দশেৰা উৎসৱৰ পূৰ্বে উত্তৰ প্ৰদেশৰ ৰাজধানী লক্ষ্ণৌৰ কেইবাখনো চকত লগোৱা এখন বিশেষ পোষ্টাৰে তীব্ৰ ৰাজনৈতিক বিতৰ্কৰ সৃষ্টি কৰিছে। ‘সনাতন ভাৰতৰ বিৰোধী ৰাৱণ’ শীৰ্ষক এই পোষ্টাৰসমূহত দেশ-বিদেশৰ কেইবাগৰাকীও ৰাজনৈতিক নেতা আৰু বিশিষ্ট ব্যক্তিক দহমূৰীয়া ৰাৱণৰ ৰূপত উপস্থাপন কৰা হৈছে।
প্ৰাপ্ত তথ্য অনুসৰি, ‘সনাতন ৰক্ষা সংগঠন’ নামৰ এটা গোটৰ দ্বাৰা এই পোষ্টাৰসমূহ লগোৱা হৈছে। পোষ্টাৰত ৰাৱণৰ দহটা মূৰৰ স্থানত কংগ্ৰেছ নেতা ৰাহুল গান্ধী, সমাজবাদী পাৰ্টীৰ মুৰব্বী অখিলেশ যাদৱ, অপৰাধজনিত গোচৰত জড়িত থকা প্ৰয়াত আতিক আহমেদ আৰু মুখতাৰ আনছাৰী, বিশিষ্ট অধিবক্তা প্ৰশান্ত ভূষণৰ লগতে আন্তঃৰাষ্ট্ৰীয় পৰ্যায়ৰ উদ্যোগপতি ইলন মাস্ক আৰু বাংলাদেশৰ মহম্মদ ইউনুছৰ ছবি সন্নিবিষ্ট কৰা হৈছে। এই ব্যক্তিসকলক ভাৰতৰ স্বাৰ্থৰ বিৰোধী বুলি অভিহিত কৰি সংগঠনটোৱে দশেৰা উৎসৱৰ প্ৰতীকী অৰ্থক এক ৰাজনৈতিক ৰূপ দিয়াৰ প্ৰয়াস কৰিছে।
এই ঘটনাক কেন্দ্ৰ কৰি ইতিমধ্যে ছ’চিয়েল মিডিয়াত এটা ভিডিঅ’ ভাইৰেল হৈছে, য’ত সমাজবাদী পাৰ্টীৰ এজন কৰ্মীয়ে লক্ষ্ণৌৰ এখন ৰাজহুৱা স্থানৰ পৰা এনে এখন পোষ্টাৰ ফালি পেলোৱা দেখা গৈছে। ঘটনা সন্দৰ্ভত প্ৰতিক্ৰিয়া প্ৰকাশ কৰি সমাজবাদী পাৰ্টীৰ সাংসদ অৱধেশ প্ৰসাদে কয় যে আগন্তুক ২০২৭ চনৰ উত্তৰ প্ৰদেশ বিধানসভা নিৰ্বাচনৰ পূৰ্বে অখিলেশ যাদৱৰ ক্ৰমৱৰ্ধমান জনপ্ৰিয়তা আৰু বিশ্বাসযোগ্যতা দেখি বিজেপি চিন্তিত হৈ পৰিছে।
সাংসদগৰাকীয়ে লগতে অভিযোগ কৰে যে নিৰ্বাচন কাষ চপাৰ লগে লগে বিজেপিৰ শংকা বৃদ্ধি পাইছে আৰু সেয়েহে পোষ্টাৰ, ভুৱা বিবৃতি আৰু বিভ্ৰান্তিকৰ দাবীৰ জৰিয়তে এনে কাৰ্য সংঘটিত কৰা হৈছে। অৱশ্যে বিৰোধীয়ে তেওঁলোকৰ এই সকলোবোৰ প্ৰয়াস ব্যৰ্থ হ’ব বুলি দাবী কৰিছে। বৰ্তমান এই কাণ্ডই নিৰ্বাচনমুখী ৰাজ্যখনত এক উত্তপ্ত ৰাজনৈতিক পৰিৱেশৰ সৃষ্টি কৰিছে।
