কংগ্ৰেছৰ জ্যেষ্ঠ নেত্ৰী ছোনিয়া গান্ধীয়ে শেহতীয়াকৈ প্ৰকাশ পোৱা তেওঁৰ আত্মজীৱনীত ২০১১-১২ চনৰ ‘ইণ্ডিয়া এগেইনষ্ট কৰাপচন’ আন্দোলন সন্দৰ্ভত কৰা এক বিশেষ দাবী সমাজকৰ্মী আন্না হাজাৰেই পোনচাটেই খাৰিজ কৰিছে। ছোনিয়া গান্ধীয়ে তেওঁৰ আত্মজীৱনীত দাবী কৰিছিল যে তৎকালীন ইউপিএ চৰকাৰক ক্ষমতাচ্যুত কৰিবলৈ এই আন্দোলনৰ আঁৰত বিজেপি আৰু আৰএছএছৰ গোপন সমৰ্থন আছিল। এই দাবী নস্যাৎ কৰি আন্না হাজাৰেই কয়, “এইটো সম্পূৰ্ণ ভুল। বিজেপি বা আৰএছএছৰ সৈতে মোৰ কোনো সম্পৰ্ক নাই আৰু মই তেওঁলোকৰ কোনো কাৰ্যসূচীত অংশগ্ৰহণ নকৰোঁ। মোৰ বাবে প্ৰথম অগ্ৰাধিকাৰ কেৱল মোৰ দেশ।”
ছোনিয়া গান্ধীৰ আত্মজীৱনী ‘Belonging: A Journey of Love’ ৰ এটা বিশেষ অংশ শেহতীয়াকৈ ভাইৰেল হৈ পৰিছে। এই কিতাপখনত তেওঁ উল্লেখ কৰিছে যে ৰাজধানীত হোৱা সেই বৃহৎ দুৰ্নীতিবিৰোধী আন্দোলনে তেতিয়াৰ শাসকীয় মিত্ৰজোঁট ইউপিএক অপ্ৰস্তুত কৰি তুলিছিল আৰু প্ৰশাসনক প্ৰতিৰক্ষামূলক স্থিতি ল’বলৈ বাধ্য কৰাইছিল। গ্ৰন্থখনত লিখা আছে, “২০১২ চনত মহাৰাষ্ট্ৰৰ এগৰাকী প্ৰসিদ্ধ সমাজকৰ্মী বাবুৰাও ‘আন্না’ হাজাৰে ‘ইণ্ডিয়া এগেইনষ্ট কৰাপচন’ নামৰ এটা আন্দোলনৰ মুখ্য চৰিত্ৰ হিচাপে ওলাই আহিছিল। এই আন্দোলনত অংশগ্ৰহণ কৰা একাংশ ব্যক্তিয়ে পাছলৈ জানিবলৈ দিছিল যে ইয়াৰ আঁৰত বিজেপি আৰু আৰএছএছৰ গোপন আয়োজন আৰু সমৰ্থন আছিল।”
ছোনিয়া গান্ধীৰ এই দাবী সন্দৰ্ভত প্ৰতিক্ৰিয়া ব্যক্ত কৰি আন্না হাজাৰেই কয়, “মই যি কৰোঁ মোৰ সমাজ আৰু দেশৰ বাবে কৰোঁ। কোনো দলৰ সৈতেই মোৰ একো সম্পৰ্ক নাই। মনমোহন সিঙৰ নেতৃত্বাধীন চৰকাৰে মোৰ আন্দোলনৰ বাবেই ২০১৪ চনৰ নিৰ্বাচনত হাৰিবলগীয়া হোৱা বুলি দাবী কৰাৰ ভিত্তি কি?” তেওঁ লগতে কয় যে তেওঁ কেতিয়াও ছোনিয়া গান্ধীক লগ পোৱা নাই আৰু গান্ধীয়েও তেওঁক দেখা নাই। গতিকে ইজনে সিজনক নেদেখাকৈ এনে মন্তব্য কৰাটো কিমান যুক্তিসংগত, সেয়া বিচাৰ্যৰ বিষয়। এজন দায়িত্বশীল ব্যক্তিয়ে দায়িত্বসহকাৰে কথা কোৱা উচিত বুলি উল্লেখ কৰি হাজাৰেই কয় যে এনে অস্পষ্ট মন্তব্যই ব্যক্তিগৰাকীৰ ভাবমূৰ্তিত বিৰূপ প্ৰভাৱ পেলায়।
গ্ৰন্থখনত ছোনিয়া গান্ধীয়ে এই কথাও স্বীকাৰ কৰিছে যে জনসাধাৰণৰ বিপুল সমৰ্থনৰ ফলত তৎকালীন ইউপিএ চৰকাৰ যথেষ্ট চাপত পৰিছিল আৰু অৱশেষত চৰকাৰে লোকপাল আইন গৃহীত কৰিবলৈ বাধ্য হৈছিল। লোকপাল নিযুক্তিৰ দাবীত আন্না হাজাৰেক ব্যাপক আদৰণিৰে দিল্লীলৈ অনা হৈছিল বুলিও তেওঁ উল্লেখ কৰিছে। অৱশ্যে, গ্ৰন্থখনত লগতে দাবী কৰা হৈছে যে ইউপিএ চৰকাৰে এই দুৰ্নীতিবিৰোধী আইনখন গৃহীত কৰিছিল যদিও, ২০১৪ চনত বিজেপি ক্ষমতালৈ অহাৰ পাছত এই ব্যৱস্থাক পৰিকল্পিতভাৱে অৱহেলা কৰা হ’ল। ছোনিয়া গান্ধীৰ আত্মজীৱনীৰ এই বিস্ফোৰক দাবী আৰু তাৰ পাছত আন্না হাজাৰেৰ প্ৰত্যুত্তৰে এতিয়া দেশৰ ৰাজনৈতিক মহলত বিশেষ চৰ্চা লাভ কৰিছে।
