প্ৰকৃতি দৰদী, যুৱ প্ৰজন্মৰ হাৰ্টথ্ৰ’ব জুবিন গাৰ্গক এইবাৰ দেখা গ’ল এগৰাকী চিকিৎসক তথা কিডনি ৰোগীৰ পৰামৰ্শদাতাৰ ৰূপত। এটা ভিডিঅ’যোগে জনপ্ৰিয় গায়কজনে আগবঢ়াইছে কিডনি ৰোগীৰ চিকিৎসাৰ বাবে এটি পৰামৰ্শ।
ভিডিঅ’টোত তেওঁৰ খাৰঘুলিস্থিত বাসগৃহত থকা এজোপা গছৰ শিপাৰ সৈতে দৰ্শকসকলক পৰিচয় কৰি দিছে। ‘এই গছজোপাৰ নাম যম লাখুটি। যম লাখুটিৰ পৰা যিটো আলু ওলাই এই আলুটো কিডনি ৰোগীৰ কাৰণে এটা খুব ডাঙৰ দৰৱ,’ জুবিনৰ দিহা।
গছজোপাৰ আলুটো সিজাই তাৰ পানীটো খোৱা কিডনি ৰোগীৰ বাবে ভাল বুলি ৰাইজক জনাইছে গাৰ্গে।
‘বহুতে চিনি নাপাই, বহুতে বেয়া গছ বুলি ভাবে বাবে এনেই গছজোপা পৰি থাকে,’ বুলিও তেওঁ মন্তব্য কৰে।
উল্লেখ্য যে, খাৰঘুলিস্থিত জুবিনৰ বাসগৃহ বিভিন্ন প্ৰজাতিৰ মূল্যৱান উদ্ভিদেৰে ভৰপূৰ। আছে ভালেসংখ্যক ঔষধি উদ্ভিদো।
গছজোপা ৰোৱাৰ পাছত ‘প্ৰথমবাৰ গছজোপাৰ আলুটো খান্দি ওলিয়াইছো’ বুলি ভিডিঅ’টোত জুবিনে মন্তব্য কৰিছে।
শনিবাৰে আপল’ড কৰা ভিডিঅ’টো বৰ্তমানলৈকে প্ৰায় ১ লাখ ৫২ হাজাৰ দৰ্শকে উপভোগ কৰাৰ লগতে শ্বেয়াৰ কৰিছে প্ৰায় ২৭০০জনে।
দেওবাৰে সন্ধিয়ালৈকে ৩৯৭ গৰাকীয়ে কমেন্ট কৰা ভিডিঅ’টোত বহু সংখ্যকে জুবিনৰ এই পৰামৰ্শৰ বাবে ধন্যবদ জ্ঞাপন কৰাৰ উপৰিও বহুজনে যম লাখুটিৰ অন্যান্য ঔষধি গুণো কমেন্টৰ জৰিয়তে সদৰী কৰিছে।
জানিব পৰা মতে যম লাখুটিৰ আলু বা শিপা জণ্ডিছ ৰোগৰ নিৰাময়টো ব্যৱহাৰ কৰা হয়। আঘাতজনিত ঘাঁ বা কাণৰ পৰা পুঁজ ওলালে যম লাখুটিৰ পাত পিহি লগালে সোনকালেই আৰোগ্য হৈ উঠে বুলিও জানিব পৰা গৈছে।
অৱশ্যে নৰ্থ ইষ্ট নাও-এ প্ৰশিক্ষিত চিকিৎসকৰ নিদানৰ বিকল্প হিচাপে জুবিনৰ এই দিহা ৰাইজলৈ আগবঢ়োৱা নাই।
