ভাৰতত অস্থিৰতা আৰু অশান্তি সৃষ্টিৰ লক্ষ্যৰে ককৰোচ জনতা পাৰ্টীয়ে বিদেশী এন জি অ’ আৰু ভাৰতবিৰোধী শক্তিৰ পৰা অবৈধ ধন সংগ্ৰহ কৰা বুলি কেন্দ্ৰীয় মন্ত্ৰী জীতেন্দ্ৰ সিঙে গুৰুতৰ অভিযোগ উত্থাপন কৰিছে। বেংগালুৰুত সাংবাদিকৰ সৈতে হোৱা এক বাৰ্তালাপত মন্ত্ৰীগৰাকীয়ে দাবী কৰে যে সংগঠনটোৰ প্ৰতিষ্ঠাপক অভিজিত দীপকে আৰু ৰণনীতিবিদ আশুতোষ ৰাংকাক বিদেশী বিত্তীয় যোগানকাৰীৰ সৈতে সংযোগ কৰা পৰ্যাপ্ত প্ৰমাণ চৰকাৰৰ হাতত আছে।
কেন্দ্ৰীয় মন্ত্ৰী সিঙে অভিযোগ কৰে যে, “চি জে পিৰ নেতাসকলে দেশৰ ভিতৰৰ আৰু বাহিৰৰ বিভিন্ন অননুমোদিত উৎস, ভাৰতবিৰোধী এন জি অ’ আৰু সংগঠনৰ পৰা ধন লাভ কৰাৰ পৰ্যাপ্ত প্ৰমাণ আছে। বিদেশী ধনৰ পুঁজিৰে চলিত এন জি অ’, ‘ডীপ ষ্টেট’ৰ এজেণ্ট আৰু ভাৰতবিৰোধী শক্তিসমূহে একত্ৰিত হৈ দেশৰ বিৰুদ্ধে এক ভুৱা আখ্যান গঢ়ি তুলিছে।” তেওঁ নিৰ্দিষ্টভাৱে উল্লেখ কৰে যে অভিজিত দীপকেক আমেৰিকা যুক্তৰাষ্ট্ৰৰ একাংশ দাতাৰ পৰা আৰু আশুতোষ ৰাংকাক পাকিস্তানৰ ৰাজনীতিবিদ আৰু হেণ্ডলাৰৰ পৰা ধন যোগান ধৰা হৈছে।
এই সন্দৰ্ভত প্ৰতিক্ৰিয়া প্ৰকাশ কৰি বিজেপিৰ মুখপাত্ৰ তুহিন এ. সিনহাই কয় যে শেহতীয়াকৈ চি জে পিয়ে ৰাজধানী দিল্লীত যিবোৰ প্ৰতিবাদী কাৰ্যসূচী গ্ৰহণ কৰিছে, তাৰ মূল উদ্দেশ্য আছিল উৎসৱৰ বতৰত দেশত এক অৰাজক পৰিস্থিতিৰ সৃষ্টি কৰা। তেওঁ কংগ্ৰেছ আৰু চি জে পি দুয়োটা দলকে ন্যায়পালিকাৰ বিৰুদ্ধে একত্ৰিত হোৱা বুলিও অভিযোগ কৰে।
ইপিনে, আইনী নিৰ্দেশনা উলংঘা আৰু বিনানুমতিত যন্তৰ-মন্তৰত প্ৰৱেশ কৰাৰ অভিযোগত দিল্লী আৰক্ষীৰ অপৰাধ শাখা চি জে পিৰ মুখপাত্ৰ সৌৰভ দাস আৰু আশুতোষ ৰাংকাক সোধা-পোছাৰ বাবে তলব কৰিছে। যোৱা ১০ অক্টোবৰত আৰক্ষীয়ে দুয়োগৰাকীক আটক কৰিছিল যদিও ভৱিষ্যতে শান্তি ভংগ নকৰাৰ চৰ্তত ৫০,০০০ টকাৰ বণ্ডত মুকলি কৰি দিছিল। কিন্তু ১৩ অক্টোবৰত তেওঁলোকে সংগঠনটোৰ আন এগৰাকী সদস্য অজিংক্য চিন্দেৰ সৈতে মিলি বণ্ডৰ চৰ্ত উলংঘা কৰি যন্তৰ-মন্তৰত প্ৰৱেশ কৰাৰ অভিযোগ উত্থাপন হৈছে।
আনহাতে, বিৰোধী দলে কেন্দ্ৰীয় মন্ত্ৰীৰ এই ‘বিদেশী সংযোগ’ৰ অভিযোগক পোনচাতেই নাকচ কৰিছে। কৰ্ণাটকৰ গৃহমন্ত্ৰী প্ৰিয়ংক খৰ্গেয়ে কেন্দ্ৰীয় চৰকাৰক প্ৰত্যাহ্বান জনাই কয় যে যদি প্ৰকৃততেই এনে কোনো প্ৰমাণ আছে, তেন্তে সেয়া ৰাজহুৱা কৰা উচিত। তেওঁ কেন্দ্ৰীয় গৃহমন্ত্ৰী অমিত শ্বাহ, বৈদেশিক মন্ত্ৰী এছ. জয়শংকৰ আৰু চোৰাংচোৱা সংস্থা আই বি তথা ‘ৰ’ (R&AW)-ৰ কাৰ্যক্ষমতাক লৈয়ো প্ৰশ্ন উত্থাপন কৰে।
চি জে পিৰ বিৰুদ্ধে উত্থাপিত এই অভিযোগ আৰু দিল্লী আৰক্ষীৰ সমনৰ ফলশ্ৰুতিত ৰাজনৈতিক মহলত তীব্ৰ প্ৰতিক্ৰিয়াৰ সৃষ্টি হৈছে। বৰ্তমান আৰক্ষীৰ অপৰাধ শাখাই অভিযুক্ত দুগৰাকীক সোধা-পোছা অব্যাহত ৰাখিছে। অনাগত দিনত এই তদন্তই কি মোৰ লয় আৰু কেন্দ্ৰীয় চৰকাৰে এই সন্দৰ্ভত কি প্ৰমাণ দাখিল কৰে, সেয়া লক্ষণীয় হ’ব।
