অসমৰ ক্ৰীড়া জগতৰ বাবে এক উল্লেখযোগ্য পদক্ষেপ। অলিম্পিকৰ পদক জয়ী তথা এছিয়ান গেমছৰ স্বৰ্ণজয়ী বক্সাৰ লাভলীনা বৰগোহাঁইৰ নামত গুৱাহাটীৰ সমীপত স্থাপন কৰা হ’ব এখন বক্সিং একাডেমী। শুকুৰবাৰে, ৯ অক্টোবৰত অনুষ্ঠিত অসম মন্ত্ৰীসভাৰ বৈঠকত এই একাডেমী স্থাপনৰ বাবে পলাশবাৰী ৰাজহ চক্ৰৰ অন্তৰ্গত চাৰি বিঘা ভূমিৰ প্ৰিমিয়াম মাত্ৰ এক টকালৈ হ্ৰাস কৰাৰ সিদ্ধান্ত গ্ৰহণ কৰা হয়।
মন্ত্ৰীসভাৰ বৈঠকৰ পিছতে মুখ্যমন্ত্ৰী হিমন্ত বিশ্ব শৰ্মাই এই কথা ঘোষণা কৰে। এই একাডেমীৰ জৰিয়তে অসমৰ নৱপ্ৰজন্মৰ বক্সাৰসকলক উন্নত প্ৰশিক্ষণৰ সুবিধা প্ৰদান কৰাৰ লগতে ৰাজ্যখনৰ পৰা ভৱিষ্যতে অধিক প্ৰতিভাশালী খেলুৱৈ গঢ়ি তোলাৰ লক্ষ্য লোৱা হৈছে। এই সন্দৰ্ভত মুখ্যমন্ত্ৰীগৰাকীয়ে সামাজিক মাধ্যমত লিখে যে অসমৰ পৰা লাভলীনাৰ দৰে আৰু খেলুৱৈ যাতে উন্নত প্ৰশিক্ষণ লাভ কৰি দেশৰ গৌৰৱ বৃদ্ধি কৰিব পাৰে, তাৰ বাবেই এই পদক্ষেপ গ্ৰহণ কৰা হৈছে।
উল্লেখ্য যে শেহতীয়াকৈ জাপানত অনুষ্ঠিত এছিয়ান গেমছত মহিলাৰ ৭৫ কিলোগ্ৰাম শাখাত স্বৰ্ণপদক জয় কৰি অসমলৈ উভতি আহিছে লাভলীনা বৰগোহাঁই। যোৱা ২ অক্টোবৰত অনুষ্ঠিত চূড়ান্ত প্ৰতিযোগিতাত চীনৰ বাও জিয়িক ৫-০ ব্যৱধানত পৰাস্ত কৰি তেওঁ এই কৃতিত্ব অৰ্জন কৰে। নিজৰ জন্মদিনতে স্বৰ্ণপদক জয় কৰি লাভলীনাই অসমৰ লগতে সমগ্ৰ দেশলৈ গৌৰৱ কঢ়িয়াই আনে।
এই জয়ৰ জৰিয়তে লাভলীনা এছিয়ান গেমছত স্বৰ্ণপদক জয় কৰা দ্বিতীয়গৰাকী ভাৰতীয় মহিলা বক্সাৰত পৰিণত হয়। ইয়াৰ পূৰ্বে ২০১৪ চনত এম চি মেৰী কমে এই কৃতিত্ব অৰ্জন কৰিছিল। উল্লেখ্য যে ২০২০ চনৰ টকিঅ’ অলিম্পিকত ব্ৰঞ্জৰ পদক জয় কৰা লাভলীনাই ২০২২ চনত চীনৰ হাংঝৌত অনুষ্ঠিত এছিয়ান গেমছৰ একেটা শাখাতে ৰূপৰ পদক লাভ কৰিছিল।
যোৱা ৬ অক্টোবৰত গুৱাহাটীৰ লোক সেৱা ভৱনত মুখ্যমন্ত্ৰী হিমন্ত বিশ্ব শৰ্মাই লাভলীনাক ৫০ লাখ টকাৰ চেক প্ৰদান কৰি তেওঁৰ কৃতিত্বৰ বাবে সম্বৰ্ধনা জনাইছিল। মুখ্যমন্ত্ৰীগৰাকীয়ে লাভলীনাৰ জয় দেশৰ বাবে গৌৰৱৰ বিষয় বুলি উল্লেখ কৰাৰ লগতে তেওঁৰ সাফল্যই নৱপ্ৰজন্মৰ খেলুৱৈসকলক অনুপ্ৰাণিত কৰিব বুলি আশা প্ৰকাশ কৰে।
ইফালে, অসমলৈ উভতি অহাৰ সময়ত গুৱাহাটীৰ লোকপ্ৰিয় গোপীনাথ বৰদলৈ আন্তঃৰাষ্ট্ৰীয় বিমানবন্দৰত লাভলীনাক উষ্ম আদৰণি জনোৱা হয়। অনুষ্ঠানত ক্ৰীড়া আৰু যুৱ কল্যাণ মন্ত্ৰী বিশ্বজিৎ দৈমাৰী, অসম বিজেপিৰ সভাপতি দিলীপ শইকীয়া, পৰিয়ালৰ লোক আৰু অনুৰাগীসকল উপস্থিত থাকে। একেদৰে কংগ্ৰেছৰ জ্যেষ্ঠ নেত্ৰী প্ৰণতি ফুকনৰ নেতৃত্বত অহা এটা প্ৰতিনিধি দলেও বিমানবন্দৰত লাভলীনাক সম্বৰ্ধনা জনায়।
