মুখ্য নিৰ্বাচন আয়ুক্ত জ্ঞানেশ কুমাৰৰ পদত্যাগৰ দাবীত দিল্লীৰ কনাট প্লেচকে ধৰি বিভিন্ন স্থানত ‘ককৰোচ জনতা পাৰ্টী’ নামৰ গোটটোৱে সাব্যস্ত কৰা প্ৰতিবাদক প্ৰতিহত কৰিবলৈ ৰাজধানীত ‘লাল হিট জনতা পাৰ্টী’ নামৰ এক নতুন দলৰ আত্মপ্ৰকাশ ঘটিছে। দেওবাৰে দিল্লীৰ মালব্য স্মৃতি ভৱনত দলটোৱে চিজেপিৰ বিৰুদ্ধে ইয়াৰ প্ৰথমখন সদস্য ভৰ্তি সভাত মিলিত হয়।
সভাত ভাষণ দি ‘লাল হিট জনতা পাৰ্টী’ৰ মুৰব্বী অয়ন ভাটনগৰ আৰু অন্যান্য বক্তাসকলে চিজেপি, কংগ্ৰেছ আৰু প্ৰতিবাদকাৰীসকলক তীব্ৰ সমালোচনা কৰে। তেওঁলোকে অভিযোগ কৰে যে এই প্ৰতিবাদসমূহে দেশৰ সাংবিধানিক প্ৰতিষ্ঠানসমূহৰ বিশ্বাসযোগ্যতাক লৈ প্ৰশ্ন উত্থাপন কৰাৰ লগতে ব্যৱসায়-বাণিজ্যৰ বিস্তৰ ক্ষতিসাধন কৰিছে। দশেৰাক অশুভ শক্তিৰ ওপৰত শুভ শক্তিৰ বিজয়ৰ প্ৰতীক হিচাপে অভিহিত কৰি ভাটনগৰে কয় যে দশেৰাৰ দিনাৰ পৰাই চিজেপিৰ পতন আৰম্ভ হ’ব। নিজৰ ভাষণত তেওঁ প্ৰতিবাদকাৰীসকলক ‘পোক-পতংগ’ আৰু ‘পইতাচোৰা সদৃশ জীৱ’ বুলি কটাক্ষ কৰি জনসাধাৰণক কেৱল সামাজিক মাধ্যমতে সীমাবদ্ধ নাথাকি ৰাজপথলৈ ওলাই আহিবলৈ আহ্বান জনায়। লগতে তেওঁ কয় যে চমু জাননীতে ইমান সংখ্যক লোক সমবেত হোৱাটো লক্ষ্যণীয় আৰু প্ৰধানমন্ত্ৰী নৰেন্দ্ৰ মোদীয়ে যদি আহ্বান জনায়, তেন্তে ইয়াতকৈও অধিক লোক সমবেত হ’ব।
উৎসৱৰ বতৰত ব্যৱসায়িক ক্ষয়-ক্ষতিৰ প্ৰসংগ উত্থাপন কৰি ভাটনগৰে কয় যে দশেৰাৰ পৰা দীপাৱলীৰ সময়ছোৱা দেশৰ ব্যৱসায়ীসকলৰ বাবে মূল ব্যৱসায়িক বতৰ। এনে সময়ত কনাট প্লেচৰ দৰে গুৰুত্বপূৰ্ণ বাণিজ্যিক এলেকাত বিশৃংখলতা সহ্য কৰা নহ’ব। অনুষ্ঠানত উপস্থিত থকা পৱন নামৰ এজন সাংবাদিকে কীটনাশক ব্ৰেণ্ডৰ উদাহৰণ দি কয়, “য’ত পইতাচোৰা থাকিব, তাত নিশ্চিতভাৱে হিট থাকিব।” তেওঁ লগতে দাবী কৰে যে এই আন্দোলনৰ ফলত ব্যৱসায়িক খণ্ডত ইতিমধ্যে ৩,০০০ কোটি টকাৰ লোকচান হৈছে আৰু এই পৰিমাণ ১০,০০০ কোটি টকালৈ বৃদ্ধি পাব পাৰে।
আনহাতে, অধিবক্তা প্ৰশান্ত ভূষণে ‘শাসন পৰিৱৰ্তন’ সন্দৰ্ভত কৰা মন্তব্যৰ প্ৰত্যুত্তৰ দি ভাটনগৰে প্ৰশ্ন কৰে যে প্ৰতিবাদৰ জৰিয়তে কেনেকৈ চৰকাৰ সলনি হ’ব পাৰে? তেওঁ কয় যে নিৰ্বাচন আয়োগক কাঠগড়াত থিয় কৰোৱা আৰু মুখ্য নিৰ্বাচন আয়ুক্ত জ্ঞানেশ কুমাৰৰ পদত্যাগ দাবী কৰা কাৰ্যই সাংবিধানিক প্ৰতিষ্ঠানৰ ওপৰত জনসাধাৰণৰ আস্থা হ্ৰাস কৰে। আজি মুখ্য নিৰ্বাচন আয়ুক্তৰ পদত্যাগ বিচৰাসকলে কাইলৈ প্ৰধানমন্ত্ৰী মোদীৰো পদত্যাগ দাবী কৰিব পাৰে বুলি উল্লেখ কৰি তেওঁ কয় যে মাত্ৰ ৫০,০০০ লোক সমবেত হোৱাৰ বাবেই কোনো এটা গোটৰ দাবী মানি ল’ব নোৱাৰি। ২০২৩ চনত প্ৰৱৰ্তন কৰা মুখ্য নিৰ্বাচন আয়ুক্ত নিযুক্তি প্ৰক্ৰিয়াত বিৰোধী দলৰ নেতাকো অন্তৰ্ভুক্ত কৰা হৈছে বুলি সোঁৱৰাই দি তেওঁ প্ৰতিবাদকাৰীসকলক পদত্যাগ দাবী কৰাৰ পূৰ্বে নিযুক্তিৰ নিয়মসমূহ অধ্যয়ন কৰিবলৈ পৰামৰ্শ দিয়ে।
গণতন্ত্ৰ ৰক্ষাৰ উদ্দেশ্যেই ‘লাল হিট জনতা পাৰ্টী’ গঠন কৰা হৈছে বুলি জানিবলৈ দি ভাটনগৰে অভিযোগ কৰে যে চিজেপিয়ে আৰক্ষী আৰু নিৰ্বাচন আয়োগৰ ওপৰত জনতাৰ আস্থা নষ্ট কৰিব বিচাৰিছে। বিজেপি চৰকাৰক আঁতৰাই নিজৰ চৰকাৰ গঠনৰ উদ্দেশ্যেই কংগ্ৰেছ আৰু সৰ্বভাৰতীয় ছাত্ৰ সন্থা চমুকৈ আইছাই (AISA) চিজেপিক সমৰ্থন আগবঢ়াইছে বুলি তেওঁ দাবী কৰে। প্ৰতিবাদৰ সময়ত আৰক্ষী আৰু নিৰাপত্তাৰক্ষীৰ সৈতে হোৱা দুৰ্ব্যৱহাৰৰ কথা উল্লেখ কৰি তেওঁ কয় যে প্ৰধানমন্ত্ৰী মোদীয়ে সূৰ্য নমস্কাৰ কৰে আৰু গালি-গালাজ সহ্য কৰিব পাৰে, কিন্তু ইয়াৰ অৰ্থ এইটো নহয় যে আন সকলোৱে অপমান সহ্য কৰিব।
এই অনুষ্ঠানত উপস্থিত থকা নৃত্যশিল্পী ৰিচা গুপ্তাই প্ৰধানমন্ত্ৰী মোদীৰ নেতৃত্বত বিশ্বত ভাৰতৰ সন্মান বৃদ্ধি পোৱা বুলি উল্লেখ কৰি দেশৰ যুৱ প্ৰজন্মক অন্ধভাৱে ভিৰৰ পিছে পিছে নগৈ সঠিক দিশত আগবাঢ়িবলৈ আহ্বান জনায়। ভাটনগৰে জানিবলৈ দিয়ে যে কানাডা আৰু সংযুক্ত আৰব এমিৰেটছত বসবাস কৰা লোকসকলৰ পৰাও তেওঁলোকৰ দলে সমৰ্থন লাভ কৰিছে। সভাত বক্তাসকলে জাতীয়তাবাদী আদৰ্শত বিশ্বাসী লোকসকলক একত্ৰিত হ’বলৈ আহ্বান জনায়।
