আদানী গোটৰ নৱীকৰণযোগ্য শক্তি কোম্পানী আদানী গ্ৰীণ এনাৰ্জী লিমিটেডৰ মহাৰাষ্ট্ৰৰ সাতাৰা জিলাত প্ৰস্তাৱিত এটা বৃহৎ জলবিদ্যুৎ প্ৰকল্প এতিয়া তীব্ৰ তদন্ত আৰু বিতৰ্কৰ আৱৰ্তত সোমাই পৰিছে। অভিযোগ অনুসৰি, কোম্পানীটোৱে এক শপতনামাত প্ৰকল্পটোৰ ব্যয় ৫৬.৭৫ কোটি টকা বুলি উল্লেখ কৰিছে, আনহাতে কেন্দ্ৰীয় পৰিৱেশ মন্ত্ৰালয়ৰ পূৰ্বৰ এক নথিত এই প্ৰকল্পৰ ব্যয় ৫,৬৭৫ কোটি টকা বুলি লিপিবদ্ধ আছিল। প্ৰকল্পৰ ব্যয় ৯৯ শতাংশ হ্ৰাস কৰি দেখুওৱাৰ ফলত বন্যপ্ৰাণী সংৰক্ষণৰ বাবে দিবলগীয়া মাচুল প্ৰায় ২২৫ কোটি টকা হ্ৰাস পাইছে। অৱশ্যে কোম্পানীটোৱে আইনী দায়বদ্ধতা হ্ৰাস কৰাৰ বাবে এই কাৰ্য কৰা বুলি উত্থাপিত অভিযোগক ‘সম্পূৰ্ণ বিভ্ৰান্তিকৰ’ বুলি আখ্যা দি নাকচ কৰিছে।
‘ইণ্ডিয়ান এক্সপ্ৰেছ’ৰ এক প্ৰতিবেদন অনুসৰি, সাতাৰা জিলাৰ পাটন তালুকৰ তাৰালী বান্ধত ১,৫০০ মেগাৱাট ক্ষমতাসম্পন্ন ‘তাৰালী পাম্পড ষ্ট’ৰেজ প্ৰজেক্ট’ প্ৰস্তাৱ কৰা হৈছে। এই প্ৰকল্পটো নিৱাড়ে, তোণ্ডোশী, কলম্বে আৰু জালু নামৰ চাৰিখন গাঁৱৰ ১৫০.৭৪ হেক্টৰ অনা-বনাঞ্চল ভূমিত বিস্তৃত। এই অঞ্চলটো কয়না বন্যপ্ৰাণী অভয়াৰণ্যৰ পৰিৱেশ-সংবেদনশীল অঞ্চলৰ অন্তৰ্গত, যিটো সহ্যাদ্ৰী ব্যাঘ্ৰ প্ৰকল্পৰো এক অংশ। ৰাজ্যিক বন্যপ্ৰাণী পৰিষদৰ নিৰ্দেশনা অনুসৰি, কোম্পানীটোৱে প্ৰকল্পৰ মুঠ ব্যয়ৰ ৪ শতাংশ সহ্যাদ্ৰী ব্যাঘ্ৰ প্ৰকল্পৰ বেংক একাউণ্টত জমা দিব লাগিছিল, যিটো পূৰ্বৰ অনুমানিক ব্যয়ৰ হিচাপত ২২৭ কোটি টকা আছিল। কিন্তু শেহতীয়া শপতনামাৰ ভিত্তিত এই ধনৰাশি মাত্ৰ ২.২৭ কোটি টকালৈ অৱনমিত হৈছে। সাতাৰা জিলাৰ অবৈতনিক বন্যপ্ৰাণী ৱাৰ্ডেন ৰোহন ভাটে যোৱা ৩০ অক্টোবৰত প্ৰধানমন্ত্ৰীৰ অভিযোগ নিষ্পত্তি প’ৰ্টেল আৰু মহাৰাষ্ট্ৰৰ চৰকাৰী প’ৰ্টেলত প্ৰকল্পৰ ব্যয় লুকুওৱা সন্দৰ্ভত এক আনুষ্ঠানিক অভিযোগ দাখিল কৰাৰ পাছতেই সমগ্ৰ বিষয়টো পোহৰলৈ আহে।
এই সন্দৰ্ভত মহাৰাষ্ট্ৰ বন বিভাগৰ স্থিতিক লৈয়ো বিভ্ৰান্তিৰ সৃষ্টি হৈছে। প্ৰতিবেদন অনুসৰি, যোৱা ১২ অক্টোবৰত প্ৰধান মুখ্য বন সংৰক্ষক (বন্যপ্ৰাণী) এম শ্ৰীনিবাস ৰেড্ডীয়ে সংশোধিত ব্যয়ক সন্মতি দি ৫৬.৭৫ লাখ টকা (সংশোধিত ব্যয়ৰ ১ শতাংশ) জমা কৰিবলৈ কোম্পানীটোক নিৰ্দেশ দিছিল। কিন্তু ১৪ নৱেম্বৰত ‘হিন্দুস্তান টাইমছ’ৰ প্ৰতিবেদনত ৰেড্ডীয়ে স্পষ্ট কৰি দিয়ে যে বন বিভাগে সংশোধিত ব্যয়ৰ হিচাপ গ্ৰহণ কৰা নাই আৰু বৰ্তমান কোম্পানীটোৰ পৰা ব্যয় হ্ৰাসৰ কাৰণ দৰ্শাই সবিশেষ নথিপত্ৰ বিচাৰিছে। আনহাতে, আদানী গ্ৰীণ এনাৰ্জীয়ে প্ৰকাশ কৰা মতে, ৫৬.৭৫ কোটি টকাৰ হিচাপটো কেৱল স্থান পৰীক্ষণ আৰু জৰীপৰ ব্যয়হে আছিল। তদুপৰি, এই সমগ্ৰ প্ৰকল্পটো ব্যক্তিগত ভূমিৰ ওপৰত প্ৰস্তাৱিত আৰু ই কয়না বন্যপ্ৰাণী অভয়াৰণ্যৰ পৰা প্ৰায় ৩.২ কিলোমিটাৰ দূৰত অৱস্থিত বুলি কোম্পানীটোৱে দাবী কৰিছে।
এই বিতৰ্ক পোহৰলৈ অহাৰ লগে লগে ৰাষ্ট্ৰীয় ৰাজনীতিতো ইয়াৰ প্ৰভাৱ পৰিছে। কংগ্ৰেছৰ সাধাৰণ সম্পাদক জয়ৰাম ৰমেশে ছ’চিয়েল মিডিয়া এক্সযোগে এই সমগ্ৰ কাণ্ডক এক ‘বৃহৎ পৰিসৰৰ কেলেংকাৰী’ বুলি অভিহিত কৰিছে। ৫,৬৭৫ কোটি টকাৰ প্ৰকল্প এটাৰ ব্যয় শপতনামাত মাত্ৰ ৫৬.৭৫ কোটি টকা কেনেকৈ হ’ব পাৰে বুলি প্ৰশ্ন উত্থাপন কৰি তেওঁ আদানী গোটৰ ব্যৱসায়িক সম্প্ৰসাৰণ আৰু চৰকাৰী সম্পত্তি অধিগ্ৰহণৰ অভিযোগৰ তদন্তৰ বাবে যুটীয়া সংসদীয় সমিতি গঠনৰ দাবী পুনৰবাৰ সবল ৰূপত উত্থাপন কৰিছে।
