পশ্চিম এছিয়াত ক্ৰমাৎ জটিল হৈ পৰা সামৰিক আৰু কূটনৈতিক পৰিস্থিতিৰ মাজতে ভাৰতৰ বাবে আহিছে এক গুৰুত্বপূৰ্ণ খবৰ। হৰমুজ প্ৰণালীৰে জাহাজ চলাচলৰ ক্ষেত্ৰত কঠোৰ নিয়ন্ত্ৰণ আৰোপ কৰাৰ সময়তে ভাৰতসহ কেইবাখনো দেশক বিশেষ সুবিধা দিয়াৰ সিদ্ধান্ত লৈছে ইৰানে। এই সিদ্ধান্তৰ ফলত ভাৰতীয় তেল পৰিবাহী জাহাজ আৰু বাণিজ্যিক জাহাজসমূহৰ বাবে গুৰুত্বপূৰ্ণ এই সামুদ্ৰিক পথেৰে যাতায়াতৰ সুযোগ সৃষ্টি হৈছে। বিশ্বজুৰি শক্তি যোগানত ব্যাঘাত জন্মাৰ আশংকা বৃদ্ধি পোৱাৰ সময়ত ইৰানৰ এই পদক্ষেপে ভাৰতক কিছু সকাহ দিব পাৰে।
প্ৰকাশিত তথ্য অনুসৰি, ইৰানৰ সংসদৰ ৰাষ্ট্ৰীয় নিৰাপত্তা আৰু বৈদেশিক নীতি সমিতিৰ উপাধ্যক্ষ আমিৰ হায়াত মোকাদ্দামে এই সন্দৰ্ভত মন্তব্য কৰিছে। তেহৰাণে ভাৰত, চীন, ইৰাক আৰু কাটাৰক নিৰ্বাচিত সহযোগী দেশ হিচাপে বিবেচনা কৰি হৰমুজ প্ৰণালীৰে জাহাজ চলাচলৰ ক্ষেত্ৰত বিশেষ সুবিধা প্ৰদান কৰিছে। অৱশ্যে সকলো দেশৰ বাবে একে ধৰণৰ ব্যৱস্থা কৰা হোৱা নাই। কাটাৰক বিনামূলীয়াকৈ যাতায়াতৰ অনুমতি দিয়াৰ বিপৰীতে ভাৰত আৰু চীনৰ ক্ষেত্ৰত নিৰ্দিষ্ট ট্ৰেনজিট মাচুল আৰু কৌশলগত চুক্তিৰ জৰিয়তে এই সুবিধা প্ৰদানৰ কথা প্ৰকাশ পাইছে।
এই ব্যৱস্থাৰ অংশ হিচাপে ভাৰতৰ পৰা অত্যাৱশ্যকীয় ঔষধৰ যোগান আৰু কূটনৈতিক সহযোগিতাৰ বিষয়টোও গুৰুত্ব লাভ কৰা বুলি সূত্ৰসমূহে প্ৰকাশ কৰিছে। অৰ্থাৎ সামুদ্ৰিক পথত যাতায়াতৰ সুবিধা দিয়াৰ সমান্তৰালভাৱে ভাৰতৰ সৈতে পাৰস্পৰিক সহযোগিতা অধিক শক্তিশালী কৰাৰ দিশতো আগবাঢ়িছে তেহৰাণ।
ইফালে, ইৰানৰ এই সিদ্ধান্তৰ আঁৰত ভাৰতৰ শেহতীয়া এক মানৱীয় পদক্ষেপৰ প্ৰভাৱ থকা বুলিও কূটনৈতিক মহলত চৰ্চা হৈছে। কিছুদিন পূৰ্বে গভীৰ সাগৰত বিপদত পৰা ২০গৰাকী ইৰানী নাৱিকক উদ্ধাৰ কৰিছিল ভাৰতীয় নিৰাপত্তা বাহিনীয়ে। এই অভিযানত ভাৰতীয় নৌসেনা আৰু বায়ুসেনাৰ ভূমিকাক দুয়োখন দেশৰ মাজত পাৰস্পৰিক বিশ্বাস আৰু সহযোগিতা বৃদ্ধিৰ এক উল্লেখযোগ্য দিশ হিচাপে বিবেচনা কৰা হৈছে।
ভাৰতৰ বাবে হৰমুজ প্ৰণালীৰ গুৰুত্ব অপৰিসীম। দেশৰ শক্তিৰ চাহিদা পূৰণৰ বাবে আমদানিকৃত খাৰুৱা তেলৰ এক উল্লেখযোগ্য অংশ এই সামুদ্ৰিক পথেৰে আহে। সেয়ে এই পথেৰে জাহাজ চলাচল অব্যাহত ৰখাটো ভাৰতৰ শক্তি সুৰক্ষাৰ সৈতে পোনপটীয়াকৈ জড়িত। এনে পৰিস্থিতিত ইৰানৰ পৰা লাভ কৰা বিশেষ সুবিধাই ভাৰতৰ তেল আমদানি আৰু বাণিজ্যিক যাতায়াতৰ ক্ষেত্ৰত কিছু সকাহ দিব পাৰে।
