এগৰাকী মহিলা বিষয়াক চৰকাৰী অনলাইন বৈঠকৰ মাজতে অশালীন ভাষাৰে গালি-গালাজ কৰাৰ অভিযোগক লৈ তীব্ৰ বিতৰ্কৰ সৃষ্টি হোৱাৰ পিছত অৱশেষত কঠোৰ পদক্ষেপ গ্ৰহণ কৰিছে জম্মু-কাশ্মীৰ প্ৰশাসনে। জ্যেষ্ঠ আইএএছ বিষয়া কুমাৰ ৰাজীৱ ৰঞ্জনৰ বিৰুদ্ধে উত্থাপিত অভিযোগৰ সত্যতা নিৰূপণৰ বাবে ১৫ দিনৰ ভিতৰত তদন্ত সম্পূৰ্ণ কৰি প্ৰতিবেদন দাখিল কৰাৰ নিৰ্দেশ দিয়া হৈছে। এই ঘটনাক কেন্দ্ৰ কৰি শাসকীয় নেচনেল কনফাৰেন্স, পিপলছ ডেম’ক্ৰেটিক পাৰ্টি আৰু বিজেপিকে ধৰি বিভিন্ন ৰাজনৈতিক দলে অভিযুক্ত বিষয়াগৰাকীৰ বিৰুদ্ধে কঠোৰ ব্যৱস্থা গ্ৰহণৰ দাবী জনাইছে।
জম্মু-কাশ্মীৰ চৰকাৰৰ সাধাৰণ প্ৰশাসন বিভাগে জাৰি কৰা নিৰ্দেশ অনুসৰি, জ্যেষ্ঠ আইএএছ বিষয়া মনদীপ কৌৰক এই ঘটনাৰ বিভাগীয় তদন্তৰ দায়িত্ব দিয়া হৈছে। তেওঁক অহা ১৫ দিনৰ ভিতৰত অভিযোগৰ সকলো দিশ পৰীক্ষা কৰি চৰকাৰৰ ওচৰত আনুষ্ঠানিক প্ৰতিবেদন দাখিল কৰিবলৈ নিৰ্দেশ দিয়া হৈছে। আনহাতে, তদন্তৰ সময়ছোৱাত উপস্থাপনকাৰী বিষয়া হিচাপে দায়িত্ব পালন কৰিব সাধাৰণ প্ৰশাসন বিভাগৰ অতিৰিক্ত সচিব তথা জেকেএএছ বিষয়া অমিত ভৰ্মানিয়ে।
ঘটনাটোক লৈ জম্মু-কাশ্মীৰৰ ৰাজনৈতিক মহলত তীব্ৰ প্ৰতিক্ৰিয়াৰ সৃষ্টি হৈছে। ৰাজনৈতিক মতভেদ আঁতৰাই নেচনেল কনফাৰেন্স, পিপলছ ডেম’ক্ৰেটিক পাৰ্টি আৰু বিজেপিয়ে অভিযুক্ত আইএএছ বিষয়াগৰাকীৰ বিৰুদ্ধে কঠোৰ ব্যৱস্থা গ্ৰহণৰ দাবী তুলিছে। নেচনেল কনফাৰেন্সৰ মুখ্য মুখপাত্ৰ তনভীৰ ছাদিকে প্ৰকাশ কৰা অনুসৰি, মুখ্যমন্ত্ৰী ওমৰ আব্দুল্লাই ইতিমধ্যে মুখ্য সচিব অতুল ডুল্লুক ঘটনাটোৰ সম্পূৰ্ণ জবাবদিহি নিশ্চিত কৰিবলৈ নিৰ্দেশ দিছে। লগতে, অভিযোগ উত্থাপন কৰা মহিলা বিষয়াগৰাকী যাতে কোনো ধৰণৰ প্ৰতিশোধমূলক ব্যৱস্থাৰ সন্মুখীন হ’বলগীয়া নহয়, সেই কথাও নিশ্চিত কৰিবলৈ কোৱা হৈছে।
তনভীৰ ছাদিকে কয় যে প্ৰশাসনত জবাবদিহি থকাটো অতি প্ৰয়োজনীয়। কোনো বিষয়াই নিজৰ পদবীৰ ক্ষমতা ব্যৱহাৰ কৰি আনক ভয় দেখুওৱা বা হাৰাশাস্তি কৰাৰ অধিকাৰ নাই। তেওঁৰ মতে, এই ঘটনাই জম্মু-কাশ্মীৰৰ সম্পূৰ্ণ ৰাজ্যৰ মৰ্যাদা পুনৰ ঘূৰাই অনাৰ প্ৰয়োজনীয়তাকো পুনৰবাৰ চৰ্চালৈ আনিছে।
জম্মু-কাশ্মীৰৰ বৰ্তমানৰ কেন্দ্ৰীয়শাসিত অঞ্চলৰ ব্যৱস্থাৰ অধীনত নিৰ্বাচিত চৰকাৰৰ ক্ষমতা সীমিত হৈ থকাৰ বিষয়টোও উত্থাপন কৰিছে নেচনেল কনফাৰেন্সৰ মুখপাত্ৰগৰাকীয়ে। তেওঁৰ মতে, তাত কৰ্মৰত আইএএছ বিষয়াসকলৰ ওপৰত উপ-ৰাজ্যপালৰ কৰ্তৃত্ব থকাৰ বাবে মুখ্যমন্ত্ৰীয়ে তেওঁলোকৰ বিৰুদ্ধে পোনপটীয়াকৈ বদলি বা শাস্তিমূলক ব্যৱস্থা গ্ৰহণ কৰিব নোৱাৰে।
তনভীৰ ছাদিকে লগতে কয় যে জম্মু-কাশ্মীৰ পূৰ্ণ ৰাজ্য হৈ থকা হ’লে অভিযুক্ত বিষয়াগৰাকীক তাৎক্ষণিকভাৱে নিলম্বন কৰা বা সাধাৰণ প্ৰশাসন বিভাগৰ জৰিয়তে আনুষ্ঠানিক তদন্ত আৰম্ভ কৰাটো সম্ভৱ হ’লহেঁতেন। তেওঁ কয়, “এই কাৰণেই পূৰ্ণ ৰাজ্যৰ মৰ্যাদা পুনৰ লাভ কৰাৰ যুঁজখন ইমান গুৰুত্বপূৰ্ণ। ক্ষমতাশালী পদত থকা লোকসকলে কিয় বাৰে বাৰে এই দাবীক দুৰ্বল কৰিবলৈ বিচাৰে, সেয়া এই ঘটনাই স্পষ্ট কৰি দিছে।”
ছ’চিয়েল মিডিয়াত এটা ভিডিঅ’ প্ৰচাৰ হোৱাৰ পিছতে সমগ্ৰ ঘটনাটোৱে ব্যাপক চৰ্চা লাভ কৰে। শ্ৰম আৰু নিয়োগ বিভাগৰ সচিব তথা ২০১০ চনৰ আইএএছ বিষয়া কুমাৰ ৰাজীৱ ৰঞ্জনৰ সভাপতিত্বত ‘মিছন যুৱা’ আঁচনি সন্দৰ্ভত এখন উচ্চপৰ্যায়ৰ পৰ্যালোচনা বৈঠক চলি আছিল। সেই বৈঠকতে ৰাষ্ট্ৰীয় গ্ৰাম্য জীৱিকা অভিযানৰ কাম-কাজক কেন্দ্ৰ কৰি উত্তপ্ত পৰিস্থিতিৰ সৃষ্টি হয়।
বৈঠকত গান্দেৰবলৰ নিয়োগ আৰু পৰামৰ্শ কেন্দ্ৰৰ সহকাৰী সঞ্চালক বিনিশ ৱানিয়ে তেওঁৰ বিভাগৰ কাম-কাজ আৰু সফলতাৰ বিষয়ে উপস্থিত বিষয়াসকলক বুজাই আছিল। অভিযোগ অনুসৰি, সেই সময়তে কুমাৰ ৰাজীৱ ৰঞ্জনে বাৰে বাৰে তেওঁৰ কথাত বাধা দিয়ে। বিনিশ ৱানিয়ে নিজৰ বক্তব্য আৰু যুক্তি দাঙি ধৰিবলৈ চেষ্টা কৰোঁতে আইএএছ বিষয়াগৰাকীয়ে খঙত তেওঁক ‘ব্লাডি শ্বিট’ বুলি গালি পৰা বুলি অভিযোগ উঠিছে। ইয়াৰ উপৰি, বৈঠকৰ মাজতে তেওঁক নিলম্বন কৰাৰ ভাবুকিও দিয়া বুলি অভিযোগ কৰা হৈছে।
এই ঘটনাৰ পিছতে জম্মু-কাশ্মীৰ প্ৰশাসনিক সেৱা বিষয়া সংস্থাই বিনিশ ৱানিৰ পক্ষত থিয় দি ঘটনাটোক তীব্ৰ ভাষাৰে গৰিহণা দিয়ে। সংস্থাটোৰ অভিযোগ, এয়া কোনো বিচ্ছিন্ন ঘটনা নহয়। ইয়াৰ পূৰ্বেও কৰ্মস্থলীত কুমাৰ ৰাজীৱ ৰঞ্জনে অশালীন, অপমানজনক আৰু অসংসদীয় ভাষা ব্যৱহাৰ কৰাৰ অভিযোগ উত্থাপন হৈ আহিছে।
ভিডিঅ’টো প্ৰচাৰ হোৱাৰ পিছতো এই প্ৰতিবেদন যুগুত কৰা পৰ্যন্ত অভিযুক্ত আইএএছ বিষয়াগৰাকীৰ পৰা কোনো আনুষ্ঠানিক প্ৰতিক্ৰিয়া লাভ কৰা হোৱা নাই।
পিপলছ ডেম’ক্ৰেটিক পাৰ্টিৰ নেত্ৰী ইলতিজা মুফতিয়েও ঘটনাটোৰ গৰিহণা দি অভিযুক্ত বিষয়াগৰাকীৰ বিৰুদ্ধে কঠোৰ শাস্তিমূলক ব্যৱস্থা গ্ৰহণৰ দাবী জনাইছে। আনহাতে, বিজেপিৰ মুখপাত্ৰ আলতাফ ঠাকুৰে বিষয়াগৰাকীৰ আচৰণক সম্পূৰ্ণৰূপে গ্ৰহণযোগ্য নহয় বুলি মন্তব্য কৰে। তেওঁ কয় যে এগৰাকী জ্যেষ্ঠ কাশ্মীৰী মহিলা বিষয়াৰ সৈতে এনেদৰে কথা কোৱাটো কোনো কাৰণতে মানি ল’ব নোৱাৰি।
আলতাফ ঠাকুৰে লগতে অভিযোগ কৰে যে কুমাৰ ৰাজীৱ ৰঞ্জনৰ নাম ইয়াৰ পূৰ্বেও অস্ত্ৰৰ অনুজ্ঞাপত্ৰ কেলেংকাৰিৰ সৈতে জড়িত হৈ পৰিছিল। তেওঁৰ মতে, এনে অভিযোগৰ পিছত বিষয়াগৰাকীৰ বিৰুদ্ধে কঠোৰ ব্যৱস্থা গ্ৰহণ কৰা উচিত।
শ্ৰীনগৰৰ সাংসদ আগা ৰুহুল্লাহ মেহদিয়েও ঘটনাটোৰ ভিডিঅ’ সামাজিক মাধ্যমত প্ৰকাশ কৰি অভিযুক্ত বিষয়াগৰাকীক ক্ষমতাৰ অপব্যৱহাৰকাৰী বুলি সমালোচনা কৰিছে। একে সময়তে তেওঁ বৈঠকৰ মাজত নিজৰ আত্মসন্মান অক্ষুণ্ণ ৰাখি দৃঢ়তাৰে নিজৰ কথা ক’বলৈ চেষ্টা কৰা বিনিশ ৱানিৰ সাহসৰ প্ৰশংসা কৰিছে।
এক্সত দিয়া এটা পোষ্টত আগা ৰুহুল্লাহ মেহদিয়ে লিখিছে যে শ্ৰম আৰু নিয়োগ বিভাগৰ সচিবৰ দায়িত্বত থকা এগৰাকী জ্যেষ্ঠ আইএএছ বিষয়াই এগৰাকী মহিলা প্ৰশাসনিক বিষয়াৰ সৈতে যি ধৰণে কথা পাতিছে, সেয়া অত্যন্ত লজ্জাজনক। তেওঁৰ মতে, বৈঠকত উপস্থিত আন বিষয়াসকলৰ সন্মুখতে অভিযুক্ত বিষয়াগৰাকীয়ে চিঞৰ-বাখৰ কৰিছিল, কাৰণ মহিলা বিষয়াগৰাকীয়ে বিনা প্ৰতিবাদে সকলো কথা মানি ল’বলৈ সাজু নাছিল।
আগা ৰুহুল্লাহ মেহদিৰ অভিযোগ, নিজৰ পদবীৰ ক্ষমতা ব্যৱহাৰ কৰি আনৰ কৰ্মজীৱন ধ্বংস কৰাৰ ভাবুকি দিয়াটো এগৰাকী দায়িত্বশীল বিষয়াৰ বাবে কোনো কাৰণতে গ্ৰহণযোগ্য নহয়। তেওঁ কয় যে বিনিশ ৱানিয়ে অত্যন্ত সংযম আৰু সাহসেৰে নিজৰ বক্তব্য প্ৰকাশ কৰিছিল। নিজৰ কথা শেষ কৰিবলৈ বিচৰা বাবেই এগৰাকী মহিলাক কৰ্মজীৱন ধ্বংস কৰাৰ ভাবুকি দিয়াৰ অভিযোগে প্ৰশাসনৰ ভিতৰত ক্ষমতাৰ অপব্যৱহাৰৰ ছবিখন উদঙাই দিছে।
অনুচ্ছেদ ৩৭০ বাতিলৰ পিছত জম্মু-কাশ্মীৰৰ পৰিস্থিতিৰ প্ৰসংগ উত্থাপন কৰি সাংসদগৰাকীয়ে অভিযোগ কৰে যে কেন্দ্ৰীয়শাসিত অঞ্চলৰ ব্যৱস্থাত সাধাৰণ মানুহৰ মৰ্যাদা আৰু অধিকাৰৰ ওপৰত আঘাত আহিছে। তেওঁ সকীয়াই দিয়ে যে আত্মসন্মান ৰক্ষা কৰিবলৈ চেষ্টা কৰা মহিলা বিষয়াগৰাকীৰ বিৰুদ্ধে যদি কোনো প্ৰতিশোধমূলক ব্যৱস্থা গ্ৰহণ কৰা হয়, তেন্তে তাৰ গুৰুতৰ পৰিণাম হ’ব পাৰে।
ইফালে, কুমাৰ ৰাজীৱ ৰঞ্জনৰ বিৰুদ্ধে ইয়াৰ পূৰ্বেও বিভিন্ন অভিযোগ উত্থাপন হৈছিল। জাল নথিৰ ভিত্তিত বৃহৎ সংখ্যক অস্ত্ৰৰ অনুজ্ঞাপত্ৰ প্ৰদানৰ অভিযোগত কেন্দ্ৰীয় অনুসন্ধানকাৰী সংস্থাই তেওঁক গ্ৰেপ্তাৰ কৰাৰ পিছত ২০২০ চনত নিলম্বন কৰিছিল। অৱশ্যে, ২০২১ চনত তেওঁক পুনৰ চাকৰিত মকৰল কৰা হয়। এই অস্ত্ৰৰ অনুজ্ঞাপত্ৰ কেলেংকাৰিৰ গোচৰ এতিয়াও আদালতত বিচাৰাধীন হৈ আছে।
২০১৫-১৬ চনত কুপৱাৰা জিলাৰ উপায়ুক্ত হিচাপে দায়িত্ব পালন কৰি থকাৰ সময়ৰ অনিয়মৰ তদন্তৰ মাজতে এই কেলেংকাৰিৰ কথা পোহৰলৈ আহিছিল। ২০১৯ চনৰ পৰা তদন্ত আৰম্ভ কৰি কেন্দ্ৰীয় অনুসন্ধানকাৰী সংস্থাই অভিযোগ কৰিছিল যে ২০১২ৰ পৰা ২০১৬ চনৰ ভিতৰত জম্মু-কাশ্মীৰৰ কেইবাখনো জিলাত জিলা দণ্ডাধীশ, উপায়ুক্ত আৰু অনুজ্ঞাপত্ৰ প্ৰদানৰ দায়িত্বত থকা বিষয়াসকলে উৎকোচৰ বিনিময়ত অনুপযুক্ত লোকক দুই লাখ ৭৮ হাজাৰতকৈও অধিক অবৈধ অস্ত্ৰৰ অনুজ্ঞাপত্ৰ প্ৰদান কৰিছিল।
ইয়াৰ উপৰি, ২০২৫ চনৰ ১৭ ফেব্ৰুৱাৰীত কুমাৰ ৰাজীৱ ৰঞ্জন আৰু তেওঁৰ পৰিয়ালৰ সদস্যসকলৰ বিৰুদ্ধে আয়ৰ সৈতে সামঞ্জস্য নথকা সম্পত্তি আহৰণৰ অভিযোগত কেন্দ্ৰীয় অনুসন্ধানকাৰী সংস্থাই আন এটা গোচৰ ৰুজু কৰিছিল। সেই সময়ত জম্মুত থকা তেওঁৰ চৰকাৰী কাৰ্যালয়ৰ লগতে বাৰাণসী, শ্ৰীনগৰ আৰু গুৰুগ্ৰামৰ মুঠ সাতটা স্থানত একেলগে তালাচী চলোৱা হৈছিল।
এতিয়া মহিলা বিষয়াগৰাকীৰ সৈতে দুৰ্ব্যৱহাৰৰ অভিযোগৰ তদন্ত ১৫ দিনৰ ভিতৰত সম্পূৰ্ণ কৰাৰ নিৰ্দেশ দিয়া হৈছে। তদন্তত কি তথ্য পোহৰলৈ আহে আৰু অভিযুক্ত আইএএছ বিষয়াগৰাকীৰ বিৰুদ্ধে পৰৱৰ্তী সময়ত কি ব্যৱস্থা গ্ৰহণ কৰা হয়, সেয়া লক্ষ্যণীয় হ’ব।
