মহাৰাষ্ট্ৰৰ কোলহাপুৰ জিলাৰ ঐতিহ্যমণ্ডিত তথা বছৰি ৪,০০০ কোটি টকাৰো অধিক ব্যৱসায় কৰা সমবায় সংস্থা ‘গোকুল ডেইৰী’ৰ পৰিচালনা ব’ৰ্ডৰ নিৰ্বাচনৰ পাছত ৰাজ্য চৰকাৰে গ্ৰহণ কৰা এক সিদ্ধান্তক লৈ উত্তপ্ত পৰিস্থিতিৰ সৃষ্টি হৈছে। বিজেপি নেতৃত্বাধীন মহাযুতি চৰকাৰে জাৰি কৰা এখন নতুন অধ্যাদেশৰ জৰিয়তে ডেইৰীটোৰ পৰিচালনা ব’ৰ্ডৰ নিয়ন্ত্ৰণ ল’বলৈ বিচৰাৰ অভিযোগ উত্থাপন কৰি সোমবাৰে কোলহাপুৰত হাজাৰ হাজাৰ দুগ্ধ উৎপাদক কৃষকে প্ৰতিবাদ সাব্যস্ত কৰে। কৃষকসকলে নিজৰ গৰু-ম’হ লৈ আৰু ক’লা পতাকা উৰুৱাই জিলা উপায়ুক্তৰ কাৰ্যালয় ঘেৰাও কৰি চৰকাৰৰ এই সিদ্ধান্তৰ বিৰুদ্ধে বিক্ষোভ প্ৰদৰ্শন কৰে।
উল্লেখ্য যে, যোৱা ১৯ অক্টোবৰত অনুষ্ঠিত হোৱা গোকুল ডেইৰীৰ ২৫ খন আসনযুক্ত পৰিচালনা ব’ৰ্ডৰ নিৰ্বাচনত কংগ্ৰেছ বিধায়ক সতেজ পাটিলৰ নেতৃত্বাধীন ‘ৰাজৰ্ষি শ্বাহু শ্বেতকাৰী সমবিচাৰী আঘাড়ী’য়ে ১৩ খন আসন লাভ কৰি সংখ্যাগৰিষ্ঠতা অৰ্জন কৰিছিল। ইয়াৰ বিপৰীতে শাসকীয় বিজেপি আৰু মহাযুতি মিত্ৰজোঁটে ১২ খন আসন লাভ কৰিছিল। নিৰ্বাচনৰ ফলাফল ঘোষণা হোৱাৰ পাছত যোৱা সপ্তাহত ৰাজ্যিক কেবিনেটে এখন নতুন অধ্যাদেশ গৃহীত কৰে। এই অধ্যাদেশ অনুসৰি, ৫০০ কোটি টকাতকৈ অধিক ব্যৱসায় কৰা সমবায় সংস্থাসমূহৰ ব’ৰ্ডত চৰকাৰে নিজৰ ফালৰ পৰা ৫ জনকৈ সদস্য মনোনীত কৰিব পাৰিব আৰু ইয়াৰে ৪ জন সদস্যৰ ভোটাধিকাৰ থাকিব। বিৰোধী পক্ষই অভিযোগ কৰিছে যে এই ৪ জন মনোনীত সদস্যৰ জৰিয়তে শাসকীয় পক্ষই ব’ৰ্ডত নিজৰ সমৰ্থকৰ সংখ্যা ১২ ৰ পৰা ১৬ লৈ বৃদ্ধি কৰি নিৰ্বাচিত সতেজ পাটিল পেনেলৰ সংখ্যাগৰিষ্ঠতা কাঢ়ি নিয়াৰ পৰিকল্পনা কৰিছে।
মহাৰাষ্ট্ৰ চৰকাৰৰ এই সিদ্ধান্তৰ বিৰুদ্ধে ৰাষ্ট্ৰীয় পৰ্যায়তো ৰাজনৈতিক প্ৰতিক্ৰিয়াৰ সৃষ্টি হৈছে। লোকসভাৰ বিৰোধী দলপতি ৰাহুল গান্ধীয়ে সামাজিক মাধ্যমযোগে এই কাৰ্যক ‘দুগ্ধ পালক কৃষকৰ ভোট চুৰি’ আৰু জনাদেশৰ উলংঘন বুলি অভিহিত কৰিছে। গান্ধীয়ে অভিযোগ কৰে যে নিৰ্বাচনত পৰাজিত হোৱাৰ পাছত বিজেপিয়ে নিশাটোৰ ভিতৰতে নিয়ম সলনি কৰি ৪ জন সদস্য মনোনীত কৰি ডেইৰীটো দখল কৰাৰ বাট মুকলি কৰিছে আৰু কৃষকসকলে এই কথা কেতিয়াও নাপাহৰে। আনহাতে, ‘ক’কৰোচ জনতা পাৰ্টি’ৰ প্ৰতিষ্ঠাপক অভিজিত দীপকেও চৰকাৰৰ এই পদক্ষেপক তীব্ৰ সমালোচনা কৰি কয় যে দুগ্ধ সমবায়ৰ নিৰ্বাচনত হাৰি জনাদেশ মানি লোৱাৰ সলনি চৰকাৰে ক্ষমতাৰ অপব্যৱহাৰ কৰি সংস্থাটো দখল কৰিবলৈ ওলাইছে।
ইতিমধ্যে এই অধ্যাদেশখনৰ বিৰুদ্ধে আইনী যুঁজো আৰম্ভ হৈছে। কংগ্ৰেছ বিধায়ক সতেজ পাটিলৰ কাৰ্যালয়ত সাংসদ বিশাল পাটিল, ধৈৰ্যশীল মোহিতে-পাটিল আৰু কৃষক নেতা ৰাজু শ্বেট্টীয়ে এক বৈঠকত মিলিত হৈ চৰকাৰৰ এই সিদ্ধান্তৰ বিৰুদ্ধে বোম্বে উচ্চ ন্যায়ালয়ৰ দ্বাৰস্থ হৈছে আৰু অধ্যাদেশখন বাতিল কৰাৰ দাবী জনাইছে। ইফালে, সমবায় ক্ষেত্ৰৰ গণতন্ত্ৰ ৰক্ষাৰ স্বাৰ্থত স্থানীয় অধিবক্তাসকলেও কৃষকৰ সমৰ্থনত ৰাজপথত নামি প্ৰতিবাদ সাব্যস্ত কৰিছে। বৰ্তমান সমগ্ৰ বিষয়টো উচ্চ ন্যায়ালয়ৰ বিবেচনাধীন হৈ থকাৰ লগতে কোলহাপুৰত কৃষকৰ প্ৰতিবাদ অব্যাহত আছে।
