কেৰালাৰ এগৰাকী প্ৰখ্যাত চিকিৎসকৰ বিৰুদ্ধে উত্থাপিত ধৰ্ষণৰ গোচৰত পোহৰলৈ আহিছে ভয়ংকৰ তথ্য। ডাঃ জনচন কে. ভাৰ্গিজ নামৰ চিকিৎসকগৰাকীৰ বিৰুদ্ধে এগৰাকী ৫০ বছৰীয়া মহিলাই যৌন নিৰ্যাতনৰ অভিযোগ উত্থাপন কৰিছিল। কিন্তু এই গোচৰ সন্দৰ্ভত চিকিৎসকগৰাকীয়ে এৰ্নাকুলাম সত্ৰ ন্যায়ালয়ত আগতীয়া জামিন বিচাৰি এক বিস্ফোৰক দাবী কৰিছে। তেওঁৰ মতে, এইটো ধৰ্ষণৰ ঘটনা নহয়, বৰঞ্চ ৩ কোটি টকা দাবী কৰা এক পৰিকল্পিত ‘হানি ট্ৰেপ’হে। ধন নিদিয়াৰ বাবেই তেওঁক এই ভুৱা গোচৰত সাঙুৰি পেলোৱা হৈছে বুলি তেওঁ দাবী কৰিছে।
জামিন আৱেদনত ডাঃ ভাৰ্গিজে উল্লেখ কৰিছে যে অভিযোগকাৰী মহিলাগৰাকী দীৰ্ঘদিন ধৰি তেওঁৰ ৰোগী আছিল আৰু দুয়োৰে মাজত এক ঘনিষ্ঠ বন্ধুত্বও আছিল। কিন্তু চিকিৎসকগৰাকীয়ে দাবী কৰা মতে, অভিযোগকাৰী মহিলাগৰাকীৰ আত্মীয় তথা এগৰাকী অভিনেত্ৰীয়ে তেওঁক চিকিৎসাৰ নামত এটা ফ্লেটলৈ মাতি নিছিল। ফ্লেটত উপস্থিত হোৱাৰ পাছতেই অভিনেত্ৰীগৰাকী আৰু তেওঁৰ ১২ জন সহযোগীয়ে চিকিৎসকগৰাকীক আৱদ্ধ কৰি মাৰপিট কৰাৰ লগতে কাপোৰ খুলি আপত্তিজনক ভিডিঅ’ বনাইছিল।
চিকিৎসকগৰাকীয়ে আদালতত জনোৱা মতে, সেই ভিডিঅ’টোৰ জৰিয়তেই তেওঁক ব্লেকমেইল কৰি ৩ কোটি টকা দাবী কৰা হৈছিল। অপৰাধী চক্ৰটোৱে ভাবুকি দিছিল যে যদিহে তেওঁ ধন নিদিয়ে, তেন্তে সেই ভিডিঅ’ ৰাজহুৱা কৰি দিয়া হ’ব। তেওঁ লগতে কয় যে অভিনেত্ৰীগৰাকীয়ে পূৰ্বৰে পৰা তেওঁৰ পৰা ধন বিচাৰি আহিছিল আৰু ধন দিবলৈ অস্বীকাৰ কৰাৰ পাছতেই তেওঁৰ বিৰুদ্ধে এই ভুৱা ধৰ্ষণৰ গোচৰ ৰুজু কৰা হয়। এই দাবীসমূহৰ সপক্ষে তেওঁৰ হাতত পৰ্যাপ্ত প্ৰমাণ আৰু ভাবুকিপূৰ্ণ মেছেজ আছে বুলিও তেওঁ ন্যায়ালয়ক অৱগত কৰিছে।
আনহাতে, মহিলাগৰাকীৰ অভিযোগৰ ভিত্তিত আৰক্ষীয়ে ইতিমধ্যে চিকিৎসকগৰাকীৰ বিৰুদ্ধে যৌন নিৰ্যাতনৰ গোচৰ ৰুজু কৰিছে। বৰ্তমানলৈকে চিকিৎসকগৰাকীৰ দাবীসমূহৰ আনুষ্ঠানিক সত্যতা নিৰূপণ হোৱা নাই যদিও অতি সোনকালেই তেওঁৰ আগতীয়া জামিন আৱেদনৰ শুনানি গ্ৰহণ কৰা হ’ব। সমগ্ৰ ঘটনাটোৱে এতিয়া এক ৰহস্যময় মোৰ লৈছে— এফালে চিকিৎসকৰ বিৰুদ্ধে ধৰ্ষণৰ গুৰুতৰ অভিযোগ আৰু আনফালে কোটি টকাৰ ‘হানি ট্ৰেপ’ৰ দাবী। সোমবাৰে অভিযুক্ত চিকিৎসকগৰাকীক দণ্ডাধীশৰ আদালতত হাজিৰ কৰোৱা হ’ব বুলি জানিব পৰা গৈছে।
