১৭ বছৰৰ মূৰত প্ৰাক্তন মুখ্য মন্ত্ৰী তৰুণ গগৈয়ে আজি তেওঁৰ অন্যতম প্ৰিয় বাসস্থান কইনাধৰা এৰিলে। আজি গগৈয়ে কইনাধৰাৰ পৰা চৰকাৰে তেওঁৰ বাবে মন্ত্ৰীৰ কলনিত সাজু কৰি তোলা অন্য এটা ঘৰলৈ আহে।
উল্লেখযোগ্য যে তৰুণ গগৈ ২০০১ চনত অসমৰ মুখ্য মন্ত্ৰী হোৱাৰ পিছৰ পৰাই কইনাধৰা পাহাৰৰ উক্ত ঘৰটোত আছিল, যিটো কংগ্ৰেছৰ শাসন কালতে ১৯৭৬-ত নিৰ্মাণ কৰা হৈছিল।
গগৈয়ে আজি নিজৰ নতুন বাসগৃহত প্ৰৱেশ কৰি সংবাদমেল সম্বোধন কৰি কয় যে কইনাধৰাৰ ঘৰটোৰ সৈতে তেওঁৰ ব্যক্তিগত আৰু মুখ্য মন্ত্ৰী হিচাপে কৰা ৰাজ্যখনৰ উন্নয়নৰ বহুবোৰ কথাৰ স্মৃতি জড়িত হৈ আছে। তেওঁ কয় যে অসম অতি বেয়া সময়ৰ মাজেৰে আগ বঢ়াৰ সময়তে ৰাজ্যৰ মুখ্য মন্ত্ৰিত্বৰ দায়িত্ব লৈ তেওঁ এই ঘৰটোৰ পৰাই সফলতা পাইছিল।
“ঘৰটোৰ সৈতে মোৰ বহু স্মৃতি জড়িত হৈ আছে। ঘৰটো বহুবোৰ গুৰুত্বপূৰ্ণ ঘটনাৰো সাক্ষী। ঘৰটোৰ সান্নিধ্য নাপাম আৰু।” এইদৰে স্মৃতিকাতৰ হৈ পৰে গগৈ।
অৱশ্যে নতুন ঘৰটোতো তেওঁৰ সৌভাগ্যৰ মুখ দেখিব বুলি আশা প্ৰকাশ কৰে। লগতে তেওঁ কয় যে মন্ত্ৰীৰ কলনিত থকাটোৱে তেওঁক জনতাৰ অধিক কাষ চপাত সুযোগ দিব বুলিও কয়।
আনহাতে মন্ত্ৰীৰ কলনিত নতুন ঘৰত প্ৰাক্তন মুখ্য মন্ত্ৰী গগৈৰ প্ৰতিৱেশী হ’ব সততে বাকযুদ্ধত লিপ্ত হোৱা তেওঁৰ প্ৰাক্তন সতীৰ্থ তথা বৰ্তমান বিজেপিৰ মন্ত্ৰী ড০ হিমন্ত বিশ্ব শৰ্মা আৰু হিমন্তৰ শিষ্য পীযুষ হাজৰিকা। লগতে আছে ৰিহণ দৈমাৰী, পল্লৱলোচন দাস।
উল্লেখযোগ্য যে নতুন চৰকাৰী বাসভৱনটো সাজু হৈ উঠা নাছিল বাবে প্ৰাক্তন মুখ্য মন্ত্ৰীজনে তেওঁৰ কাৰ্য্যকাল উকলি যোৱাৰ পিছতো দুবছৰ ধৰি কইনাধৰা ঘৰটোতে আছিল।
