খেলখনৰ শেষৰ ফালে ভাৰতীয় দলৰ পৰাজয় প্ৰায় নিশ্চিত যেন লাগিছিল। ২৫২ ৰানত ৮টা উইকেট পৰিছিল। জয়ী হ’বলৈ তেতিয়াও ৮৪ ৰানৰ প্ৰয়োজন আছিল। এনে পৰিস্থিতিত মোহিত উলভাই বেটিং কৰিবলৈ নামি অবিশ্বাস্য যুঁজ দিছিল। তেওঁ মনাল চৌহানৰ সৈতে যুটী বান্ধি পাকিস্তানৰ বিৰুদ্ধে ১৯ বছৰ অনুৰ্ধ এছিয়া কাপৰ ফাইনেলত ভাৰতক এক উইকেটত জয়ী কৰে।
মোহিতে ২৬টা বলত অপৰাজিত ৪৯ ৰান কৰে। তেওঁৰ বেটিঙৰ সুবাদতে নৱমবাৰৰ বাবে এই প্ৰতিযোগিতাৰ চেম্পিয়ন হ’ল ভাৰত। ইয়াৰ লগে লগে এই ১৮ বছৰীয়া ক্ৰিকেটাৰজন নিশাটোৰ ভিতৰতে চৰ্চালৈ আহিছে। কিন্তু কোন এই মোহিত উলভা?
শনিবাৰে মাস্কটত পাকিস্তানৰ বিৰুদ্ধে খেলা খেলখনত এটা সময়ত ভাৰত যথেষ্ট চাপত পৰিছিল। ৮টা উইকেট হেৰুৱাইছে। সেই সময়ত জয়ী হ’বলৈ বাকী আছিল ৮৪ ৰান। সেই কঠিন পৰিস্থিতিত মোহিতে ক্ৰীজলৈ আহি মনাল চৌহানৰ সৈতে নৱম উইকেটত ৩৫ বলত ৫৭ ৰান সংযোজন কৰে। পিছত তেওঁ চি ভেংকটাৰ সৈতে আৰু ২৯ ৰান সংযোজন কৰি শেষ উইকেটত দলটোক জয়ৰ লক্ষ্যলৈ লৈ যায়।
২৬টা বলত ৪৯ ৰানৰ অপৰাজিত ইনিংছত মোহিতে ৫টা চাৰি আৰু তিনিটা ছয় মাৰে। কেৱল বেটেৰেই নহয় বলিঙতো তেওঁ দলৰ ভৰসা। এইবাৰৰ ১৯ বছৰ অনুৰ্ধ এছিয়া কাপত তেওঁ তিনিটা উইকেট দখল কৰে। অষ্ট্ৰেলিয়াৰ বিৰুদ্ধে তিনিখন মেচৰ যুৱ এদিনীয়া ছিৰিজতো তেওঁ দৃষ্টি আকৰ্ষণ কৰিছিল। সেই শৃংখলাত এই যুৱ পেচাৰজনে ৫টা উইকেট দখল কৰিছিল।
মোহিতৰ ঘৰ গুজৰাটৰ জামনগৰত। সৌৰাষ্ট্ৰৰ বয়সভিত্তিক ক্ৰিকেট দলৰ পৰা তেওঁ ওপৰলৈ উঠি আহিছে। গাঁৱৰ খেলপথাৰত টেনিছ বল লৈ ক্ৰিকেট খেলিবলৈ আৰম্ভ কৰিছিল। তেওঁৰ পিতৃ ৰেলৱে সুৰক্ষা বাহিনীত কাম কৰে। দেউতাকেই তেওঁক ক্ৰিকেট প্ৰশিক্ষণৰ বাবে একাডেমীত যোগদান কৰিবলৈ উৎসাহিত কৰিছিল।
এক সাক্ষাৎকাৰত মোহিতে কয় যে তেওঁৰ পিতৃয়ে সৰুৰে পৰা ক্ৰিকেটৰ প্ৰতি আগ্ৰহী আছিল। তেওঁ কয়, “সৰুতে দেউতাই মোৰ মাজত কিছু প্ৰতিভা দেখিছিল। তেওঁ ভাবিছিল যে মই ক্ৰিকেট খেলিব পাৰিম। গতিকে মোক একাডেমীত ভৰ্তি কৰাৰ কথা ভাবিছিল।”
অৱশ্যে ক্ৰিকেটত যোগদান কৰাৰ আঁৰত তেওঁৰ এটা আমোদজনক কাৰণো আছিল। মোহিতে দাবী কৰে যে, “প্ৰথম অৱস্থাত মই মূলতঃ পঢ়া-শুনা বাদ দিবলৈকে ইয়াত সন্মত হৈছিলো।”
মোহিতে জামনগৰৰ ক্ৰিকেট বাংলোত মহেন্দ্ৰ সিং চৌহানৰ অধীনত প্ৰশিক্ষণ লৈছিল। ৰবীন্দ্ৰ জাদেজাও এই প্ৰশিক্ষকৰ হাত ধৰিয়েই উঠি আহিছিল। তেওঁৰ সৈতে প্ৰশিক্ষণৰ অভিজ্ঞতাৰ বিষয়ে মোহিতে কয়, “জামনগৰত মই শিকিলোঁ যে ফিটনেছ আটাইতকৈ গুৰুত্বপূৰ্ণ। মহেন্দ্ৰ ছাৰে মোক এই বিষয়ত কঠোৰ পৰিশ্ৰম কৰিবলৈ বাধ্য কৰাইছিল।”
অফ স্পিনৰ পৰা পেচাৰলৈকে, উনাডকাটৰ পৰামৰ্শ
মোহিতে প্ৰথমে অফ স্পিন বলিং কৰিছিল। কিন্তু তেওঁৰ শাৰীৰিক গঠন আৰু দৌৰাৰ ক্ষমতা দেখি মহেন্দ্ৰ সিং চৌহানে তেওঁক পেচ বল খেলিবলৈ পৰামৰ্শ দিয়ে। সেই পৰামৰ্শ অনুসৰণ কৰি তেওঁ ক্ৰমান্বয়ে পেচাৰ হৈ পৰিল। মোহিতে কয়, “মই বেগেৰে বলিং কৰিবলৈ আৰম্ভ কৰিলোঁ। ইয়াৰ পিছত লাহে লাহে পেচাৰ হৈ পৰিলোঁ।”
পিতৃৰ বদলিৰ বাবে ৰাজকোটলৈ যোৱাৰ পিছত মোহিতে সৌৰাষ্ট্ৰৰ হৈ বয়সভিত্তিক ক্ৰিকেট খেলিবলৈ আৰম্ভ কৰে। কেইবছৰমান পূৰ্বে সৌৰাষ্ট্ৰ প্ৰিমিয়াৰ লীগত জয়দেৱ উনাদকটৰ সৈতেও খেলিছিল। উনাডকাটক নেটত শ্লোৱাৰ বাউন্সাৰ বলিং কৰা দেখাৰ পিছত তেওঁ নিজেও সেইদৰে বলিং কৰিবলৈ চেষ্টা কৰে। উনাদকটে তেওঁক এই সন্দৰ্ভত বিশেষ পৰামৰ্শ দিছিল।
সেই পৰামৰ্শও মোহিতে মনত ৰাখিছে। এইবাৰ ১৯ বছৰ অনুৰ্ধ এছিয়া কাপৰ ফাইনেলত বেটিঙত তেওঁৰ যুঁজখনে ভাৰতক খিতাপ আনি দিয়াই নহয়, এক নতুন প্ৰতিভাৰ সৈতে পৰিচয়ো কৰাই দিলে।
