প্ৰাক্তন সভাপতি মুৰলী মনোহৰ যোশীয়ে কয় যে গণতন্ত্ৰৰ বাবে সুস্থ নিৰ্বাচন অনিবাৰ্য। তেওঁ কয় যে নিৰ্বাচন অনুষ্ঠিত কৰাৰ ক্ষেত্ৰত যদি সংবিধান উলংঘা হৈ থাকে তেন্তে উচ্চতম ন্যায়ালয়ে নিশ্চিতভাৱে হস্তক্ষেপ কৰা উচিত।
বৃহস্পতিবাৰে দিল্লীত শিক্ষা সম্পৰ্কীয় এক অনুষ্ঠানৰ সময়ত বিজেপিৰ জ্যেষ্ঠ নেতাগৰাকীয়ে এছ আই আৰ বিতৰ্কত বিৰোধীৰ আন্দোলন আৰু দাবী সন্দৰ্ভত নিজৰ মতামত দাঙি ধৰে।
বিজেপিত সদায় মোডী বিৰোধী হিচাপে পৰিচিত যোশীয়ে কয় যে যদি নিৰ্বাচন সুস্থ হয়, তেন্তে ৰাইজে নিৰ্বাচিত কৰা চৰকাৰৰ পতনৰ ভয় থাকিব নালাগে। তেওঁ লগতে আমোলাতন্ত্ৰই স্বচ্ছতাৰে নিজৰ কৰ্তব্য পালন কৰিব লাগে বুলিও কয়।
যিসময়ত দেশজুৰি বিৰোধীয়ে নিৰ্বাচন আয়োগৰ নিৰপেক্ষতাক লৈ সৰৱ হৈ পৰিছে আৰু এছ আই আৰক সমালোচনা কৰি মুখ্য নিৰ্বাচন আয়ুক্ত জ্ঞানেশ কুমাৰৰ পদত্যাগৰ দাবীত ৰাজপথত ওলাই আহিছে, সেই সময়ত বিজেপিৰ এইজন জ্যেষ্ঠ নেতাৰ বক্তব্যই দলটোৰ বাবে এক অস্বস্তিকৰ পৰিস্থিতিৰ সৃষ্টি কৰিছে বুলি অনুভৱ কৰে ৰাজনৈতিক মহলৰ একাংশই।
নিৰ্বাচন আয়োগে সাংবিধানিক অধিকাৰৰ অপব্যৱহাৰ কৰাৰ অভিযোগ উত্থাপন কৰিছে বিৰোধীয়ে। আয়োগৰ ভূমিকা এতিয়া উচ্চতম ন্যায়ালয়ৰ মজিয়াত। ভোটাৰ তালিকাত অন্তৰ্ভুক্তিৰ বাবে ব্যৱহৃত ৬ নম্বৰ প্ৰ-পত্ৰ সলনি কৰা মুখ্য নিৰ্বাচন আয়ুক্তৰ সিদ্ধান্ত সম্পৰ্কে উচ্চতম ন্যায়ালয়ে তেওঁৰ উত্তৰ বিচাৰিছে।
এই প্ৰসংগত যোশীয়ে কয় যে সংবিধান উলংঘা হৈ থাকিলে শীৰ্ষ আদালতে নিশ্চিতভাৱে হস্তক্ষেপ কৰিব লাগে।
