অলপতে অসম কংগ্ৰেছৰ তত্ত্বাৱধায়ক হৰিশ ৰাৱতে অসম ভ্ৰমণ কৰা সময়ত কংগ্ৰেছক পাণ্ডৱ আখ্যা দিয়াৰ লগতে কংগ্ৰেছত কোনো অন্তঃকন্দল নাই বুলি কৈ গৈছিল। কিন্তু তাৰ ঠিক এসপ্তাহৰ পিছতে আজি হাইলাকান্দি জিলা কংগ্ৰেছ কাৰ্য্যালয় কুৰুক্ষেত্ৰত পৰিণত কৰিলে দলটোৰ দুটা ফৈদে।
গঁতিয়াগঁতি, ঘুচিয়াঘুচিৰ পৰা লাঠীৰে প্ৰহাৰলৈ পৰিণত হোৱা এই মাৰপিট কেৱল দলৰ কাৰ্য্যালয়তে সীমাবদ্ধ নাথাকি ৰাজপথলৈ সম্প্ৰসাৰিত হয়।
আজিৰ এই দুৰ্বাদল কাজিয়াৰ মূলতে হ’ল জিলা সভাপতি হিচাপে আলগাপুৰ সমষ্টিৰ প্ৰাক্তন বিধায়ক গৌতম ৰয়ক নিৰ্বাচন কৰাটো। জানিব পৰামতে, জিলা সভাপতিৰ পদটোৰ বাবে দুটা ফৈদৰ মাজত ভালেমান দিনৰ পৰাই অৰিয়াঅৰি চলি আছিল।
প্ৰাক্তন মন্ত্ৰী গৌতম ৰয়ৰ পুত্ৰ ৰাহুলক হাইলাকান্দি জিলাৰ সভাপতি নিৰ্বাচন কৰাত ক্ষুব্ধ হৈ পৰে একাংশ লোকে আৰু প্ৰাক্তন জিলা পৰিষদৰ সভাপতি অনামুদ্দিন লস্কৰৰ নেতৃত্বত মুকলিকৈ বিদ্ৰোহ কৰে। তেওঁলোকে বংশানুক্ৰমিক ৰাজনীতি নচলিব বুলি হংকাৰ দিয়ে। ইয়ে সংঘাতৰ সূচনা কৰে আৰু দুয়োটা ফৈদৰ লোকৰ মাজত হতাহতি, ঘুচিয়াঘুচি হৈ ক্ৰমে মাৰপিট হ’বলৈ ধৰে।
মন কৰিব লগীয়া যে জিলা সভাপতিৰ পদত ৰাহুলৰ পূৰ্বে আছিল তেওঁৰ দেউতাক গৌতম ৰয়। বাপেক-পুতেকৰ এই পৰিয়ালকেন্দ্ৰিক ৰাজনীতিত স্বাভাৱিকতে অসন্তুষ্ট হৈ পৰে অধিকাংশ লোক।
আনহাতে একাংশ ধৰ্মীয় সংখ্যালঘু লোকে হাইলাকান্দি জিলাখনত মুচলমান লোক সংখ্যাগৰিষ্ঠ বাবে এজন মুচলিম নেতাকহে জিলা সভাপতিৰ পদৰ বাবে নিৰ্বাচিত কৰিব লাগে বুলি দাবী কৰা বুলিও জানিব পৰা গৈছে।