দিল্লী উচ্চ ন্যায়ালয়ে বুধবাৰে ‘ককৰোচ জনতা পাৰ্টী’ৰ নেতা আশুতোষ ৰাংকা আৰু সৌৰভ দাসক তীব্ৰ ভৰ্ৎসনা কৰে। দণ্ডাধীশৰ জিম্মা বৃদ্ধিৰ নিৰ্দেশৰ বিৰুদ্ধে দুয়োগৰাকী নেতাই দাখিল কৰা আবেদনৰ শুনানিত ন্যায়ালয়ে বিদেশৰ ছাত্ৰ আন্দোলনৰ হিংসাত্মক ৰূপৰ প্ৰসংগ উত্থাপন কৰি প্ৰতিবাদকাৰীৰ আচৰণক লৈ প্ৰশ্ন উত্থাপন কৰে।
ন্যায়াধীশ সুব্ৰমণিয়ম প্ৰসাদে চিজেপি নেতাদ্বয়ে নিৰ্ধাৰিত প্ৰতিবাদস্থলীৰ স্বীকৃতি প্ৰত্যাহাৰ কৰা জন্তৰ-মন্তৰত প্ৰতিবাদ কৰিবলৈ গৈ জামিনৰ চৰ্ত ভংগ কৰা কাৰ্যক সমালোচনা কৰে। ন্যায়ালয়ে কয়, “আপোনালোক প্ৰতিবাদৰ সন্মুখভাগত থাকে। যেতিয়া আপোনালোকে বেৰিকেড ভাঙে, তেতিয়া আন মানুহেও আপোনালোকক অনুকৰণ কৰাৰ সম্ভাৱনা থাকে, যিসকল আপোনালোকৰ নিয়ন্ত্ৰণত নাথাকিবও পাৰে।” বিদেশৰ ঘটনাৰ উদাহৰণ দি ন্যায়াধীশে লগতে কয়, “ছাত্ৰ আন্দোলন হিচাপে আৰম্ভ হোৱা প্ৰতিবাদ কেনেদৰে অট্টালিকা জ্বলাই দিয়া আৰু হিংসাত্মক ঘটনালৈ ৰূপান্তৰিত হয়, সেয়া আমি বিদেশত দেখিছোঁ।” বণ্ড ভংগ কৰাৰ পিছত কৰ্তৃপক্ষই অধিক কঠোৰ চৰ্ত আৰোপ কৰাৰ অধিকাৰ কিয় নাথাকিব বুলিও ন্যায়ালয়ে নেতাদ্বয়ক প্ৰশ্ন কৰে।
উল্লেখযোগ্য যে যোৱা ১০ অক্টোবৰত জন্তৰ-মন্তৰত প্ৰতিবাদ কৰিবলৈ অহাৰ সময়ত দিল্লী বিমানবন্দৰত চিজেপি নেতা দাস, ৰাংকা আৰু অভিজিৎ ডিপকেক আটক কৰা হৈছিল। সেইদিনা ৫০,০০০ টকাৰ ‘শান্তিৰ বণ্ড’ স্বাক্ষৰ কৰোৱাই তেওঁলোকক মুকলি কৰি দিয়া হয়। কিন্তু ১৪ অক্টোবৰত জন্তৰ-মন্তৰত ‘তিৰংগা প্ৰতিবাদ’ কৰিবলৈ চেষ্টা কৰাৰ অপৰাধত দাস আৰু ৰাংকাক পুনৰ আটক কৰি ৫ দিনৰ ন্যায়িক জিম্মালৈ প্ৰেৰণ কৰা হয়। ১৯ অক্টোবৰত বিশেষ কাৰ্যবাহী দণ্ডাধীশে তেওঁলোকে ইচ্ছাকৃতভাৱে বণ্ড ভংগ কৰি শান্তি বিঘ্নিত কৰাৰ অভিযোগত জিম্মাৰ ম্যাদ বৃদ্ধি কৰে। ইয়াৰ বিৰুদ্ধেই তেওঁলোকে উচ্চ ন্যায়ালয়ৰ কাষ চাপিছিল।
শুনানিত ন্যায়ালয়ে নেতাদ্বয়ৰ বয়স ২৭ আৰু ৩১ বছৰ বুলি জানিব পাৰি তেওঁলোক ‘জেন-জি’ নহয় বুলি মন্তব্য কৰে। “মানুহ একেই আছে, কিন্তু কাৰণ সলনি হৈছে,” বুলি মন্তব্য কৰি ন্যায়ালয়ে কয় যে শান্তি ভংগৰ আশংকাৰ মূল্যায়ন কৰাৰ সময়ত এজন ব্যক্তিৰ পৰিচয়, উদ্দেশ্য আৰু তেওঁৰ কৰ্মৰাজি দণ্ডাধীশৰ বাবে গুৰুত্বপূৰ্ণ হৈ পৰে। পৰৱৰ্তী সময়ত উচ্চ ন্যায়ালয়ৰ পৰামৰ্শ অনুসৰি চিজেপি নেতাদ্বয়ৰ অধিবক্তাই আবেলি দণ্ডাধীশৰ ওচৰত হাজিৰ হোৱাৰ সিদ্ধান্ত লৈ আবেদনখন প্ৰত্যাহাৰ কৰে।
