গুৱাহাটীৰ অসম অভিযান্ত্ৰিক মহাবিদ্যালয়ৰ (এইচি) ৭ নম্বৰ হোষ্টেলত খোৱাপানীৰ নামত শিক্ষাৰ্থীসকলে ব্যৱহাৰ কৰি অহা পানীৰ উৎসক লৈ সৃষ্টি হৈছে তীব্ৰ উদ্বেগ। হোষ্টেলটোৰ পানীৰ টেংকীৰ ভিতৰত উদ্ধাৰ হৈছে পচি যোৱা অৱস্থাত থকা এটা বান্দৰৰ মৃতদেহ। এই ঘটনাৰ পৰিণতিত ৫০ৰো অধিক শিক্ষাৰ্থী অসুস্থ হোৱা বুলি জানিব পৰা গৈছে।
হোষ্টেলৰ আৱাসী শিক্ষাৰ্থীসকলৰ ভাষ্য অনুসৰি, প্ৰায় সাত দিন ধৰি বান্দৰটোৰ মৃতদেহটো পানীৰ টেংকীৰ ভিতৰতে পৰি আছিল। অথচ এই টেংকীৰ পানী দৈনন্দিন প্ৰয়োজনৰ লগতে খাদ্য প্ৰস্তুত কৰাৰ কামতো ব্যৱহাৰ কৰি আহিছিল শিক্ষাৰ্থীসকলে। মৃতদেহটো উদ্ধাৰ হোৱাৰ পাছতহে পোহৰলৈ আহে পানীৰ উৎসটোৰ এনে ভয়ংকৰ অৱস্থা।
শিক্ষাৰ্থীসকলে অভিযোগ কৰা মতে, মৃত বান্দৰটোৰ সন্ধান পোৱাৰ কেইবাদিনো পূৰ্বৰে পৰা টেংকীৰ পানীৰ পৰা অসহ্যকৰ দুৰ্গন্ধ ওলাইছিল। তাৰ পাছতো পানীৰ ব্যৱহাৰ বন্ধ কৰা হোৱা নাছিল বুলি তেওঁলোকে অভিযোগ কৰিছে। হোষ্টেলৰ দৰে আৱাসিক শিক্ষানুষ্ঠানত পানীৰ টেংকী পৰিষ্কাৰ কৰা আৰু নিয়মীয়াকৈ পৰীক্ষা কৰাৰ ব্যৱস্থা কিমান সঠিকভাৱে চলি আছে, সেই লৈও প্ৰশ্ন উত্থাপন হৈছে।
ঘটনাটোৱে মহাবিদ্যালয়খনৰ আৱাসীসকলৰ মাজত আতংকৰ সৃষ্টি কৰাৰ লগতে হোষ্টেলৰ স্বাস্থ্যসন্মত পৰিৱেশ আৰু নিৰাপদ খোৱাপানীৰ ব্যৱস্থাক লৈ গুৰুতৰ উদ্বেগৰ সৃষ্টি কৰিছে। শিক্ষাৰ্থীসকলৰ অভিযোগ সঁচা হ‘লে, ই কেৱল ৰক্ষণাবেক্ষণৰ গাফিলতিৰ বিষয়েই নহয়, আৱাসীসকলৰ স্বাস্থ্য সুৰক্ষাৰ প্ৰতিও এক ডাঙৰ অৱহেলাৰ ইংগিত বহন কৰে।
অৱশ্যে, অসুস্থ শিক্ষাৰ্থীৰ প্ৰকৃত সংখ্যা, তেওঁলোকৰ শাৰীৰিক অসুস্থতাৰ কাৰণ আৰু পানীৰ নমুনা পৰীক্ষাৰ ফলাফল সম্পৰ্কে এতিয়ালৈকে কোনো আনুষ্ঠানিক তথ্য প্ৰকাশ পোৱা নাই। একেদৰে এই ঘটনাক লৈ অসম অভিযান্ত্ৰিক মহাবিদ্যালয় কৰ্তৃপক্ষৰ স্থিতিও স্পষ্ট হোৱা নাই।
