আমেৰিকাৰ পৰা প্ৰকাশিত জনপ্ৰিয় আৰু বিশ্ব সমাদৃত দা নিউয়ৰ্ক টাইমছ মেগাজিনত প্ৰকাশ পোৱা এটা অনুসন্ধানমূলক প্ৰতিবেদনত ৰামদেৱৰ পতঞ্জলিৰ অসমস্থিত মেনেজাৰে অসমৰ মানুহৰ বিষয়ে হীন মন্তব্য কৰাৰ বিষয়ে প্ৰকাশ হোৱাত তীব্ৰ অসন্তুষ্টিৰ সৃষ্টি হৈছে। ছ’চিয়েল মিডিয়াত এই লৈ অব্যাহত আছে চৰ্চা আৰু গৰিহণাৰ জোৱাৰ।
আমেৰিকাৰ এজন প্ৰখ্যাত সাংবাদিক ৰবাৰ্ট এফ ৱৰ্থে নিজৰ ভ্ৰমণ অভিজ্ঞতাৰ ভিত্তিত যুগুতোৱা এই প্ৰতিবেদনটোত মেনেজাৰজনৰ উদ্ধৃতি দিয়া হৈছে। তেওঁ (ৰবাৰ্টে) অসম ভ্ৰমণৰ সময়ত মেনেজাৰজনে তেওঁক আতিথ্য দিয়াৰ লগতে অসমৰ বিষয়ে এই কথাখিনি কোৱা বুলি লিখিছে।
প্ৰতিবেদনটোৰ মতে, মেনেজাৰ এছ বি সিঙে তেওঁক অসমৰ বিষয়ে ক’বলৈ গৈ কয়, “আমি তেওঁলোকক মানসিকভাৱে সলাই আছো।” পতঞ্জলিয়ে নিয়োগ প্ৰত্যাশীসকলক লৈ ৩৮০টাতকৈ কৰ্মশালা পাতিছে, য’ত মূল্যবোধৰ শিক্ষা দিয়া হয়।”
তাৰ পিছতে তেওঁ কয়, “অসমৰ মানুহৰ বহুতো বদ অভ্যাস আছে, ইয়াৰ ভিতৰত আমিষ আহাৰ খোৱা, দেশৰ প্ৰতি শ্ৰদ্ধাশীল নোহাৱাও আছে।”
আনহাতে অসমৰ মানুহে দীৰ্ঘদিনৰ ধৰি নৈতিকতাহীন মানুহৰ নৈতিকতাহীন ৰাজনীতিৰ প্ৰতি মন দি আহিছে বুলিও মন্তব্য কৰে মেনেজাৰজনে।
এইদৰে অসমৰ মানুহৰ বিষয়ে অপমানসূচক মন্তব্য কৰাত স্বাভাৱিকতে প্ৰতিক্ৰিয়াৰ সৃষ্টি হৈছে অসমত। বহুতে মন্তব্য কৰিছে যে অসম চৰকাৰৰ পৰা বিনা পইচাত হাজাৰ বিঘা মাটি লৈ ব্যৱসায় কৰাৰ সুযোগ পোৱা ৰামদেৱৰ পতঞ্জলিৰ এয়াই যদি অসম সম্পৰ্কীয় ধাৰণা, তেন্তে তাতকৈ দুৰ্ভাগ্যজনক কথা অসমৰ বাবে আৰু কি হ’ব পাৰে!!
উল্লেখৰ প্ৰয়োজন যে সাক্ষাৎকাৰ দিয়াৰ সময়ত পতঞ্জলিৰ মেনেজাৰজনে বিদেশী সাংবাদিকজনক কয় যে পতঞ্জলি উদ্যোগটো স্থাপন কৰা ঠাইখনত পূৰ্বে অৰণ্য আছিল আৰু তাত বহুতো হাতী বাস কৰিছিল। কিন্তু হাতীবোৰক কৌশলেৰে কাষৰ হাবিলৈ খেদি পঠোৱা হ’ল। লগতে অৰণ্যাঞ্চলটো মাত্ৰ ১৩২ দিনতে সেইটো কৰা হৈছে বুলি গৌৰৱেৰে কয়।
আনহাতে ছ’চিয়েল মিডিয়াত একাংশই মন্তব্য কৰিছে যে অসমৰ মানুহক বনৌষধি, বনশাকৰ বিভিন্ন দ্ৰব্যগুণ সম্পৰ্কত পতঞ্জলিয়ে শিকাব লগীয়া একো নাই। অসমৰ মানুহে ভেদাইলতা, মানিমুনি, দোৰোণবন, দূবৰিবন, নৰসিংহ, পদিনা, মছন্দৰী আদিৰ সুব্যৱহাৰ যুগ যুগ ধৰি কৰি আহিছে।
