সংসদৰ পৰৱৰ্তী শীতকালীন অধিৱশনত কোচ ৰাজবংশী সকলক জনজাতিকৰণ স্বীকৃতিৰ ক্ষেত্ৰ বিধেয়ক উত্থাপন কৰাৰ বাবে কেন্দ্ৰীয় চৰকাৰক দাবী জনাইছে সদৌ অসম কোচ ৰাজবংশী সন্মিলনীয়ে। এই সন্দৰ্ভত অহা ৩ ছেপ্টেম্বৰত সন্মিলনীয়ে ৰাজভৱনৰ সন্মুখত তিনিঘন্টীয়া অৱস্থান ধৰ্মঘট কাৰ্যসূচী পালন কৰাৰ লগতে অৰ্থনৈতিক অৱৰোধৰ কাৰ্যসূচীও গ্ৰহণ কৰিব বুলি জানিব দিছে।
দেওবাৰে গুৱাহাটীত অনুষ্ঠিত সদৌ অসম কোচ ৰাজবংশী সন্মিলনীৰ এখন বৰ্দ্ধিত কাৰ্যনিৰ্বাহকত পৰৱৰ্তী শীতকালীন অধিৱেশনত কোচ ৰাজবংশীৰ জনজাতিকৰণৰ বিধেয়ক উত্থাপনৰ দাবী প্ৰসংগত এক গুৰুত্বপূৰ্ণ সিদ্ধান্ত গ্ৰহণ কৰা হয়।
অলপতে সমাপ্ত হোৱা সংসদৰ বৰ্ষাকালীন অধিৱেশনত কোচ ৰাজবংশীৰ জনজাতিকৰণ সম্পৰ্কত কোনো বিধেয়ক উত্থাপন নকৰাৰ ক্ষুব্ধ সন্মিলনীয়ে অহা শীতকালীন অধিৱেশনত বিধেয়ক উত্থাপনৰ চৰম সীমা বান্ধি দিছে। সদৌ অসম কোচ ৰাজবংশী সন্মিলনীয়ে বিজেপিক তেওঁলোকৰ নিৰ্বাচনী প্ৰতিশ্ৰুতি ৰক্ষা কৰিবলৈ দাবী জনাইছে।
সভাত গ্ৰহণ কৰা আন এক সিদ্ধান্ত অনুসৰি জনজাতিকৰণৰ ক্ষেত্ৰত দেখা দিয়া অস্পষ্টতা সন্দৰ্ভত কেন্দ্ৰ আৰু ৰাজ্য চৰকাৰ স্থিতি ৰাজহুৱা কৰাৰ দাবী জনায়।
আনহাতে, ৰাষ্ট্ৰীয় নাগৰিক পঞ্জীত নাম অন্তৰ্ভুক্তিৰ ক্ষেত্ৰত কোচ ৰাজবংশী লোকক হাৰাশাস্তি কৰাৰ অভিযোগ কৰি সভাই আন এটা সিদ্ধান্ত গ্ৰহণ কৰে। সভাই নাম অন্তৰ্ভুক্ত নোহোৱা কোচ ৰাজবংশীসকলৰ এন আৰ চিত নাম অন্তৰ্ভুক্ত কৰাৰ দাবী জনায়।
সন্মিলনীয়ে লগতে ডিটেনশ্যন কেম্পত থকা কোচ ৰাজবংশী লোকসকলক শীঘ্ৰে মুকলি কৰি দিয়াৰো দাবী জনায়। সন্মিলনীৰ সভাপতি সুনীল কুমাৰ বৰ্মনৰ সভাপতিত্বত অনুষ্ঠিত বৰ্দ্ধিত কাৰ্যনিৰ্বাহক সভাখনত কোচ ৰাজবংশীসকলৰ জনজাতিকৰণৰ দাবীত অহা ২ অক্টোবৰত কেইবাগৰাকীও মহিলাই মুণ্ডন কাৰ্যসূচী পালন কৰিব বুলি সিদ্ধান্ত গ্ৰহণ কৰে।
ইয়াৰ পিছতো যদি চৰকাৰে বিষয়টোত গুৰুত্ব প্ৰদান নকৰে তেতিয়াহ’লে অহা নৱেম্বৰৰ পৰা সংগঠনটোৱে অৰ্থনৈতিক অৱৰোধ কাৰ্যসূচী গ্ৰহণ কৰিব বুলিও সকীয়াই দিয়ে। আনহাতে খালী হ’বলগীয়া ৰাজ্যসভাৰ আসনখনত এগৰাকী কোচ ৰাজবংশীৰ প্ৰতিনিধিক প্ৰেৰণ কৰিবলৈ বিজেপি দল তথা চৰকাৰক আহ্বান জনাই এটা সিদ্ধান্ত গ্ৰহণ কৰা হয়।
