দেশৰ জনসাধাৰণক সম্পূৰ্ণ অজ্ঞাতে ৰাখি নৰেন্দ্ৰ মোদী নেতৃত্বাধীন বিজেপি চৰকাৰে ফ্ৰান্সৰ পৰা পূৰ্বতে হোৱা চুক্তিৰ বিপৰীতে ৪১,২০৫ কোটি টকা অধিক দামত ক্ৰয় কৰিলে ৰাফেল বিমান। কংগ্ৰেছে ফাদিল কৰিছে এই তথ্য।
আজি ২৬ জুলাইত নিখিল ভাৰত কংগ্ৰেছ কমিটিৰ নিৰ্দেশ মতে ভাৰতৰ আন আন ৰাজ্যৰ লগতে অসমতো গুৱাহাটীৰ ৰাজীৱ ভৱনত এখন সংবাদমেল সম্বোধন কৰি এই তথ্য প্ৰকাশ কৰে প্ৰদেশ কংগ্ৰেছৰ সভাপতি ৰিপুন বৰাই।
‘প্ৰধানমন্ত্ৰী নৰেন্দ্ৰ মোদীয়ে দেশৰ Cabinet Committee on Security ৰ সৈতে আলোচনা নকৰাককৈ ফ্ৰান্সলৈ গৈ সম্পূৰ্ণ একপক্ষীয়ভাৱে ফ্ৰান্স চৰকাৰৰ সৈতে আলোচনা কৰি কংগ্ৰেছৰ দিনত হোৱা ৰাফেল বিমান ক্ৰয়ৰ চুক্তিক সলনি কৰি পেলালে।’
ইয়াৰ ফলত ভাৰতে ৰাফেল বিমান ক্ৰয় কৰাৰ বাবে পূৰ্বৰ চুক্তিমতে নিৰ্ধাৰিত দামতকৈ ৪১,২০৫ কোটি টকা অধিক দৰত ক্ৰয় কৰিবলগীয়া হৈছে বুলি তেওঁ অভিযোগ কৰে। লগতে এই কথা সম্পূৰ্ণ গোপনে ৰখা বুলিও সংবাদ মেলত ৰিপুন বৰাই জানিবলৈ দিয়ে।
আনকি সদনত এই বিষয়ত প্ৰশ্ন উত্থাপন হোৱাত বিজেপিৰ ফালৰ পৰা অহা উত্তৰত কেবাবাৰো এই দাম প্ৰকাশৰ ক্ষেত্ৰত মিথ্যাচাৰৰ আশ্ৰয় লোৱাৰো অভিযোগ আনে।
‘দেশৰ নিৰাপত্তা আৰু ৰাষ্ট্ৰীয় স্বাৰ্থৰ লগত বিজেপিয়ে আপোচ কৰিছে। তেওঁলোকে দেশবাসীক এটা সাংঘাতিক মিছা কথা কৈছে। তেওঁলোকে সত্যৰ অপলাপ কৰিছে আৰু মিছা কথা কৈ দেশবাসীৰ মনোযোগ অন্য পিনে লৈ গৈছে’- ৰিপুন বৰাই কয়।
কংগ্ৰেছে এই ঘটনাৰ চিবিআই তদন্তৰ দাবী জনাইছে। লগতে দেশবাসীক বিপথে পৰিচালিত কৰাৰ অভিযোগত প্ৰতিৰক্ষা মন্ত্ৰী আৰু বিত্তমন্ত্ৰীৰ বিৰুদ্ধে কংগ্ৰেছে বিশেষাধিকাৰ ভংগৰো অভিযোগ অনাৰ প্ৰস্তাৱ লোৱা বুলি প্ৰকাশ কৰে।
বৰাই সংবাদমেলত কয় যে ২০০৮ চনৰ ২৫ জানুৱাৰীত কংগ্ৰেছ চৰকাৰৰ দিনত ভাৰত আৰু ফ্ৰান্সৰ মাজত হোৱা Indo French Confidentiality Agreement, 2008 মতে ভাৰতে ফ্ৰান্সৰ পৰা ১২৬ খন ৰাফেল বিমান ক্ৰয় কৰাৰ চুক্তি হৈছিল। এই চুক্তি অনুসৰি ভাৰতে ফ্ৰান্সৰ পৰা ৩৬ খন ‘ৰেডিমেট’ বিমান ক্ৰয় কৰি বাকী কেইখনৰ বাবে ফ্ৰান্সৰ প্ৰযুক্তি ব্যৱহাৰ কৰি ‘হিন্দুস্তান এৰ’নটিকেল লিমিটেড’ নামৰ সংস্থাৰ দ্বাৰা ভাৰততে নিৰ্মাণ কৰাৰ কথা আছিল বুলি তেওঁ জানিবলৈ দিয়ে।
‘এই চুক্তিৰ পাছত ২০১২ চনৰ ১২ ডিচেম্বৰত ‘ইন্টাৰনেশ্যনেল বীড’ হয় আৰু সেইমতে এই ৰাফেল বিমানৰ দাম প্ৰতিখনত (ভাৰতীয় মূল্যত) ৫২৬.১০ টকা নিৰ্ধাৰিত হয়। তেনেকৈ ৩৬ খনত দাম হয়গৈ ১৮,৯৪০ কোটি টকা। কিন্তু নৰেন্দ্ৰ মোদীয়ে ফ্ৰান্সৰ লগত হোৱা চুক্তি সলনি কৰি পেলোৱাৰ ফলত ভাৰতে একোখন বিমান ক্ৰয় কৰিবলগীয়া হ’ল ১৬৭০.৭০ কোটি টকাত আৰু তেনেকৈ ৩৬ খনত দাম হ’ল ৬০,১৪৫ কোটি টকা’-সংবাদমেলত ৰিপুন বৰাই সদৰী কৰে।
বৰাই লগতে কয়, ‘এইদৰে নৰেন্দ্ৰ মোদী চৰকাৰে ৰাইজৰ টকা অতিৰিক্তভাৱে খৰচ কৰিলে। ই এটা কেলেংকাৰী। ইয়ে প্ৰমাণ কৰিছে তেওঁলোক কিমান স্বচ্ছ।‘
ইয়াৰ উপৰিও তেওঁ কয়, ‘দেশৰ প্ৰতিৰক্ষা মন্ত্ৰালয়ে ৰাফেল বিমানৰ দাম সম্পৰ্কত সদনতো মিছা তথ্য দি সদনক বিপথে পৰিচালিত কৰিছে।‘
বৰাই প্ৰকাশ কৰা মতে ২০১৬ চনৰ ১৮ নবেম্বৰত প্ৰতিৰক্ষা দপ্তৰৰ ৰাজ্যিক মন্ত্ৰী ড০ সুভাষ ভামৰেই ৰাজ্যসভাত উত্থাপিত এক প্ৰশ্নৰ উত্তৰত ভাৰতে ফ্ৰান্সৰ পৰা একোখন ৰাফেল বিমান প্ৰায় ৬৭০ কোটি টকাত ক্ৰয় কৰা বুলি জনাইছিল। ইয়াৰ পাছত ২০১৭ চনৰ ১৭ নবেম্বৰত ৰক্ষা ভৱনত অনুষ্ঠিত এক সংবাদমেলত প্ৰতিৰক্ষা মন্ত্ৰী নিৰ্মলা সীতাৰমণেও ৬৭০ কোটি টকাত ৰাফেল বিমান ক্ৰয় কৰা বুলি প্ৰকাশ কৰাৰ কথা বৰাই জানিবলৈ দিয়ে।
আনহাতে, ৰাফেল বিমানৰ দামৰ কথাটো গোপনে ৰখাৰ ক্ষেত্ৰত কোনো চৰ্ত নাই বুলি জানিবলৈ দি ৰিপুন বৰাই কয় যে কেৱল নিৰাপত্তাৰ বাবে ইয়াৰ প্ৰযুক্তিৰ দিশটোহে গোপনে ৰখাৰ নিয়ম আছে।
তেওঁ লগতে এই তথ্যসমুহ কংগ্ৰেছে ফ্ৰান্স চৰকাৰৰ পৰা লাভ কৰা বুলিও সংবাদমেলত প্ৰকাশ কৰে। ইয়াৰ উপৰি ভাৰতত নিৰ্মাণ কৰিবলগীয়া ৰাফেল বিমানৰ কাম পূৰ্বতে নিৰ্ধাৰণ কৰা ‘হিন্দুস্তান এৰ’নটিকেল লিমিটেড’ৰ সলনি বিজেপিয়ে আন কোনো বিমান নিৰ্মাণৰ অভিজ্ঞতা নথকা কোম্পানীক দিয়াৰ চেষ্টা চলাই থকা বুলি সংবাদমেলত জানিবলৈ দিয়ে।
কংগ্ৰেছে সন্দেহ প্ৰকাশ কৰা অনুসৰি বিজেপিয়ে এই কাম ‘ৰিলায়েন্স’ বা ‘জিঅ’’ক দিয়াৰ চেষ্টা কৰি আছে বুলিও বৰাই প্ৰকাশ কৰে।
