ফুটবলৰ খেলপথাৰ নে ৰণক্ষেত্ৰ? এখন খেলতে ৫১গৰাকী খেলুৱৈ আৰু দলীয় কৰ্মচাৰীক ৰঙা কাৰ্ড দেখুৱাবলগীয়া হ’ল ৰেফাৰীয়ে। ব্ৰাজিলৰ এখন যুৱ ফুটবল প্ৰতিযোগিতাত সংঘটিত এই আজৱ ঘটনাই এতিয়া বিশ্বজুৰি চৰ্চা লাভ কৰিছে। কেৱল ৰঙা কাৰ্ড দেখুওৱাই নহয়, খেলপথাৰৰ বাহিৰতো দুটা দলৰ সমৰ্থক আৰু খেলুৱৈৰ মাজত সৃষ্টি হয় উত্তপ্ত পৰিস্থিতি। ইয়াৰ লগে লগে পূৰ্বৰ অভিলেখ ভংগ কৰি নতুন অভিলেখ গঢ়িলে ব্ৰাজিলে।
মিনাছ জেৰাইছৰ অনূৰ্ধ্ব-২০ ফুটবল প্ৰতিযোগিতাৰ ছেমি ফাইনেলৰ প্ৰথমখন খেলত মুখামুখি হৈছিল উবেৰলাণ্ডিয়া আৰু মামোৰে। দ্বিতীয়াৰ্ধত তেতিয়া ৩-১ গ’লৰ ব্যৱধানত আগবাঢ়ি আছিল মামোৰে। এটা গ’ল দিয়াৰ পাছতে প্ৰতিপক্ষৰ খেলুৱৈৰ ফালে চাই ব্যংগাত্মক ভংগিমা প্ৰদৰ্শন কৰে মামোৰেৰ ফুটবলাৰ দাভিৰে। ইয়াকে লৈ দুয়োটা দলৰ মাজত আৰম্ভ হয় বাক-বিতণ্ডা।
পৰিস্থিতি অধিক উত্তপ্ত কৰি তোলে উবেৰলাণ্ডিয়াৰ গ’লৰক্ষক প্ৰশিক্ষক পাওলো ছাৰ্জিঅ’ দিয়াছ দছ ছান্টোছে। তেওঁ পোনে পোনে খেলপথাৰলৈ গৈ দাভিৰৰ চোলাত ধৰি টনা-আজোৰা কৰে। ইয়াৰ পাছতে দুয়োটা দলৰ খেলুৱৈৰ মাজত আৰম্ভ হয় প্ৰচণ্ড মাৰপিট। লাথি-ঘোচাৰে পৰিস্থিতি এনে পৰ্যায় পায়গৈ যে খেলখন ফুটবলৰ খেলপথাৰৰ পৰিৱৰ্তে ৰণক্ষেত্ৰত পৰিণত হয়।
পৰিস্থিতি নিয়ন্ত্ৰণ কৰিবলৈ গৈ ৰেফাৰী ফাৰ্নাণ্ডো পেট্ৰিক দ্ৰোছগিচ মোদেস্তোৱে ইজনৰ পাছত সিজন খেলুৱৈক ৰঙা কাৰ্ড দেখুৱাবলৈ বাধ্য হয়। মুঠ ৪৩গৰাকী ফুটবলাৰ আৰু ৮গৰাকী দলীয় কৰ্মচাৰীক ৰঙা কাৰ্ড দেখুওৱা হয়। ইয়াৰ পূৰ্বেই খেলৰ সময়ত আন তিনিগৰাকী খেলুৱৈয়ে খেলপথাৰ ত্যাগ কৰিছিল। এইদৰে এখন খেলতে ৫১গৰাকীক ৰঙা কাৰ্ড দেখুওৱাৰ ঘটনাই ফুটবলৰ ইতিহাসত নতুন অভিলেখ গঢ়ে।
এই ঘটনাৰ জৰিয়তে চিৰপ্ৰতিদ্বন্দ্বী আৰ্জেণ্টিনাৰ পূৰ্বৰ অভিলেখো ভংগ কৰিলে ব্ৰাজিলে। ২০১১ চনত আৰ্জেণ্টিনাৰ পঞ্চম বিভাগৰ এখন ফুটবল খেলত মুঠ ৩৬গৰাকী খেলুৱৈক ৰঙা কাৰ্ড দেখুওৱা হৈছিল। ইমানদিনে এইটোৱেই আছিল এখন খেলত সৰ্বাধিক ৰঙা কাৰ্ড দেখুওৱাৰ অভিলেখ। কিন্তু ব্ৰাজিলৰ এই ঘটনাই সেই অভিলেখো অতিক্ৰম কৰিলে।
কেৱল খেলপথাৰতে মাৰপিটৰ ঘটনা সীমাবদ্ধ নাথাকিল। খেলপথাৰৰ গেলাৰী, শৌচাগাৰ আৰু খেলুৱৈৰ সাজ-পোছাক সলোৱা কোঠাতো ব্যাপক ভাঙি-ছিঙি কৰা হয়। পৰিস্থিতি নিয়ন্ত্ৰণৰ বাবে অৱশেষত সামৰিক আৰক্ষীক মাতিবলগীয়া হয়। আৰক্ষীৰ প্ৰতিবেদন অনুসৰি, ঘটনাত ১৪খন দুৱাৰ, শ্বাৱাৰ, খিৰিকীৰ আইনাৰ লগতে অসংখ্য চকী-মেজ ভাঙি-ছিঙি পেলোৱা হয়। প্ৰায় ৪০ মিনিট ধৰি খেল বন্ধ হৈ থকাৰ পাছত অৱশেষত খেলখন পৰিত্যক্ত ঘোষণা কৰিবলৈ বাধ্য হয় ৰেফাৰী।
ইফালে, খেলখনৰ পাছত আন এক আজৱ পৰিস্থিতিৰ সৃষ্টি হয়। ৫১গৰাকীক ৰঙা কাৰ্ড দেখুওৱাৰ ফলত দ্বিতীয়খন খেলত অংশগ্ৰহণ কৰিবলৈ মামোৰেৰ দলত মাত্ৰ ৭গৰাকী ফুটবলাৰহে বাকী থাকে। এনে পৰিস্থিতিত উবেৰলাণ্ডিয়াই এক আচৰিত সিদ্ধান্ত গ্ৰহণ কৰে। ‘ফেয়াৰ প্লে’ৰ নিদৰ্শন দাঙি ধৰাৰ কথা কৈ দলটোৱে ছেমি ফাইনেলৰ দ্বিতীয়খন খেলৰ পৰা আঁতৰি যোৱাৰ ঘোষণা কৰে।
ইয়াৰ ফলত কোনো খেল নেখেলাকৈয়ে ফাইনেলত স্থান নিশ্চিত হয় মামোৰেৰ। আনহাতে, উবেৰলাণ্ডিয়াই তৃতীয় স্থানৰ বাবে খেলিবলগীয়া হ’ব। খেলপথাৰত প্ৰচণ্ড মাৰপিটৰ পাছত উবেৰলাণ্ডিয়াৰ এনে ‘ফেয়াৰ প্লে’ৰ সিদ্ধান্তই এতিয়া ফুটবলপ্ৰেমীৰ মাজত সৃষ্টি কৰিছে ব্যাপক চৰ্চা। বিশ্ব ফুটবলৰ ইতিহাসত এই ঘটনা বহুদিনলৈ চৰ্চিত হৈ থকাটো নিশ্চিত।
