কেন্দ্ৰীয় মন্ত্ৰী ৰাজেন গোাঁইক ২৪ ঘণ্টাৰ ভিতৰত পদত্যাগৰ দাবী অঃ জাঃ যুঃ ছাঃ পঃৰ

কেন্দ্ৰীয় ৰে’ল ৰাজ্যিক মন্ত্ৰী ৰাজেন গোঁহাইয়ে এগৰাকী বিবাহিতা মহিলাক ধৰ্ষণ চলোৱা বুলি নগাঁও সদৰ আৰক্ষী থানাত গোচৰ ৰুজু হোৱা ঘটনাৰ পিছতে আজিও মন্ত্ৰীগৰাকীৰ গৃহচহৰ নগাঁও উত্তাল হৈ আছে।

উল্লেখযোগ্য যে আজি অসম জাতীয়তাবাদী যুৱ ছাত্ৰ পৰিষদৰ নগাঁও জিলা সমিতিয়ে নগাঁও চহৰৰ নতুন বজাৰত কেন্দ্ৰীয় মন্ত্ৰীগৰাকীৰ জুমুঠি দাহ কৰি প্ৰতিবাদ সাব্যস্ত কৰে।

লগতে যুৱ ছাত্ৰ পৰিষদৰ শতাধিক সদস্যই ‘ৰাজেন গোহাঁই হায় হায়, কেন্দ্ৰীয় ৰেল ৰাজ্যিক মন্ত্ৰী মুৰ্দাবাদ, নাৰী নিৰ্যাতন বন্ধ হওঁক’ আদি প্ৰতিবাদী শ্ল’গানেৰে পৰিবেশ উত্তাল কৰি তোলে।

যুৱ ছাত্ৰ পৰিষদৰ নগাঁও জিলা সমিতিৰ সভাপতি দীপমনি বড়া আৰু সাধাৰণ সম্পাদক দিলীপ শইকীয়াই কেন্দ্ৰীয় ৰে’ল ৰাজ্যিক মন্ত্ৰী ৰাজেন গোহাঁইক ২৪ ঘণ্টাৰ ভিতৰত পদত্যাগ কৰাৰ দাবী উত্থাপন কৰি আৰক্ষীক মন্ত্ৰীজনক গ্ৰেপ্তাৰৰ দাবী জনায়।

লগতে যুৱ ছাত্ৰ পৰিষদৰ নগাঁও জিলা সমিতিয়ে এই সম্পৰ্কত জিলা উপায়ুক্তৰ জৰিয়তে ভাৰতবৰ্ষৰ প্ৰধান মন্ত্ৰী আৰু ৰাষ্ট্ৰপতিলৈ স্মাৰকপত্ৰও প্ৰেৰণ কৰে।

ইফালে সদৌ প্ৰগতিশীল নাৰী সন্থাৰ সভানেত্ৰী আয়েফা বেগম আৰু সম্পাদিকা পৰী কুমাৰী বৰুৱাই এক প্ৰেছ বিবৃতিৰ জৰিয়তে অভিযুক্ত মন্ত্ৰী ৰাজেন গোঁহাইক দৃষ্টান্তমূলক শাস্তি দিয়াৰ দাবী জনাইছে। লগতে সংগঠনটোৰ নেত্ৰীদ্বয়ে ‘বিজেপি হটাওক নাৰী বচাওক আন্দোলন গঢ়ি তুলিব’ বুলিও হুংকাৰ দিয়ে।

কেন্দ্ৰীয় মন্ত্ৰী ৰাজেন গোাঁইক ২৪ ঘণ্টাৰ ভিতৰত পদত্যাগৰ দাবী অঃ জাঃ যুঃ ছাঃ পঃৰ

AJYCP demands resignation of Railway Minister of State Rajen Gohain within 24 hours.